ODHEAI 17
Jezuk Kosle Gunn Asat?
Prithumer astana Jezun koslim kamam kelʼlim tea vixim ami xiktat tednam taka kosle gunn asat tem amkam kollon ieta. Oxem kelʼlean, ami taka ani Jehovak lagim soronk pavtat. Tor, Jezuk kosle gunn asat ani ami te gunn amchea jivitant koxe apnnaunk zatat tem polloum-ia.
1. Jezu aplea Bapai sarko oxem ami kiteak mhunnonk zata?
Jezu prithumer ieunchea adim kottʼtteamnim vorsam aplea Bapai sangata sorgar aslo. Thoim to tachea koddlean zaitem xiklo. Tor, Jezuk aplea Bapai sarkinch chintnam ani bhavnam asat, ani to aplea Bapai sarkoch vagta. (Juanv 5:19 vachat.) Taka lagon tannem mhunnttlem: “Zannem mhaka polloila tannem Bapakui polloila.” (Juanv 14:9) Zoxim tumi Jezuche gunn zannam zatolim toxim tumi tachea Bapaik, Jehova Devak anik vollkhonk pavtolim. Udharonnak, Jezun jea toren lokank doia dakhoili tantuntlean Jehova amchi kitli doia korta tem kollon ieta.
2. Jezu Jehovacho khub mog korta mhunn koxem dison ieta?
Jezun mhunnttlem: “Hanv Bapacho mog kortam hem sonvsarak kollchem mhunn, Bapan mhaka adnea dilea toxench hanv kortam.” (Juanv 14:31) Prithumer astana kotthin poristhitint pasun Jezun Devachi adnea pallʼlli. Jezuk aplea Bapai vixim ulounk khub borem distalem taka lagon to dusreank tachea vixim xikoitalo ani tachea lagim ixttagot korunk tankam modot kortalo. (Juanv 14:23) Tor, hantuntlean to aplea Bapaicho khub mog korta mhunn dison ieta.
3. Jezu lokancho khub mog korta mhunn koxem kollon ieta?
Bible sangta, Jezuk ‘munxakullacho khub mog asa.’ (Mhonnʼnneo 8:31) To lokank modot korunk sodanch toiar aslo. Tannem kelʼlea vizmitam vorvim fokot tachi xokti nhoi, punn lokam pasot tachi doia pasun dison ieta. (Marku 1:40-42) To sogleam lagim mogan vagtalo ani bhed-bhav korinaslo. Jezuchea utrantlean khaltea kallzachea lokank bhuzvonn ani bhorvonso mellʼllo. Jezu lokancho mog kortalo dekhun to tanche pasot tras sosun moronk pasun toiar zalo. To aiz pasun lokancho mog korta punn aple xikounne pormonnem choltat tancho to chodd mog korta.—Juanv 15:13, 14 vachat.
KHOLAIEN XIKAT
Jezuk anik kosle gunn asat tem zannam zaiat. Toxench, Jezu bhaxen ami mog ani udarponn koxem dakhounk zata tem-ui polloiat.
4. Jezu aplea Bapaicho khub mog korta
Jezuchea udharonnantlean ami Devacho mog koso korunk zai tem amkam xikonk melltta. Lukas 6:12 ani Juanv 15:10; 17:26 vachat. Dor ek vers vachun sokol dilʼlea prosnacho zobab zannam zaum-ia:
-
Ami Jezu bhaxen Jehovacho mog kortat mhunn koxim dakhoitolim?
Jezu aplea sorginchea Bapaicho khub mog kortalo ani sodanch magnnea vorvim tachea lagim uloitalo
5. Jezuk lokanchi porva asa
Jezuk aplea poros dusreanchi chodd porva asli. Thoklolo astana pasun tannem dusreank modot korunk vell kaddlo. Marku 6:30-44 vachun sokol dilʼlea prosnanche zobab zannam zaum-ia:
-
Hea versamnim Jezuk dusreanchi porva asli mhunn koxem kollon ieta?—Vers 31, 34, 41, ani 42 polloiat.
-
Jezu lokank modot korunk kiteak fuddem sorlo?—Vers 34 polloiat.
-
Jezu lokam kodden jea ritin vaglo tantuntlean amkam Jehova vixim kitem xikonk melltta?
-
Jezuchi dekh gheun ami dusreanchi porva koxi korunk zata?
6. Jezu udar kallzacho
Jezu lagim chodd vostu nasleo, tori astana to udar kallzacho aslo. Dusreank adar korunk to kednanch fatti soronk na. Ami pasun toxench korunk zai mhunn tannem amkam xikoilam. Itihas 20:35 vachun sokol dilʼlea prosnacho zobab zannam zaum-ia:
-
Kitem kelear amkam khuxalkai mellttoli mhunn Jezun sanglem?
VIDEO polloun sokol dilʼlea prosnacho zobab zannam zaum-ia:
-
Amchea lagim chodd vostu na zalear pasun ami dusreank kitem diunk zata?
Tumi zannant?
Ami Jezuchea nanvan Jehova lagim magnnem korunk zai mhunn Bible amkam xikoita. (Juanv 16:23, 24 vachat.) Jehovak lagim soronk Jezun amkam khub modot kelea. Tor ami Jezuchea nanvan magnnem kortat tednam tachim kitlim upkari asat tem dakhoitat.
THODDO LOK MHUNNTTA: “Amcher borem ani vaitt Devuch dhaddtta.”
-
Ami Jezuk bore toren vollkhotat tednam Dev amcher vaitt dhaddunk xokona mhunn ami koxim zannam zatolim?
KITEM XIKLIM
Jezu, Jehovacho ani amcho khub mog korta. Jezuk aplea Bapa sarkech gunn asat. Tor, jitlim ami Jezu vixim xiktolim titlim ami Jehovak anik bore toren vollkhonk pavtolim.
Porot Ugddas Korum-ia
-
Jezun Jehovacho mog kelo tosoch ami pasun koso korunk zata?
-
Jezun lokancho mog kelo toso ami pasun koso korunk zata?
-
Jezucho khoincho gunn tumkam chodd avoddlo?
ANIK SODHAT
Ami Jezuche khoinche gunn apnnaunk zatat tem polloum-ia.
“Jezuchi Dekh Gheunk He Gunn Apnnaiat . . .” (Jesus—The Way, the Truth, the Life, page 317)
Ami magnnem kortana Jezuchea nanvan korop kiteak gorjechem tem zannam zaiat.
“Ami Jezuchea Nanvan Kiteak Magnnem Korunk Zai?” (The Watchtower, February 1, 2008)
Jezu koso distalo hea vixim Bible kitem sangta?
Jezu bailam lagim jea toren vaglo tantuntlean amkam kitem xikonk melltta?
“Jezun Bailank Koso Mog Ani Resped Dakhoilo?” (The Watchtower, September 1, 2012)
Tumkam Hem-ui Avoddttolem
ZAITE PAVTT VINCHARLOLE PROSN
Jehovachim Sakxim Bible xikonk koxim modot kortat?
Jehovachea Sakxeamnim Bible xikonk ji funkott manddavoll kelʼli asa tantunt tumi Bible-achem khoinchem-i bhaxantor uzar korunk zata. Tumchea ghorcheank vo ixttank tumchea sangata Bible xikonk apounk fattim soronakat.
