Umi ermáno oikóva Rómape ohendúvo Pablo ouha hína upépe, algúno oho ohug̃uaitĩ chupe ha upearã oviaha voi 64 kilómetrorupi. ¿Mbaʼéichapa Pablo oñeñandu oikuaávo umi sakrifísio ojapóva umi ermáno ohayhúgui chupe? La Biblia heʼi: “Ohechávo chupekuéra, Pablo ikyreʼỹ jey ha oagradese Ñandejárape” (Hch 28:15). Normálmente ningo Pablo la omokyreʼỹva umi ermánope, péro upérõ haʼe la oikotevẽva kuri ánimo oĩ rupi préso (2Co 13:10).

Koʼág̃arupi umi superintendénte de sirkuíto ovisita avei umi kongregasión omokyreʼỹ hag̃ua ermanokuérape. Péro sapyʼánte ñandéicha avei haʼekuéra ikatu ikaneʼõ, ojepyʼapy térã oñedesanima. ¿Mbaʼéichapa ikatu ñamokyreʼỹ umi superintendénte ha hembirekópe ovisita jave ñane kongregasión? (Ro 1:11, 12).

• Jaapoja pe enkuéntro ojejapóva predikasionrã. Pe superintendéntepe ningo omokyreʼỹeterei ohechávo umi sakrifísio jajapóva jaapoja hag̃ua pe semána espesiál (1Te 1:2, 3; 2:20). Eñehaʼãna ejapo nde prekursorádo auxiliár pe visíta jave. Ikatu avei ejapo arréglo esẽ hag̃ua epredika pe superintendénte térã hembirekóndi, térã eho hag̃ua ejapo nde estúdio hendivekuéra. Haʼekuéra ovyʼaiterei osẽramo opredika diferénte puvlikadór ndive, tahaʼe jepe raʼe ipyahúva térã opensáva ijehe ndopredikakuaaiha.

• Jarresivi porã chupekuéra. Ikatu jaaloha chupekuéra ñande rógape térã ñainvita chupekuéra okaru hag̃ua ñanendive. Péicha ikatu hína jahechauka jahayhuha pe superintendénte ha hembirekópe. Haʼekuéra nohaʼarõi voi japrepara hetaiterei mbaʼe jahasa porã hag̃ua hendivekuéra (Lu 10:38-42).

• Ñahendu umi konsého omeʼẽva ñandéve ha ñañehaʼã jajapo. Pe superintendénte de sirkuíto ningo mborayhúpe ñanepytyvõ jaservi porãve hag̃ua Jehovápe, ha sapyʼánte tekotevẽta avei oñemoñeʼẽ mbareteʼimi ñandéve (1Co 5:1-5). Ñaneñeʼẽrendu ha jaaseptáramo umi konsého, vyʼápe ojapóta pe hembiapo (Heb 13:17).

• Ehechauka emombaʼeha chupekuéra. Emombeʼu pe superintendénte ha hembirekópe mbaʼéichapa ideprovécho ndéve la ivisíta. Ikatu ere voi chupekuéra térã ejapo peteĩ kárta (Col 3:15).