KAPÍTULO 37

Mbaʼére piko ndaikatúi ajedivertiʼimi?

Peteĩ mitãkuña Australiaygua hérava Allison ndohoseiete voi koléhiope luneskue.

Haʼe omombeʼu: “Che kompañerakuéra ijuru renyhẽ omombeʼu fín de semana oho hague ofarrea, oñohetũ una partída mitãrusúndi ha polisíagui jepe okañy hague... Ere eréango ojapo hikuái! Hiʼarive koʼẽmbotávo og̃uahẽ ramo ohóvo hógape, ha ituvakuéra mbaʼevete asy ndeʼíri. Chéngo ku ryguasúicha pytũ ha añenóma, haʼekuéra katu ojeprepara ramo osẽ hag̃ua.

“Ha ndahaʼéi upévante, upéi oporandúma chéve mbaʼépa ajapo. Ha mbaʼe guaʼu la che haʼétava; aha hague rreunionhápe ha asẽ hague apredika? Kaigueróngo la che fín de semana! Upévare haʼénte chupekuéra ndajapói hague mbaʼeve. Ha upépe katu heʼi hikuái: ‘Ha mbaʼére piko nderehóiraʼe orendive?’.

“Péro ndacheládoi voi. Martes guive omombeʼujoáma hikuái mbaʼépa ojapóta ótro fín de semana. Ha mbaʼéiko hembyve chéve, aguapýmante ajapysaka hesekuéra. Ndaigustoveietémango!”

 OIKÓMAPA avei nderehe upéva? Upéicharõ oiméne repensa nde tuvakuéra nderekoha préso ha ndoipotaiha rejediverti. Haʼete ku reĩva párkepe ha mombyrymínte reguapýva remaña asy mbaʼéichapa umi ótro ojediverti. Ikatu ere: “Ndahaʼéiko ajaposéva che kompañerokuéra ojapóva, chéngo ajedivertisénte avei sapyʼapyʼa jepe”. Pór ehémplo, mbaʼépa rejapose ko fín de semana? Rehosépa...

□ Rejeroky

□ Konsiertohápe

□ Ambue hendápe

□ Peteĩ fiestítape

□ Sinehápe ․․․․․

Ndaivaíri ningo rejedivertise, Ñandejára oipota voi mitãrusukuéra ovyʼa (Eclesiastés 3:1, 4). Ha nderegueroviaséiramo jepe nde ru ha nde sy upéichante avei. Péro katuete oikuaaséta: 1) moõpa reho ha 2) mávandipa reho.

Ñamoĩ chupe ne amigokuéra neinvitaha pesẽ hag̃ua, péro ndereikuaaporãi ogustánepa nde tuvakuérape. Péicha jave oĩ mbohapy mbaʼe ikatúva rejapo, péro ehechami mavaitévapa okonvenive ndéve.

PETEĨHA REHÓNTEMA: PERMISOʼỸRE

Mbaʼérepa rejapo: Rehechaukase ne amigokuérape rejapoha rejaposéva. Ndoʼúi ni ndohói ndéve la nde tuvakuéra opensáva, térã katu reimoʼã haʼekuéra heʼíva vyroreinteha (Proverbios 14:18).

Mbaʼépa oikóta: Ikatu ne amigokuéra ndeguerohoryve, péro avei ohechakuaáta ndaikatuiha ojerovia nderehe. Heʼíta hikuái: “Ituvakuérape jepe ombotavy, ha piko mbaʼe la ñande?”. Nde tuvakuéra katu oñeñandu vaíta ág̃a oikuaa vove ha ikatu voi heta tiémpore nanemopermisovéi. Jaʼe  porãsérõ g̃uarã, ndevyroitereítama resẽramo kañyháme (Proverbios 12:15).

MOKÕIHA: NDEREHÓINTE MAMOVE

Mbaʼérepa rejapo: Reikuaa ne kompañerokuéra ojapotaha peteĩ mbaʼe oñemoĩva la Biblia heʼívare, térã rehechakuaa ndovaleiha rejeheʼa hesekuéra, upévare repytánte nde rógape (1 Corintios 15:33; Filipenses 4:8). Ikatu oime rehoseterei avei, péro nereñanimái rejerure permíso.

Mbaʼépa oikóta: Nderehóiramo reikuaágui ivaitaha ne kompañerokuéra ojapóva, ndahasymoʼãi ndéve ere hag̃ua chupekuéra repytatanteha. Péro nderehóiramo rekyhyjégui rejerure hag̃ua permíso, upe rire repytáta reñembyasy neresẽi haguére hendivekuéra ha repensáta nde añoite ndaikatuiha rejediverti.

MBOHAPYHA: REJERURE PERMÍSO

Mbaʼérepa rejapo: Reikuaa nde ru ha nde sy omandaha nderehe ha remombaʼe haʼekuéra heʼíva (Colosenses 3:20). Rehayhu chupekuéra ha pono oñeñandu vai, ni mbaʼevéicharõ neresẽmoʼãi permisoʼỹre (Proverbios 10:1). Avei reikuaa rejerurese vove permíso, ikatutaha reñemongeta porã hendivekuéra.

Mbaʼépa oikóta: Nde tuvakuéra ohechakuaáta rehayhu  ha remombaʼeha chupekuéra. Ha omeʼẽta ndéve permíso ndaivaírima guive upe rejeruréva.

Sapyʼánte nanepermisomoʼãi

Ha nomeʼẽiramo ndéve permíso? Ñepyrũrã ikatu reñeñandu vaieterei ha rerrenega voi hesekuéra. Péro ani hag̃ua repyta reñamarga, reñehaʼãvaʼerã reñemoĩ ilugarpekuéra. Jahechami mbaʼérepa sapyʼánte ikatu nomeʼẽi ndéve permíso.

Oikuaa rupi hetave mbaʼe. Rehóramo rejahu rríope, katuete reñeñandu porãta oĩramo peteĩ oytakuaáva ha ojesareko mimíva nderehe. Reikuaa porã haʼe ohechaha umi pelígro oĩva nde jerére ha heʼitaha ndéve moõpa ndovaléi reike.

Péicha avei nde tuvakuéra oñangareko nderehe. Haʼekuéra heta mbaʼéma ohasa ha oikuaa porã mbaʼe pelígropa oĩ ha mbaʼéichapa ikatu rejehekýi umívagui. Jaʼe porãsérõ g̃uarã, haʼekuéra ohejáta reike “rejahu pe rríope”, péro hakateʼỹgui nderehe ndohejamoʼãi reho ipeligrosohápe.

Nderayhu rupi. Upévare oñangarekose nderehe. Haʼekuéra oikuaa omeʼẽramo ndéve permíso ha upéi oikóramo nderehe ivaíva, opytataha oñeñandu vaieterei ha ikatu voi heʼi ikáusare oiko hague. Upéicha rupi heta vése ohejáta resẽ, péro oĩ vése ndohejamoʼãimante ndéve reho. Péro ohecháramo ndaiporiha mbaʼeve ikatúva ndeapeligra, haʼekuéra naiprovlemamoʼãi nemopermíso hag̃ua.

 Mbaʼépa rejapokuaa nepermisove hag̃ua

Ehechami koʼã konsého:

Ani ndejapu. Mbaʼérepa añetehápe rehose? Reikuaágui revyʼataha, térãpa repyta porãséguinte umi ne amígondi? Noiméipa ohóta hína peteĩ ndegusta léntova? Emombeʼu porãkena nde tuvakuérape mbaʼérepa rehose. Haʼekuéra ndekuaa porãiterei ha imitãvaʼekue avei, upévare hasy rembotavy hag̃ua chupekuéra. Nandejapúiramo, nde tuvakuéra ovyʼáta ha omeʼẽta ndéve heta konsého nepytyvõtava ani hag̃ua rejapo mbaʼeve ivaíva (Proverbios 7:1, 2). Péro opilla sapyʼárõ rembotavyseha chupekuéra,  ndojeroviamoʼãvéima nderehe, ha nomeʼẽmoʼãvéima ndéve permíso péicha péichante.

Eporandu opyta porãve vove chupekuéra. Reñemongeta rangue nde tuvakuérandi og̃uahẽmírente itravahohágui térã hembiapoiterei jave, ehaʼarõnte taitrankílo porã hikuái ha upépe ae eñemboja ejerure hag̃ua permíso. Péro ani reheja avei última órape g̃uarã, remboapura vaipáramo chupekuéra neresẽporãmoʼãi. Voi porã rejeruréramo katu itiempovéta hikuái opensa hag̃ua.

Emombeʼu porã upe rejapótava. Resẽta jave, nde tuvakuéra oikuaaséta máva mávapa ohóta, oĩtapa peteĩ kakuaa térã mbaʼe órapa reju jeýta. Péicha jave remombeʼu porã vaʼerã chupekuéra umi mbaʼe oikuaaséva, ha ani ere: “Ndaikuaáingo che”. Rejapóramo péicha katuete resẽ vaíta.

Ani reñemborretovádo. Nde tuvakuéra heʼi jave ndéve ndaikatuiha reho ani rembohovái: “Mbaʼéicha piko umi ótrope ituvakuéra omeʼẽ permíso?”, “Arakaʼe piko la pejeroviamíta cherehe?” térã “Che jeýma la ndahamoʼãiva”. Péicha eréramo, ótra vuéltape noñemongetasemoʼãvéima nendive. Péro rehechaukáramo neakãguapyha ha rerrespetaha haʼekuéra odesidíva, nemombaʼevéta ha nerenduséta avei. Ha ág̃a ótrope ikatúma nepermíso resẽ hag̃ua.

RETOPAVÉTA INFORMASIÓN VOLÚMEN 2, KAPÍTULO 32-PE

TÉYSTO OĨVA LA BÍBLIAPE

“Nearandúke che raʼy, upéva chembovyʼa.” (Proverbios 27:11)

PETEĨ KONSÉHO

Rehótaramo peteĩ fiestítape, tekotevẽ reikuaa mbaʼépa rejapóta oikórõ peteĩ mbaʼe noĩporãiva, ani hag̃ua repyta reñembyasy upe rire nderejapói haguére mbaʼeve rejei hag̃ua upégui.

REIKUAÁPARAʼE?

Nde tuvakuéra oñangarekose nderehe. Upévare nomeʼẽmoʼãi ndéve permíso neremombeʼuporãirõ upe rejaposéva, térã opillárõ remokañyseha chuguikuéra peteĩ mbaʼe.

UMI MBAʼE AJAPÓTAVA!

Mbaʼépa ajapóta aĩramo sinehápe térã peteĩ fiestítape ha ojehechauka térã oiko peteĩ mbaʼe noĩporãiva? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa heta mitãrusu oñomise ituvakuéragui umi mbaʼe ojapótava?

● Mbaʼépa ikatu oiko nderehe rejapóramo avei upéicha?

[Komentário oĩva páhina 268-pe]

“Chemitãrusúpe ajapo heta vyrorei aimoʼãgui péicha ajedivertiha, péro koʼág̃a ahechakuaa tuicha ajavy hague. Apenárire che tuvakuérare, ajeivaʼerãmoʼã heta akãrasýgui”. (Fabio)

[Taʼanga oĩva páhina 269-pe]

Nde tuvakuéra ohecha ha oikuaa umi pelígro oĩva nde jerére, upévare oñangarekose nderehe