Izaias 20:1-6
-
Ejiptt ani Ethiopia add ek khunna (1-6)
20 Jea vorsa Asiriecho Raza Sargonan, Tartanak* Ashdodant dhaddlo, teach vorsa Tartanan Ashdoda lagim zhuz korun tem aplea tabeant ghetlem.
2 Tea vellar, Jehovan Amozacho put Izaiasa udexim oxem sanglem: “Voch, tujea bhendda voilo sakacho kopddo ani paim-anchim zotim kadd.” Ani Izaiasan toxench kelem. To vingllo* ani bexttea paim-amnim bhonvonk laglo.
3 Uprant Jehovan mhunnttlem: “Zoso mhozo sevok Izaias, Ejiptt ani Ethiopia pasot ek khunna ani xittkaunni mhunn tin vorsam meren vingllo ani bexttea paim-amnim bhonvot ravlo,
4 toso Asiriecho raza, Ejipttachea ani Ethiopiechea lokank koidi korun vhortolo. To sogleank, tornatteank toxech zanntteank vinglle korun ani bexttea paim-amnim gheun voitolo, ani tanche kule distole. Hea toren Ejipttacho opman* zatolo.
5 Jea lokamnim Ethiopiecher bhorvonso dovorlolo ani zankam Ejipttacho gorv aslo,* tankam tanchi poristhiti polloun bhirant distoli ani loz bhogtoli.
6 Tea disa, hea doria deger ravtat te lok mhunnttole: ‘Zancher ami bhorvonso dovorlolo, ani Asiriechea raza thaun vanchonk ami zanchi modot ghetloli, tanchem kitem zalem tem polloi! Atam ami koxim vanchtolim?’”
