INFORMADOR * diciembre de 1937, osẽ vaʼekue Lóndrespe, og̃uenohẽ kuri ko anúnsio. Pype oñemoĩ peteĩ subtítulo omopensátava voi oimeraẽvape: “Ojapóma 10 áño ndaiporiguasúi hague progréso”. Pe puvlikasión oexplika mbaʼérepa omoĩ pe subtítulo oñeʼẽvo pe predikasión ojejapóvare áño 1928 guive 1937 peve.

¿Mbaʼéicha rupípa ndoprogresaguasuvéi pe predikasión Gran Bretáñape? Posívlemente pórke umi kongregasión ojepokuaa ombaʼapo de una fórmante heta áñore. Avei pe sukursál odesidi kuri pe território opredikataha 200 prekursór rupínte. Hiʼarive, umi prekursór ndopredikái kongregasión ndive, síno oho hikuái umi lugár mombyryvehápe. Oĩrõ oserviséva de prekursór, pe sukursál heʼi koʼãvape ndaiporiguasuiha Gran Bretáñape território ojepredika hag̃ua, ha omokyreʼỹ chupekuéra oservi hag̃ua ótro tetãme oĩva Európape. Upe tiémpope, heta prekursór ova ótro paíspe oservi hag̃ua upépe, por ehémplo Fránciape. Haʼekuéra ova nomanehaporãiramo jepe pe idióma ha algúno katu ndoikuaaiete voi.

Peteĩ artíkulo osẽ vaʼekue pe Informadórpe, áño 1937-pe orrekomenda ojepredika hag̃ua 1 millón de óra áño 1938-pe. Upéva ikatúta oñekonsegi káda puvlikadór opredikárõ 15 óra al mes, ha prekursorkuéra katu 110 óra. Ojesuheri avei oñeorganisa hag̃ua grúpo opredikátava 5 óra al día, ha umíva oñehaʼãmbaite vaʼerã ojapo rrevisíta, koʼýte éntre semanakue kaʼaru pytũ.

Hetaiterei ermáno ha ermána ovyʼaiterei oñemokyreʼỹ haguére chupekuéra opredikave hag̃ua. Peteĩ ermána hérava Hilda Padgett * heʼi: “Heta roĩ rombaʼaposevéva Jehová servísiope, ha koʼág̃a pe sukursál oreinvita enterovépe rojapo hag̃ua upéva. Hetaiterei mbaʼe porã ningo ojehupyty”. Peteĩ ermána ijapellídova Wallis heʼi: “Iporãiterei ningo pe idéa oñemeʼẽva oréve ropredika hag̃ua 5 óra al día. Ore roñehaʼãmbaite Jehová servísiope, ha ndaipóri ótra kósa orembovyʼave vaʼerã upévagui. [...] Sapyʼánte orekaneʼõ, péro añetehápe rovyʼaiterei”. Peteĩ mitãkariaʼy hérava Stephen Miller oñemeʼẽ enkuénta iñimportanteha opredikave, upévare oĩ reheve tiémpo ojaposéma voi upéva. Haʼe imanduʼa oĩ hague grúpo de ermáno opredikáva tódo el día visikléta ári, ha kaʼarukue veránope omoĩ umi héntepe ohendu hag̃ua umi diskúrso gravádo. Avei oipuru hikuái kartél opredika hag̃ua pe kállere ha oofrese rrevistakuéra.

Pe Informadórpe heʼi avei oñekotevẽha 1.000 prekursór. Oñekambia rupi oñeorganisa lája umi território, umi prekursór ndopredikavéi ikuéntare, opredika guei kongregasión ndive. Upéicha rupi oapoja hikuái umi ermánope ha omombarete chupekuéra. Peteĩ ermána hérava Joyce Ellis heʼi: “Heta ermáno oñemeʼẽ enkuénta ojapo vaʼerãha iprekursorádo. Upérõ che areko 13 áñonte, ha aserviseterei de prekursóra”. Ko ermána okumpli la iméta áño 1940-pe, orekórõ guare  15 áño. Peteĩ ermáno hérava Peter, upéi omenda vaʼekue Joyce rehe, omobeʼu opáy hague ohendúvo oñekotevẽha 1.000 prekursór. Upe guive, haʼe opensa oservi vaʼerãha avei de prekursór. Upévare junio de 1940-pe, oguerekópe 17 áño, ko ermáno oviaha 105 kilómetro visikléta ári Scarborough peve, ha upépe oñepyrũ ojapo iprekursorádo.

Cyril ha Kitty Johnson ojapo vaʼekue iprekursorádo upe tiémpope, ha osakrifika heta mbaʼe upearã. Haʼekuéra ovende hóga ha umi mbaʼe oguerekomíva ikatu hag̃uáicha oñemantene oservi aja kómo prekursór. Cyril oheja avei itraváho ha un mes haguépe oĩma hikuái oñepyrũ hag̃uáicha iprekursorádo. Ko ermáno heʼi: “Rovyʼa pe rodesidi vaʼekuére, ha ni michĩmi norombyasýi upéva”.

Amás día hetave umi oservíva de prekursór, ha umi ermáno omoakãva pe predikasión pe paíspe ohecha mbaʼéichapa ikatu oipytyvõ chupekuéra. Ojesuheri ojehecha hag̃ua umi prekursórpe hogarã umi siudaháre. Avei oñemokyreʼỹ chupekuéra oservi hag̃ua oñondive ha oiko hag̃ua peteĩ ógapente ikatu hag̃uáicha saʼive ogasta. Áño 1938-pe, Jim Carr oservíva kómo siérvo de sóna (koʼág̃arupi oñehenóiva superintendénte de sirkuíto) osegi kuri pe suherénsia. Shéffieldpe ojealkila peteĩ óga guasu, ha opyta peteĩ ermáno katupyry kárgope. Pe kongregasión pe lugarpegua odona muevlekuéra ha pláta. Jim heʼi: “Enterovéva ojapo ipárte osẽ porã hag̃ua ko arréglo de viviénda”. Pe ógape ova 10 prekursór ikyreʼỹetereíva, ha osegíva peteĩ prográma espirituál. Jim heʼi avei: “Káda pyhareve, umi ermáno ohesaʼỹijo pe téxto diário orambosa aja”. Upéi heʼi avei: “Káda día oho iterritóriope oĩva diferénte pártepe pe siuda tuichakuére”.

Umi puvlikadór ha prekursór oñehaʼãmbaite opredikave oñemokyreʼỹ haguéicha chupekuéra, upévare áño 1938-pe ojehupyty 1 millón de óra. Upe áñope, entéro umi sífra oapareséva pe infórme de predikasiónpe tuichaiterei oaumenta. Ha 5 áñope haimete el tríple voi hetave umi puvlikadór. Umi ermáno oñemeʼẽmbaite Jehová servísiope. Upéva oipytyvõ chupekuéra oaguanta hag̃ua umi situasión ijetuʼuetéva ohasa vaʼekue pe segunda gérra mundiál aja.

Pe Armagedón ningo hiʼag̃uimbaitéma, ha Gran Bretáñape umi prekursór hetave jeýma ohóvo. Umi 10 áño ohasa vaʼekuépe pe kantida oaumenta káda áño. Octubre de 2015-pe g̃uarã oĩma 13.224 prekursór. Entéro koʼã ermáno ni michĩmi nombyasýi ojapo haguére iprekursorádo, pórke oikuaa porã hikuái ndaiporiha ótra kósa iporãvéva upévagui.