AYATÜSHII mojulaain na wayuu nnojoliikana suluʼuin tü anuakat, nnojotsü nanoujuin shiʼitüinjatüin wanee juya miyoʼushaata. Asirajüshii neʼe naya, mapa ooʼulaashii suulia asirajaa.

Aʼita müsüjaʼa tü juyakat maʼaka saaʼin wanee wüin eeka keenain suluʼujee wanee iita miyoʼu. ¡Shiimain tü nüküjakat Noé! Akatsaʼa nnojoluipa süpüla shikerotuin wayuu suluʼu tü anuakat süka nüsürülüipain shia Maleiwa.

Mapa piratüsü wüin tü mmakat, müsü aka saaʼin süchi eeka miyoʼuin maʼin, sujuttirüin tü wunuʼuliakalüirua, sülüʼüjüin ipa eeka miyoʼuyuuin otta kepisanasü maʼin shia. Ainkuusü naaʼin na wayuukana sutuma, makalaka noʼotooin eere yaletuulin. ¡Mojukajasa maʼin naaʼin süka nnojoluin noonooin nümüin Noé otta süka nnojoluin nekerotuin suluʼu tü anuakat! Akatsaʼa nnojoluipa süpüla naainjüin tia.

Ayatüsü miyoʼuin maʼin tü juyakat, aʼitüsü soʼu 40 kaʼi otta 40 ai. Siraasü tü wüinkat sümaa tü uuchikat. Maʼaka nüküjüin Maleiwa napüshuaʼa na wayuukana otta na mürütkana ouktushii, akanasaʼa na suluʼukana tü anuakat katüsü noʼu.

Anasü maʼin sukumajia tü anuakat nutuma Noé otta na nüchonniikana süka samatüin shia shiroku tü wüinkat. Shiasaʼa soʼu wanee kaʼi shiyüʼülaapa tü juyakat, ayuʼlaashi chi Kaʼikai. Shia neʼe eejatka samatüin tü anuakat shiroku tü wüinkat.

Nnojoluinnapa eein na wayuu miyoʼuyuushaatakana. Nnojoluinjana eitaain nachikuaʼa süpüla namojujuin nakuwaʼipa na wayuukana. Ouktushii naya sümaa tü neikat otta na wanee wayuu mojulaashiikana. ¿Kasa alataka namüin na nashikana?

Nashi na wayuu miyoʼuyuushaatakana nnojoishii wayuuin maʼaka waaʼin wayakana. Aapiee naya, ashakatüshii iipünaajee süpüla wayuuyaain naya. Wanaa sümaa shiʼitüin tü juya miyoʼushaatakat nnojoishii ouktuin maʼaka naaʼin na wanee wayuukana. Eitaashii naya iipünaamüin, nnojoluinnapa wayuuyaain. Nnojoluinnapa naya napüshin na aapiee nümaajanakana Maleiwa. Nümaainnapa naya Satanás otta yolujaa nanülia saashin tü Wiwüliakat.

Nuwawalüin Maleiwa wanee jouktai süpüla süshakajüin tü wüinkat. Jaʼrai kashi süchikijee atükaasü tü anuakat saaʼu wanee uuchi, mapa na suluʼujanakana tü anuakat neʼrüin sümüna tü uuchikalüirua. Ayatüsü ayoolujuin tü wüinkat.

Mapa nüjütaka Noé wanee wüchii mütsiiyatai. Aleʼejüshi nüchikuaʼa süka nnojoluin nuusütüin eeinjachire nuʼttuin.

Nütüjawee aaʼu Noé josole tü mmakat, makalaka nüjütüin wanee toomasü, shiitaaka süchikuaʼa süka nnojoluin suusütüin eeinjatüle suʼttuin, nüjütaka shia Noé piantua süleʼejaka sümaa süpana wanee wunuʼu. Nüjütaka shia süchikuaʼa nnojotka süleʼejüin süka josoipain tü mmakat.

Nümaka Jeʼwaa nümüin Noé: ‹Pujuʼita suluʼujee tü anuakat namaa püpüshi otta na mürütkana›. Alatüsü suulia wanee juya suluʼuin naya tü anuakat. ¡Talatakajasa maʼin naya süka katüin noʼu otta süka nojuʼitüinapain suluʼujee tü anuakat!