NDÉPA reikuaa mbaʼéichapa héra pe kuimbaʼe imbaretevéva? Héra Sansón, peteĩ hués. Jehová omeʼẽ pe mbarete Sansónpe. Onase mboyvéma Sansón, Jehová heʼi isýpe: ‘Reguerekóta peteĩ mitã. Haʼe ogiáta Israélpe ojesalva hag̃ua umi filistéogui’.

Umi filistéo oiko Canaánpe ha iñaña hikuái. Oguereko heta soldádo, ha ojapo mbaʼe vai umi isrraelítare. Peteĩ árape, ohóvo Sansón umi filistéo oikohápe, osẽ peteĩ león kakuaa okororõ chupe. Péro Sansón ojuka pe león ipópente. Ha ojuka avei hetaiterei filistéo aña.

Upe rire Sansón ohayhu peteĩ kuña hérava Dalila. Umi líder filistéo heʼi káda uno omeʼẽtaha Dalílape 1.100 monéda de pláta heʼíramo chupekuéra mbaʼépa pe omombaretetéva Sansónpe. Dalila oipota pe pláta. Haʼe añetehápe ndahaʼéi Sansón amíga, ni ndahaʼéi Ñandejára puévlo amíga. Upévare pyʼỹi oporandu Sansónpe mbaʼéicha rupípa imbareteterei.

Ipahápe, Sansón omombeʼu Dalílape mbaʼéicha rupípa imbareteterei. Sansón heʼi: ‘Neʼĩra gueteri oñekytĩ chehegui che akãrague’. ‘Anasérõ guare Ñandejára cheporavovaʼekue oiko hag̃ua chehegui peteĩ siérvo espesiál, oñehenóiva nasaréo. Oñekytĩramo chehegui che akãrague, nachembaretemoʼãvéima.’

Oikuaávo Dalila upéva, omonge Sansónpe hapypaʼũme. Upéi ohenói peteĩ kuimbaʼe oikytĩ hag̃ua chugui iñakãrague. Opáyvo Sansón, naimbaretevéima. Upe jave oike umi filistéo ha ojagarra chupe. Oipeʼa chugui mokõive hesa, ha ojapo chugui peteĩ esklávo.

Peteĩ árape, umi filistéo ojapo peteĩ fiésta guasu oadora hag̃ua idiós Dagónpe, ha oguenohẽ hikuái kárselgui Sansónpe oñembohory hag̃ua hese. Upérõ g̃uarã, Sansón akãrague ipuku jeýma. Sansón heʼi pe mitãme ipógui oguerahávape: ‘Ehejamína tapoko umi kolúmna ko óga ojokóvare’. Upe jave Sansón oñemboʼe Jehovápe omombarete hag̃ua chupe, ha ojagarra umi kolúmna. Upéi osapukái: ‘Eheja tamano koʼã filisteokuéra ndive’. Oĩ 3.000 filistéo pe fiestahápe, ha omyañávo Sansón umi kolúmna, pe óga ou yvýpe ha ojukapaite koʼã hénte añáme.