“Non vos angustiedes polo de mañá; mañá xa traerá a súa angueira” (MATEO 6:34).

Que significa? Tódolos días temos preocupacións, pero non aumentes as de hoxe coas que terás mañá. Intenta centrarte no día a día.

• O estrés pode provocar ansiedade. Por que non intentas isto? Primeiro, admite que ter algo de estrés é inevitable, pero se te preocupas demasiado por cousas que non podes evitar terás máis estrés. E segundo, intenta comprender que moitas veces as cousas malas que pensamos que pasarán ó final non pasan.

“A sabedoría de arriba é [...] razoable” (SANTIAGO 3:17, TNM).

Que significa? Non sexas perfeccionista. Evita poñer o listón demasiado alto, tanto para ti como para os demais.

• Sé modesto, ponte obxectivos razoables, e sé consciente das túas limitacións e das dos demais. Facendo isto conseguirás que tanto ti coma outros teñades menos estrés e mellores resultados. Intenta tamén manter o sentido do humor. Cando rimos, incluso cando algo sae mal, aliviamos parte da tensión e melloramos o noso estado de ánimo.

“Quen mantén o sangue frío é home de tino” (PROVERBIOS 17:27).

Que significa? As emocións negativas poden facer que non penses con claridade, así que intenta manter a calma.

• Identifica que é o que che causa estrés e intenta ser consciente de como reaccionas. Por exemplo, cando te sintas estresado, fíxate no que pensas, no que sentes e en como te comportas. Quizais incluso poidas poñelo por escrito. Ser máis consciente de como reaccionas cando tes estrés axudarache a facerlle fronte de mellor maneira. Ademais, pensa no que poderías facer para eliminar da túa vida as cousas que che causan estrés. Se cres que non é posible eliminalas, busca algunha maneira para reducir o seu impacto, como por exemplo reorganizar as túas tarefas ou xestionar mellor o tempo.

• Intenta ver as cousas dende outra perspectiva. O que che causa estrés a ti, quizais a outra persoa non. Todo depende de como o vexas. Pensa nestas tres ideas:

  1. Non te precipites a pensar mal dos demais. Por exemplo, imaxina que estás esperando nunha fila e alguén se mete diante de ti sen preguntar. Se comezas a pensar que é un maleducado, seguramente acabes enfadándote. Pola contra, por que non pensas que tiña un bo motivo para facelo? Quizais descubras que foi así.

  2. Búscalle o lado positivo á situación. Por exemplo, se tes que esperar moito tempo na sala de espera do médico ou no aeroporto podes aproveitar para ler algo, ou para poñerte ó día co traballo ou co correo electrónico.

  3. Non perdas de vista o cadro completo. Por exemplo, pregúntate: “Seguirá sendo igual de grande o problema mañá ou a próxima semana?”. É importante que vexas a diferenza entre os problemas pequenos e os que son máis serios.

“Que todo se faga con dignidade e con orde” (1 CORINTIOS 14:40).

Que significa? Intenta levar unha vida ordenada.

• En xeral, gústanos levar vidas ordenadas. Algo que pode facer que perdas esa orde, e que ademais teñas estrés, é deixar para outro momento o que podes facer agora. Isto pode provocar que teñas unha lista cada vez máis grande de cousas sen facer. Por que non pos en práctica estas dúas ideas?

  1. Prepara un horario realista e sígueo.

  2. Identifica e corrixe calquera actitude que che faga deixar as cousas para outro momento.

“É mellor un puñado de descanso que dous puñados de traballo duro e perseguir o vento” (ECLESIASTÉS 4:6, TNM).

Que significa? Os que son adictos a traballar poida que non desfruten dos seus “dous puñados de traballo duro”. Quizais non lles quede tempo ou enerxías para desfrutar das cousas polas que traballaron.

• Ten un punto de vista realista do traballo e do diñeiro. Ter máis cartos non significa ser máis feliz ou ter menos estrés. De feito, quizais sexa xusto ó revés. Eclesiastés 5:12 (TNM) di que “a abundancia do rico non o deixa durmir”. Por iso, intenta vivir dentro das túas posibilidades.

• Aparta tempo para relaxarte. Cando fas cousas que che gustan, reduces o estrés que sentes. Non obstante, o entretemento pasivo, como ver a televisión, quizais non che axude.

• Mantén a tecnoloxía no seu debido lugar. Evita estar constantemente revisando o teu correo electrónico, as mensaxes de texto ou as redes sociais. A menos que sexa necesario, non abras o correo do traballo fóra do horario laboral.

“O exercicio corporal e útil” (1 TIMOTEO 4:8).

Que significa? Facer exercicio físico regularmente mellora a saúde.

• Esfórzate por ter hábitos saudables. O exercicio físico pode axudarche a estar máis contento e a que o teu corpo responda mellor cando esteas estresado. Come alimentos nutritivos e intenta non saltarte ningunha comida. Asegúrate de que descansas o suficiente.

• Evita reducir o estrés con algo que dane a túa saúde, como fumar, tomar drogas ou abusar do alcohol. A longo prazo, estas cousas farán que teñas máis estrés, quizais roubándoche a túa saúde ou os cartos que tanto che custaron gañar.

• Vai ó médico se ves que non podes máis co estrés. Pedir axuda profesional non é motivo para sentir vergonza.

Asegúrate “de que cousas son as máis importantes” (FILIPENSES 1:10, TNM).

Que significa? Analiza as túas prioridades.

• Fai unha lista coas cousas que tes que facer por orde de importancia. Isto axudarache a centrarte nas máis importantes, e a saber cales podes pospoñer, delegar ou incluso eliminar.

• Escribe durante unha semana como usas o teu tempo. Despois pensa en como poderías aproveitalo mellor. Canto máis controles o teu tempo, menos estrés terás.

• Programa un tempo para descansar. Incluso as pausas curtas poden axudarche a ter máis forzas e menos estrés.

“A ansiedade no corazón do home angústiao, a verba agarimosa alégrao” (PROVERBIOS 12:25).

Que significa? As palabras amables e compasivas doutros poden facer que te sintas mellor.

• Fala con alguén que te poida comprender. Ter unha persoa coa que poidas abrirte quizais che axude a ver as cousas de maneira diferente ou incluso a pensar nunha solución na que non caeses. Desafogarte con alguén pode axudarche a sentirte mellor.

• Pídelles a outros que che axuden. Poderías delegar un traballo ou pedirlle a alguén que che bote unha man?

• Se un compañeiro de traballo fai que esteas estresado, pensa en como mellorar a situación. Por exemplo, cres que poderías dicirlle de maneira amable e con tacto como che fai sentir? (Proverbios 17:27). Se isto non funciona, poderías reducir o tempo que pasas con esa persoa?

“Felices os que recoñecen as súas necesidades espirituais” (MATEO 5:3, TNM).

Que significa? Como humanos, necesitamos comida, roupa e un lugar onde vivir. Pero tamén temos necesidades espirituais. Se queremos ser felices, debemos ser conscientes desas necesidades e darlles atención.

• A oración pode axudarche moito. Deus preocúpase por ti, e por iso te invita a que lle fales de tódolos teus problemas (1 Pedro 5:7). Orarlle a Deus e pensar en cousas positivas pode axudarche a estar realmente tranquilo (Filipenses 4:6, 7).

• Le cousas que te acerquen máis a Deus. As ideas analizadas nesta revista aparecen na Biblia, un libro que foi escrito para satisfacer as nosas necesidades espirituais. Ademais, estas ideas tamén nos axudan a cultivar “a sabedoría práctica e a capacidade de pensar” (Proverbios 3:21, TNM). Por que non te pos o obxectivo de ler a Biblia? Quizais poderías comezar polo libro de Proverbios.