¡PIIRAKAA sümüin tü anuakat emerotusü otta ojuichijaasü shia! ¿Piʼrüin na wayuu shirokukana tü palaakat? Eeshii eeka nantüin sotpaʼamüin. ¿Yalashi Pablo namaa? Wekirajaa sünain tü alatakat.

Soto paaʼin püreesain Pablo piama juya chaaʼaya Cesarea. Mapa nümaanaka suluʼu wanee anua Romamüin namaa wanee püreesashii. Eejaaka wanee wawai miyoʼushaata maʼin süʼütpaʼa tü mmakat Creta. Isasü nachiki na wayuukana noʼunirüin tü anuakat. Nnojoishi neʼrüin chi Kaʼikai otta tü jolotsükalüirua. Mapa ouktajanayaa na wayuukana naashin.

Nütamaaka Pablo, nümaka: ‹Nnojoleerü jaralüin ouktuin jaʼakajee; shieerü amülouika tü anuakat. Eeʼiyataashi aipaʼainka tamüin wanee aapiee, nümaka: «Pablo, nnojo mmoluin pia anteechi pia nünainmüin César, chi aluwataaikai Roma. Kateena oʼu nutuma Maleiwa na wayuu pümaakana»›.

14 kaʼi süchikijee shiʼitüin tü juyakat nayaawataka na anuapuʼukana nnojoluin oʼutuin maʼin tü palaakat. Nojutaka tü karapinkat süka mmoluin naya seema noʼonojiraain sümaa ipa sutuma tü piyuushikat. Waneemüin kaʼi neʼraka wanee mma, noʼuniraka tü anuakat chamüin.

Narütkaapa sotpaʼamüin tü palaakat, soʼotooka tü anuakat saaʼu wanee jasai, eere sütükaain otta sujuichijaain sutuma sütchin tü palaakat. Nümaka chi sülaülashikai surulaat: ‹Katüna jia sotpaʼamüin tü palaakat otta na wanee noʼuna süka saʼata tü anuakat›. Naainjaka tia, kataka noʼu na 276 wayuu suluʼujanakana tü anuakat maʼaka nüküjüin chi aapieekai.

Malta sünülia tü mmakat eere nantüin. Kamaneeshii maʼin na wayuukana chaaʼaya, nakaaliinjüin na suluʼujanakana tü anuakat. Sajaʼttapa tü juyakat, oʼunushi Pablo suluʼu wanee anua süpüla niʼikajaanüin Romamüin.