1, 2. a) ¿Mbaʼérepa ikatu jaʼe Jehová imbaʼeporãitereiha ñanendive ohendúvo ñane ñemboʼe? b) ¿Mbaʼérepa iporã jaikuaa mbaʼépa heʼi la Biblia pe ñemboʼére?

KO UNIVÉRSO ningo tuichaiterei, ha ñane planéta michĩ raʼymi hovái. Jehová omañávo ñane planétare, ñande avei ñanemichĩ raʼymi chupe g̃uarã (Salmo 115:15; Isaías 40:15). Upéicharõ jepe, Salmo 145:18, 19 heʼi: “Jehová ndohejái umi hese ojeroviávape, umi persóna sinséramente oñemboʼévape chupe. Umi orrespetáva Ñandejárape, orresivi chugui umi mbaʼe oipotáva. Haʼekuéra ojerure jave ajúda, katuete haʼe ohendu ha osalva chupekuéra”. ¡Ajépa imbaʼeporãite Jehová! Haʼe ningo pe persóna Ipoderosovéva oĩva ko univérsope. Upéicharõ jepe, haʼe oipota ñañemoag̃ui hese ha ohenduseterei voi ñañemboʼe jave chupe. Enterovéva ningo ikatu ñañemboʼe Jehovápe, ha upéva haʼe peteĩ rregálo iporãitereíva omeʼẽva ñandéve haʼe.

² Péro Jehová ñanerendu hag̃ua, ñañemboʼe vaʼerã chupe haʼe oipotaháicha. ¿Mbaʼéichapa ñañemboʼe vaʼerã? Jahechamína mbaʼépa heʼi la Biblia.

3. ¿Mbaʼérepa reñemboʼe vaʼerã Jehovápe?

³ Jehová ningo oipota reñemboʼe chupe. ¿Mbaʼérepa jaʼe upéva? Eleemína Filipenses 4:6, 7. Epensamína ko téxto heʼívare. Pe okrea vaʼekue opa mbaʼe oĩva ko univérsope nderayhueterei ha oipota remombeʼu chupe umi mbaʼe reñandúva ha umi provléma erekóva.

4. ¿Mbaʼéichapa pe ñemboʼe nepytyvõta reñemoag̃uive hag̃ua Jehováre?

 ⁴ Reñemboʼéramo Jehovápe, reñemoag̃uivéta hese. Por ehémplo, mokõi persóna oñoamígova ningo pyʼỹinte oñeʼẽ oñondive, omombeʼu ojupe mbaʼépa opensa, mbaʼépa oñandu térã mbaʼépa oipyʼapy chupekuéra. Péicha ojokuaa porãve hikuái ha omombareteve iñamista. Upéicha avei oiko ñañemboʼe meméramo Jehovápe. La Biblia rupive Jehová omombeʼu ñandéve mbaʼépa opensa, mbaʼépa oñandu ha mbaʼépa ojapóta amo gotyove. Ha nde avei, pe ñemboʼe rupive ikatu remombeʼu chupe umi mbaʼe reñandu ha repensáva. Amáske reñemboʼe Jehovápe, reñemoag̃uivéta hese ha rehecháta chupe ne amígo teéicha (Santiago 4:8).

5. ¿Ohendúpa Ñandejára entéro ñemboʼe?

⁵ ¿Ohendúpa Ñandejára entéro ñemboʼe? Nahániri. La Biblia ohechauka porã proféta Isaías tiémpope Ñandejára heʼi hague umi israelítape: “Pesegíramo jepe heta  peñemboʼe, che nahendúi la pejéva, pórke peẽ hetaiterei héntepema pejuka” (Isaías 1:15). Upéicharõ, jajapórõ hína peteĩ mbaʼe Jehovápe ndogustáiva, haʼe nohendumoʼãi ñane ñemboʼe.

6. ¿Mbaʼérepa iñimportánte jajerovia Ñandejárare ha mbaʼéichapa jahechauka vaʼerã upéva?

⁶ Jaipotáramo Jehová ohendu ñane ñemboʼe, jajerovia vaʼerã hese (Marcos 11:24). Apóstol Pablo heʼi vaʼekue: “Ndajajeroviáirõ, Ñandejára ni mbaʼevéicharõ nañandeguerohorymoʼãi. Pe persóna oñemoag̃uíva hese oguerovia vaʼerã haʼe oexistiha ha omyengovia porãha umi oñehaʼãvape ipyʼaite guive oadora chupe” (Hebreos 11:6). Upéicharõ, ndahaʼéi vaʼerã jaʼénteva jajeroviaha Ñandejárare, síno ñaneñeʼẽrendu vaʼerã avei chupe káda día (elee Santiago 2:26).

7. a) ¿Mbaʼérepa tekotevẽ jahechauka ñaneumildeha ha jarrespetaha Jehovápe ñañemboʼe jave chupe? b) ¿Mbaʼéichapa jahechaukáta ñañemboʼeha ñande pyʼaite guive?

⁷ Ñañemboʼe jave jahechauka vaʼerã ñaneumildeha ha jarrespetaha Jehovápe. Ñamoĩ chupe reñeʼẽtaha peteĩ presidéntendi, ¿mbaʼéichapa reñeʼẽta chupe? Katuete rehechaukáta rerrespetaha chupe. Jehová ningo pe Todopoderóso ha upévare koʼytevéntema jahechauka vaʼerã ñaneumildeha ha jarrespetaha chupe (Génesis 17:1; Salmo 138:6). Ñañemboʼe jave ndovaléi jarrepetipánte umi mbaʼe jaʼéva, upéva rangue ñañemboʼe vaʼerã ñande pyʼaite guive (Mateo 6:7, 8).

8. ¿Mbaʼépa jajapo vaʼerã jajerure rire peteĩ mbaʼe Jehovápe?

⁸ Jajerure jave Jehovápe peteĩ mbaʼe, ñañehaʼã vaʼerã jajapo umi mbaʼe ohechaukáva jahupytyseha pe jajerure vaʼekue. Por ehémplo, jajeruréramo Jehovápe ohupytykami hag̃ua ñandéve ñane rembiʼurã káda día g̃uarã, naiporãmoʼãi jaguapýnte ñahaʼarõ haʼe omeʼẽ ñandéve la ñaikotevẽva, síno ñambaʼapo vaʼerã upearã (Mateo 6:11;  2 Tesalonicenses 3:10). Jajeruréramo Jehovápe ñanepytyvõ hag̃ua jaheja hag̃ua peteĩ mbaʼe naiporãiva, nañaokasionái vaʼerã umi situasión ikatútava ñandereity Satanás ñuhãme (Colosenses 3:5). Ñambohovaimína koʼág̃a umi pregúnta ñanepytyvõtava ñañemboʼe hag̃ua Jehovápe haʼe oipotaháicha.

9. ¿Mávape añoitépa ñañemboʼe vaʼerã ha máva rupivépa?

⁹ ¿Mávapepa ñañemboʼe vaʼerã? Jesús heʼi vaʼekue ñañemboʼe vaʼerãha ñande Ru oĩvape yvágape (Mateo 6:9). Jesús heʼi vaʼekue avei: “Che hína pe tape, pe añetegua ha pe oporomoingovéva. Che rupive añoite ikatu oñeg̃uahẽ pe Túa rendápe” (Juan 14:6). Upéicharõ ñañemboʼe vaʼerã Jehovápe añoite ha Jesús rupive. ¿Mbaʼépa heʼise ñañemboʼe vaʼerãha Jesús rupive? Jehová ohendu hag̃ua ñane ñemboʼe, jahechauka vaʼerã ñamombaʼeha pe autorida haʼe omeʼẽ vaʼekue Jesúspe. Jahecháma haguéicha, Jesús ou kuri ko yvy ape ári ñandesalva hag̃ua pekádo ha ñemanógui (Juan 3:16; Romanos 5:12). Jehová omoĩ avei Jesúspe Saserdóte Prinsipál ha Huésramo (Juan 5:22; Hebreos 6:20).

10. ¿Mbaʼéichapa ñañemoĩ vaʼerã ñañemboʼe hag̃ua?

¹⁰ ¿Mbaʼéichapa ñañemoĩ vaʼerã ñañemboʼe hag̃ua? Jehová ndeʼíri ñandéve tekotevẽha ñañesũ, ñañakãity térã ñañemboʼy ñañemboʼéta jave. La Biblia ñanemboʼe jahechaukánte vaʼerãha jarrespetaha Jehovápe (1 Crónicas 17:16; Nehemías 8:6; Daniel 6:10). Jehovápe g̃uarã la iñimportantevéva hína ñañemboʼe chupe ñande pyʼaite guive, ndahaʼéi mbaʼéichapa ñañemoĩ ñañemboʼe hag̃ua. Ikatu ñañemboʼe en vos álta térã ñande pyʼapýpente. Ikatu avei ñañemboʼe ñaime ñaimehápe ha oimeraẽ órape. Jehová katuete ñanerendúta, ñañemboʼéramo jepe chupe ñande pyʼapýpente (Nehemías 2:1-6).

11. ¿Mbaʼe mbaʼe rehepa ikatu ñañemboʼe?

 ¹¹ ¿Mbaʼe mbaʼe rehepa ikatu ñañemboʼe? Ikatu ñañemboʼe oimeraẽ mbaʼe Jehová oguerohorývare. La Biblia heʼi: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14). ¿Ikatúpa jajerure chupe peteĩ mbaʼe jaipotáva? Ikatu. Jehová ningo oipota jahecha chupe ñane amígoramo. Upévare ikatu ñamombeʼupaite chupe umi mbaʼe ñapensáva ha ñañandúva (Salmo 62:8). Jajerurekuaa chupe omeʼẽ hag̃ua ñandéve ijespíritu sánto jajapo hag̃ua pe iporãva (Lucas 11:13). Ikatu avei jajerure Jehovápe tañanepytyvõ jadesidi porã hag̃ua ha avei ñaaguanta hag̃ua peteĩ situasión ijetuʼúva hína ñandéve (Santiago 1:5). Jajerurekuaa avei chupe operdonami hag̃ua ñande pekádo (Efesios 1:3, 7). Ñañemboʼekuaa avei ñande rogayguakuérare térã umi ermáno ha ermána kongregasionpeguáre (Hechos 12:5; Colosenses 4:12).

12. ¿Mbaʼépa iñimportanteve vaʼerã ñandéve ñañemboʼe jave?

¹² ¿Mbaʼépa iñimportanteve vaʼerã ñandéve ñañemboʼe jave? Jehová ha hembipota. Jaagradese vaʼerã chupe ñande pyʼaite guive umi mbaʼe porã ojapóvare ñanderehehápe (1 Crónicas 29:10-13). Jesús omboʼe vaʼekue upéva idisipulokuérape, upévare ñande jaikuaa mbaʼéichapa ñañemboʼe vaʼerã (elee Mateo 6:9-13). Haʼe heʼi vaʼekue chupekuéra ojerure hag̃ua oñembotuicha térã oñemopotĩ hag̃ua Ñandejára réra. Upéi Jesús heʼi jajerure vaʼerãha tou Ñandejára Rréino ha ojejapo hag̃ua Ñandejára volunta ko yvy ape ári. Péicha Jesús ohechauka koʼã mbaʼe haʼeha pe iñimportantevéva ha ñañemboʼe vaʼerãha umívare, ha upéi ae jajerure umi mbaʼe ñaikotevẽva. Ñañemboʼéramo umi mbaʼe iñimportantevévare raẽve, jahechauka hína ñamombaʼeveha Jehovápe.

13. ¿Mboýpa odura vaʼerã ñane ñemboʼe?

 ¹³ ¿Mboýpa odura vaʼerã ñane ñemboʼe? La Biblia ndeʼíri mboýpa odura vaʼerã ñane ñemboʼe. Upéva odependéta káda situasiónre. Por ehémplo, ikatu ñañemboʼe mbykymínte jakaru mboyve. Péro ikatu hína ñañemboʼe pukumie jaagradeséta jave Jehovápe térã ñamombeʼúta jave chupe umi mbaʼe ñandepyʼapýva (1 Samuel 1:12, 15). Péro naiporãmoʼãi ñañemboʼe puku jajechaukaséguinte  ótrope. Jesús tiémpope oĩ vaʼekue ojapóva upéicha (Lucas 20:46, 47). Jehová ningo ndoguerohorýi umichagua ñemboʼe. Haʼe oipota ñañemboʼe ñande pyʼaite guive.

14. ¿Mboy vésepa ñañemboʼekuaa káda día, ha mbaʼépa ñanemboʼe upéva Jehovágui?

¹⁴ ¿Mboy vésepa ñañemboʼekuaa káda día? Jehová oipota pyʼỹi ñañemboʼe chupe. La Biblia heʼi voi “peñemboʼe meme”, “siémpre peñemboʼe”, ha “peñemboʼékena kontinuadoite” (Romanos 12:12; 1 Tesalonicenses 5:17; 1 Timoteo 5:5). Jehová siémpre oĩ ñanerendu hag̃uáicha. Káda día ikatu jaagradese chupe imbaʼeporã ha ñanderayhu haguére. Ikatu avei jajerure chupe tañandegia, tañanemombarete ha ñanembopyʼaguapy hag̃ua. Jaaprovecháramo oimeraẽ oportunida jarekóva ñañemboʼe hag̃ua Jehovápe, jahechaukáta hína ñamombaʼeha pe priviléhio omeʼẽva ñandéve.

15. ¿Mbaʼérepa jaʼe vaʼerã “amén” térã “taupéicha” ñañemboʼepa rire?

 ¹⁵ ¿Mbaʼérepa jaʼe vaʼerã “amén” térã “taupéicha” ñañemboʼepa rire? Jaʼévo upéicha jahechauka hína ñaimeha segúro umi mbaʼe jajerurévare ha ñañemboʼeha ñande pyʼaite guive (Salmo 41:13). La Biblia ohechauka avei ojejapopa rire peteĩ orasión iporãha jaʼe “amén”, tahaʼe ñande pyʼapýpe térã en vos álta, péicha jahechauka ñaimeha de akuérdo umi mbaʼe ojeʼévare (1 Crónicas 16:36; 1 Corintios 14:16).

16. ¿Ohendúpa Ñandejára ñane ñemboʼe?

¹⁶ ¿Ohendúpa Ñandejára ñane ñemboʼe? Si ohendu. La Biblia heʼi voi: “Ñandejára, nde ningo rehendu umi hénte ñemboʼe” (Salmo 65:2). Oĩramo jepe hetaiterei hénte oñemboʼéva chupe, Jehová ohendu ha okontesta umi persóna ipyʼaporãva ñemboʼe ha ojapo upéva heta hendáicha.

17. ¿Mbaʼéichapa Jehová ikatu ojevale umi ánhel ha ermanokuérare okontesta hag̃ua ñandéve ñane ñemboʼe?

¹⁷ Jehová ikatu ojevale umi ánhel térã umi oservívare chupe ikatu hag̃uáicha okontesta ñane ñemboʼe (Hebreos 1:13, 14). Oĩ ningo heta ehémplo ohechaukáva Jehová ohenduha ñane ñemboʼe. Sapyʼánte umi hénte ojerure Ñandejárape oipytyvõmi hag̃ua chupe ontende hag̃ua la Biblia, ha upe riremínte og̃uahẽ hógape peteĩ testígo de Jehová. La Biblia ohechauka voi umi ánhel oipytyvõha hína ojekuaauka hag̃ua umi notísia porã ko múndo tuichakuére (elee Apocalipsis 14:6). Sapyʼánte ñande voi ñañemboʼe Jehovápe peteĩ provléma jarekóvare térã peteĩ mbaʼe ñaikotevẽvare, ha upe riremínte algún ermáno térã ermána ñanepytyvõ (Proverbios 12:25; Santiago 2:16).

18. ¿Mbaʼéichapa Jehová oipuru ijespíritu sánto ha la Biblia okontesta hag̃ua ñandéve ñane ñemboʼe?

 ¹⁸ Jehová oipuru avei ijespíritu sánto okontesta hag̃ua ñandéve ñane ñemboʼe. Por ehémplo, jajeruréramo chupe ñanepytyvõ hag̃ua jareko jave peteĩ provléma, haʼe ikatu hína ñandegia ha ñanemombarete ijespíritu sánto rupive (2 Corintios 4:7). Jehová oipuru avei la Biblia okontesta hag̃ua ñandéve ñane ñemboʼe ha ñanepytyvõ hag̃ua jadesidi porã hag̃ua. Jalee jave la Biblia ikatu hína jatopa peteĩ téxto ñanepytyvõtava. Jehová ikatu avei omomýi peteĩ ermánope okomenta hag̃ua rreunionhápe peteĩ mbaʼe ñaikotevẽva upe moméntope, térã omomýi peteĩ ansiánope omeʼẽ hag̃ua ñandéve peteĩ konsého ñaikotevẽva (Gálatas 6:1).

19. ¿Mbaʼérepa sapyʼánte ikatu ñapensa Jehová nokontestaiha ñandéve ñane ñemboʼe?

¹⁹ Péro sapyʼánte ikatu ñañeporandu: “¿Mbaʼérepa oiméne Jehová nokontestáima chéve la che ñemboʼe?”. Upéicha jave, ñanemanduʼa vaʼerã haʼe oikuaa porãha mbaʼe moméntopepa ha mbaʼéichapa ombohováita ñandéve ñane ñemboʼe. Haʼe oikuaa porã mbaʼépa ñande ñaikotevẽ. Ñande jasegínte vaʼerã ñañemboʼe upe jaipotávare, upéicha jahechauka hína añetehápe ñaikotevẽha upe jajeruréva chupe ha jajeroviaha hese (Lucas 11:5-10). Sapyʼánte Jehová ikatu okontesta ñandéve ñane orasión ñande ñahaʼarõʼỹháicha. Por ehémplo, ñamombeʼu jave chupe peteĩ mbaʼe ijetuʼúva jahasáva, haʼe ikatu hína nosolusionái ñandéve pe provléma jarekóva, péro ikatu ñanemombarete ñaaguanta hag̃ua (elee Filipenses 4:13).

20. ¿Mbaʼérepa ñañemboʼe meme vaʼerã Jehovápe?

²⁰ ¡Ajépa iporãite pe priviléhio jarekóva! Ñande ikatu ñañemboʼe Jehovápe ha haʼe ohendu ñane ñemboʼe (Salmo 145:18). Ñañemboʼe meméramo Jehovápe ñande pyʼaite guive, káda día ñañemoag̃uivéta hese.