ODHEAI 21
Bori Khobor Koxi Porgott Zata?
Beginuch Jehova Dev aple Razvottke udexim amche sogle tras kaddun uddoitolo. Hi bori khobor dusreank sangonk tumkam avoddttolem nhoi! Jezun aplea pattlavdarank hi khobor sogleank sangat mhunn adnea dilʼli! (Matev 28:19, 20) Jezun dilʼli hi adnea Jehovachim Sakxi koxim pallttat?
1. Matev 24:14-ant sanglam tem aiz koxem purnn zata?
Jezun mhunnttlem: “Rajeachi bori khobor akʼkhea sonvsarant porgott zatoli.” (Matev 24:14) Hea porgottnnechea kamant bhag gheunk Jehovachim Sakxi khuxen fuddem sortat. Hi bori khobor ami sonvsarbhor 1,000 poros chodd bhasamnim porgott kortat. Itlea vhodd promannan cholta tem kam korunk bori manddavoll asop gorjechem. Toxench, hea kamant zaito vell ghalunk poddtta ani zaito vavr korcho poddtta. Hem kam fokot Jehovachea adaranuch zaunk pavta.
2. Lokank porgott korunk ami kitem kortat?
Lokank porgott korunk ami poilea xekddeantlea Kristanvam bhaxen “ghoran-ghor” voitat. (Itihas 5:42) Hea toren ami dor vorsa lakʼkhamnim lokank porgott korunk pavtat. Thodde pavtt lok amkam ghoramnim mellona dekhun ami dusreo vatto uzar korun pasun porgottnni kortat. Jehova Deva vixim ani to fuddarak kitem korcho asa tea vixim dusreank sangonk, ami mellttat titleo-i sondhi uzar kortat.
3. Bori khobor konnem porgottunk zai?
Bori khobor porgott korop dor eka khorea Kristanvachi zobabdari zaun asa. Devan dilʼli hi zobabdari ami purnn kallzan pallttat. Hem kam korunk ami khub vavurtat karonn lokancho jiv dhokeant asa mhunn ami zannant. (1 Timotak 4:16 vachat.) Hem kam korunk amkam poixe mellonant. Bible sangta: “Tumkam funkott mellʼllam, tumi-i funkott diat.” (Matev 10:7, 8) Ami porgottʼttat tednam soglinch amchem aikotat oxem nhoi, tori astana ami porgott korchem bond korinant. Karonn hem kam amchea bhoktecho bhag zaun asa ani ami hem kam kelʼlem Jehovak zai.
KHOLAIEN XIKAT
Akʼkhea sonvsarant porgottnni korunk Jehovachim Sakxi kitlo vavr kortat tem zannam zaiat ani hem kam korunk Jehova tankam koso modot korta tem-ui polloiat.
Sonvsarbhor porgottnnechem kam: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Sogleank porgott korunk ami zaito vavr kortat
Jehovachim Sakxi soglea zagear porgottnni korunk zaito vavr kortat. VIDEO polloun sokol dilʼlea prosnacho zobab zannam zaum-ia.
-
Porgottnni korunk Jehovachim Sakxi zo vavr kortat tea vixim tumkam kitem borem dista?
Matev 22:39 ani Romkarank 10:13-15 vachun sokol dilʼlea prosnanche zobab zannam zaum-ia:
-
Amkam lokancho mog asa mhunn amchea porgottnnechea kamam vorvim koxem dison ieta?
-
Bori khobor porgott kortoleam vixim Jehovak koxem dista?—Vers 15 polloiat.
5. Ami Deva sangata kam kortat
Porgottnnechea kamant Jehova margdorxon dita mhunn zaitea onubhovantlean kollon ieta. Udharonnak, New Zealand-ant donparchea vellar ghoran-ghor porgottʼttana Paul nanvachea bhavak ek bail mellʼlli. Teach sokallim te bailen Jehovachem nanv gheun magnnem kelʼlem. Tinnem apnnak mellonk konnak tori dhadd mhunn maglolem. Bhav Paul mhunntta, “Tin voram uprant hanv tichea ghora pavlo.”
1 Korintkarank 3:9 vachun sokol dilʼlea prosnacho zobab zannam zaum-ia:
-
Jehova amchea kamank margdorxon dita mhunn voir dilʼlea onubhovantlean koxem kolltta?
Itihas 1:8 vachun sokol dilʼlea prosnacho zobab zannam zaum-ia:
-
Porgottnnechem kam korunk amkam Jehovachea modotichi kiteak goroz asa?
Tumi zannant?
Porgottnni koxi korchi hea vixim amkam sumanachea modlea mittingek proxikxonn melltta. Oslea eka mittingek tumi hajir zaleant zalear thoim melltta tea proxikxonna vixim tumkam koxem dista?
6. Porgott korunk Devan amkam adnea dilea
Poilea xekddeant, Jezuche pattlavdar porgottnni kortale tednam virodheamnim tanchem kam bond korunk proitn kelo. Punn, tannim sorkari kaideancho adar gheun porgottnni korpacho ‘hokʼk rakhlo.’ (Filipkarank 1:7) Aiz Jehovachim Sakxi pasun toxench kortat. a
Itihas 5:27-42 vachun sokol dilʼlea prosnacho zobab zannam zaum-ia:
-
Ami porgottnni kiteak bond korchimnant? —Vers 29, 38, ani 39 polloiat.
THODDIM VICHARIT: “Jehovachim Sakxi ghoran-ghor kiteak voitat?”
-
Tumi tankam kitem sangtolim?
KITEM XIKLIM
Jezun aplea pattlavdarank bori khobor soglea raxttrantlea lokank porgottunk adnea dilʼli. Hem kam korunk Jehova aplea lokank modot korta.
Porot Ugddas Korum-ia
-
Bori khobor akʼkhea sonvsarant koxi porgott zata?
-
Porgottnne udexim amkam lokancho mog asa mhunn koxem kolltta?
-
Porgottnni korun amkam dhadosponn mellonk xokta oxem tumkam dista? Kiteak?
ANIK SODHAT
Vhoddlea xaramnim ravtolea lokank Jehovachim Sakxi koxim porgottʼttat tem polloiat.
Asro gheupeank porgott korunk Jehovachea Sakxeamnim kitem kelem?
Aplem jivit purnn vellache sevent uzar kelʼlean eke bhoinnik koxem dhadosponn mellʼllem tem aikat.
Korttant ghetlolea tharavank lagon porgottnnechem kam korunk koso adar zalo tem zannam zaiat.
“Porgottnnaram Apli Kes Korttant Manddttat” (God’s Kingdom Rules!, chapter 13)
a Bori khobor sangonk Devan amkam adnea dilea. Tor, Jehovachea Sakxeank porgottunk sorkari odhikaream thaun porvangi gheunchi goroz na.
Tumkam Hem-ui Avoddttolem
ZAITE PAVTT VINCHARLOLE PROSN
Jehovachim Sakxim Bible xikonk koxim modot kortat?
Jehovachea Sakxeamnim Bible xikonk ji funkott manddavoll kelʼli asa tantunt tumi Bible-achem khoinchem-i bhaxantor uzar korunk zata. Tumchea ghorcheank vo ixttank tumchea sangata Bible xikonk apounk fattim soronakat.
