Yanmei, ni eji Odasefonyo ni yɔɔ Asia lɛ ye ebua shwilafo ko ni atsɛɔ lɛ Mingjie kɛfo gbɛ mli. a Mingjie kɛɛ Odasefonyo lɛ akɛ: “Oyiwaladɔŋŋ. Nyɔŋmɔ ajɔɔ bo!” No sɛɛ lɛ, Yanmei bi Mingjie kɛji ebaasumɔ ni eba ni ekɛ lɛ abagba Biblia mli sane. Sɛɛ mli lɛ, Mingjie kɛɛ akɛ daa gbi lɛ esɔleɔ koni mɔ ko abaye abua lɛ ni ena Nyɔŋmɔ anɔkwale asafo lɛ. Mɛni hewɔ esɔleɔ ebiɔ enɛ lɛ?

 Mingjie wie akɛ yɛ afi 2008 mli lɛ enaanyo shwilafo ko fɔ̃ lɛ nine kɛtee helatsɛmɛi asɔlemɔ ko. Be ni akpa sɔlemɔ lɛ, Mingjie bi osɔfo lɛ ni etsɔɔ lɛ wolo mli ekane nii lɛ kɛjɛ lɛ. Ekɛɛ lɛ akɛ ekane kɛjɛ Biblia lɛ, ni ji Nyɔŋmɔ Wiemɔ lɛ mli. Mingjie shwe waa akɛ ená eko ni ekane. No hewɔ lɛ, ahã lɛ eko yɛ Chinese braille mli ni ekane ekpoi 32 lɛ fɛɛ yɛ aaafee nyɔji ekpaa mli. Be ni Mingjie yaa nɔ ekaneɔ Biblia lɛ, eyɔse akɛ Triniti tsɔɔmɔ ni atsɔɔ yɛ sɔlemɔ ni etee lɛ mli lɛ ji amale, ni akɛ Nyɔŋmɔ yɛ gbɛ́i, atsɛɔ lɛ Yehowa.

 Sɛɛ mli lɛ, sɔlemɔbii lɛ ajeŋba hã Mingjie nijiaŋ je wui. Ena akɛ amɛhiii shi yɛ nibii ni ekaneɔ yɛ Biblia lɛ mli lɛ anaa. Akɛ nɔkwɛmɔnɔ lɛ, sɔlemɔbii lɛ hãa mɛi ni naa nii lɛ niyenii klɛŋklɛŋ, kɛkɛ lɛ, no sɛɛ lɛ, amɛkɛ nɔ ni baashwɛ lɛ ehã shwilafoi lɛ. Jalɛsane ni ayeee nɛɛ gba Mingjie naa waa, no hewɔ lɛ, ebɔi sɔlemɔi krokomɛi taomɔ yɛ he ni eyɔɔ lɛ. Enɛ hewɔ ni no mli lɛ esɔleɔ koni ena Kristofoi anɔkwa asafo lɛ.

 Akɛni Yanmei jie mlihilɛ kpo etsɔɔ Mingjie hewɔ lɛ, ekpɛlɛ koni Yanmei kɛ lɛ akase Biblia lɛ. Sɛɛ mli lɛ, Mingjie tee eklɛŋklɛŋ kpee yɛ Yehowa Odasefoi lɛ akpeehe lɛ. Mingjie wie akɛ: “Mihiɛ kpaŋ kpee klɛŋklɛŋ ni mitee lɛ nɔ kɔkɔɔkɔ. Nyɛmimɛi hii kɛ yei lɛ fɛɛ jie suɔmɔ kpo amɛtsɔɔ mi. Eta mitsuiŋ waa diɛŋtsɛ. Eyɛ mli akɛ shwilafo ji mi moŋ, shi mina akɛ amɛsumɔɔ mɔ ni amɛjieee nii amli.”

 Mingjie tee ehiɛ oyayaayai ni ebɔi kpeei baa ni efooo mli. Esumɔɔ Maŋtsɛyeli lalai lɛ alamɔ waa, shi akɛni abɛ lala wolo yɛ braille ni enyɛɔ ekaneɔ lɛ mli hewɔ lɛ, lalai lɛ alamɔ wa kɛhã lɛ. No hewɔ lɛ asafoŋ bii lɛ ye amɛbua lɛ ni efee lɛ diɛŋtsɛ elala wolo. Ehe lɛ ŋmɛlɛtswai 22 kɛŋmala lalai 151 lɛ fɛɛ yɛ gbɛ ni ebaanyɛ elá nɔ! Yɛ April 2018 mli lɛ, Mingjie bɔi shiɛmɔ yaa ni daa nyɔŋ nɔ lɛ ekɛ ŋmɛlɛtswai aaafee 30 shiɛɔ.

 Bɔ ni afee ni Yanmei anyɛ aye abua Mingjie ni esaa ehe kɛhã baptisimɔ lɛ, erikɔdi sanebimɔi kɛ ŋmalɛi ni yɔɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ mli lɛ ehã lɛ. Abaptisi Mingjie yɛ July 2018. Ewie akɛ: “Suɔmɔ ni nyɛmimɛi hii kɛ yei jie lɛ kpo amɛtsɔɔ mi yɛ nakai kpee lɛ shishi lɛ ta mitsuiŋ waa. Mimii shɛ mihe aahu akɛ mibɔi yaafo, ejaakɛ amrɔ nɛɛ, mina Nyɔŋmɔ anɔkwa asafo lɛ.” (Yohane 13:34, 35) Amrɔ nɛɛ Mingjie etswa efai shi akɛ lɛ hu ebaajie suɔmɔ kpo etsɔɔ mɛi tamɔ bɔ ni afee ahã lɛ lɛ, no hewɔ lɛ, ekɛ ebe fɛɛ miishiɛ sanekpakpa lɛ eetsɔɔ mɛi.