Ñande kristiáno tee ñaime desidído ndajahejamoʼãiha mbaʼeve ni avave ñandejoko jaservi hag̃ua Jehovápe. Katuete nde avei rejedesidíma rejapotaha upéva, ha Jehová ovaloraiterei ndefiél haguére chupe (elee 1 Crónicas 28:9). Péro, ¿mbaʼéicha javépa ikatu ijetuʼu ndéve ndefiél hag̃ua Jehovápe? ¿Ha mbaʼépa ikatu rejapo umícha jave?

1. ¿Mbaʼépa ikatu ojapo algúno ñanderahaségui tape vaíre?

Oĩ umi oñehaʼãva ñandejoko pono jaservi Jehovápe. ¿Mávapa por ehémplo? Umíva apytépe oĩ umi oheja vaʼekue Jehová organisasión, ha koʼág̃a oiko oñeʼẽ vai hese oipotágui ñande avei jaheja Jehovápe. Koʼãvape oñehenói apóstata. Avei oĩ umi líder rrelihióso ijapúva ñane kóntrape, ha heʼi heta mbaʼe oity hag̃ua umi noñatendeporãivape. Ipeligrosoiterei ningo ñañemongeta koʼã Ñandejára kontrariokuérandi, jalee umi lívro onohẽva hikuái, umi informasión opuvlikáva Internétpe, térã jahecha umi vidéo ojapóva hikuái. ¿Mbaʼépa heʼi vaʼekue Jesús umi oñehaʼãvare ojoko ótrope ani hag̃ua oservi Jehovápe? “Anína pepena hesekuéra. Haʼekuéra ndohechái mbaʼeve, péro ohechauka haperã ótrope. Peteĩ siégo ogiáramo ótro siégope, mokõivéva hoʼáta peteĩ yvykuápe” (Mateo 15:14).

¿Ha mbaʼépa jajapóta peteĩ ñane konosído odesidíramo ndahaʼemoʼãveimaha testígo de Jehová? Upe persóna haʼéramo peteĩ ñane amígo térã ñane hénte, katuete hasyetereíta ñandéve la ojapóva. Ha ikatu voi ñandejopy jaelehi hag̃ua japreferípa Jehovápe térãpa chupe. Péro ñande ñaime vaʼerã desidído ñandefieltaha Jehovápe añoite (Mateo 10:37). Upévare ñande jajapo la Jehová heʼíva ha ndajajeheʼái umichagua persónare (elee 1 Corintios 5:11).

2. ¿Mbaʼéichapa ikatu jahechauka ñandefielha Jehovápe umi mbaʼe jadesidíva rupive?

Jahayhu rupi Jehovápe ñande ñamboykete opa mbaʼe oúva umi rrelihión japúgui. Upévare ñañatende vaʼerã jadesidíta jave mbaʼépepa ñambaʼapóta ha mbaʼe organisasiónpa jaapojáta. Avei ndajapartisipái mbaʼeveichagua aktivida ojapóvape umi rrelihión japu. Jehová ojerure voi ñandéve: “Peẽ che puévlo, pesẽke [Babilonia Guasúgui]” (Apocalipsis 18:2, 4).

 EJEPYʼAMONGETAMÍNA

3. Emboyketékena umi enseñánsa japu

¿Mbaʼépa jajapo vaʼerã ñahendúramo oĩha oñeʼẽ vaíva Jehová organisasiónre? Elee Proverbios 14:15, ha upéi erresponde ko porandu:

• ¿Mbaʼérepa ndovaléi jaguerovia ojeʼéva guive?

Elee 2 Juan 10, ha upéi erresponde koʼã porandu:

• ¿Ovale piko jajeheʼa umi apóstatare?

• Ikatu oime nañañeʼẽi direktoite umi apóstatandi, ¿péro mbaʼéichapa lomímonte ikatu og̃uahẽ ñandéve umi mbaʼe omboʼéva hikuái?

• ¿Mbaʼéichapa nde ere oñeñandutaha Jehová ñapenáramo umi mbaʼe vai ojeʼévare hese térã iñorganisasiónre?

4. Esegíkena ndefiél Jehovápe peteĩ ermáno opekáramo jepe

¿Mbaʼépa jajapo vaʼerã jaikuaáramo peteĩ ermáno térã ermána opeka vaieterei hague? Jahechamína mbaʼépa heʼi vaʼekue Ñandejára ipuévlo Israélpe. Elee Levítico 5:1.

Ohechaukaháicha ko téxto, jaikuaáramo oĩ hague opeka vaíva ñamombeʼu vaʼerã umi ansianokuérape la jaikuaáva. Péro jajapo mboyve upéva, iporãta ñamokyreʼỹramo pe persónape haʼe voi oñeʼẽ hag̃ua umi ansiánondi. Ha oiméramo pe persóna noñeʼẽséi katu jahechauka vaʼerã ñandefielha Jehovápe ha lomímonte ñamombeʼu umi ansianokuérape la jaikuaáva. ¿Mbaʼérepa ikatu jaʼe upéva ohechaukataha jahayhuha:

• Jehovápe?

• pe persóna opeka vaʼekuépe?

• umi ermáno kongregasionguápe?

 5. Emboyketékena Babilonia Guasúpe

 RRESÚMEN

Ñandefiél hag̃ua Jehovápe ndajajeheʼái vaʼerã umi oheja vaʼekuére chupe. Avei ñamboykete vaʼerã opaite mbaʼe oúva umi rrelihión japúgui.

Rrepáso

• ¿Mbaʼérepa ñamboykete vaʼerã umi vidéo, lívro, térã oimeraẽ ótra kósa opuvlikáva umi apóstata?

• ¿Mbaʼéichapa jatrata vaʼerã umi ndahaʼesevéimavape testígo de Jehová?

• Heʼiháicha la Biblia, ¿mbaʼépa jajapo vaʼerã ñamboykete hag̃ua umi rrelihión japu?