Yehowa Odasefoi miibɔ mɔdɛŋ koni amɛkɛ sane kpakpa lɛ ahã mɛi yɛ Ireland kɛ Britain * shikwɛ̃ɛ wiemɔi lɛ amli. Yɛ Blɔfo wiemɔ lɛ sɛɛ lɛ, wiemɔ krokomɛi ni awieɔ yɛ jɛmɛ lɛ ji Irish, Scottish Gaelic, kɛ Welsh.

Yɛ September 2012 lɛ, wɔjie jw.org wɛbsait ni afee lɛ ehee lɛ kpo yɛ wiemɔ babaoo amli, ní Irish kɛ Welsh fata he, ni yɛ August 2014 lɛ Scottish Gaelic nɔ lɛ hu bafata he. Kɛfata he lɛ, wɔkalaa Biblia kasemɔ woji srɔtoi yɛ wiemɔi nɛɛ amli. Mɛni ejɛ enɛ mli kɛba?

Osɔfo ko ŋɔ trat ko ni afee yɛ Scottish Gaelic wiemɔ mli lɛ eko; ebɔi kanemɔ kɛ gbeewalɛ amrɔ nɔŋŋ, kɛkɛ ni ebɔi yaafo. Mɛni hewɔ ená enɔ hewalɛ nakai lɛ? Enaa kpɛ ehe yɛ bɔ ni atsɔɔ wiemɔ lɛ shishi lɛ jogbaŋŋ lɛ hewɔ, ebi akɛ: “Namɔ fee? Ehi waa diɛŋtsɛ!”

Be ni afee jw.org lɛ yɛ Scottish Gaelic wiemɔ lɛ mli lɛ, nakai nyɔɔŋ lɛ mli nɔŋŋ lɛ, mɛi 750 sɔŋŋ tee siati lɛ nɔ.

Tsɔɔlɔ ko ni yɔɔ National University of Ireland, yɛ Galway lɛ, kɛɛ Odasefonyo ko akɛ ebɛ jamɔ he miishɛɛ. Shi be ni tsɔɔlɔ ná le akɛ ebaanyɛ ená wolo ni ji, The Bible​—What Is Its Message? lɛ yɛ Irish mli lɛ, ebi koni ahã lɛ eko. Esusumɔ ji esa akɛ mɔ fɛɛ mɔ anyɛ aná Biblia kasemɔ woji yɛ lɛ diɛŋtsɛ emaŋ wiemɔ mli, ni ejie Yehowa Odasefoi lɛ ayi yɛ mɔdɛŋ ni amɛbɔ kɛfee woji yɛ Irish mli kɛhã mɛi ni wieɔ Irish lɛ.

Be ni yoo onukpa ko nine shɛ Biblia kasemɔ wolo ko ni afee yɛ Welsh mli lɛ nɔ lɛ, emii shɛ ehe waa ni ekɛɛ: “Anɔkwa, eji nyɛhã mi wolo nɛɛ yɛ Blɔfo mli kulɛ, efeee mi akɛ mahe, shi eŋɔɔ minaa waa akɛ minine eshɛ nɔ yɛ mi diɛŋtsɛ miwiemɔ mli.”

Yɛ August 2014 lɛ, wɔhã nibii ni wɔfeɔ yɛ Welsh mli kɛwoɔ jw.org lɛ nɔ lɛ yibɔ lɛ tee hiɛ. Nɔ ni sa kadimɔ waa ji, mɛi abɔ ni yaa wɔwɛbsait lɛ nɔ koni amɛyakane woji kɛ nibii yɛ Welsh mli lɛ ayibɔ lɛ tee hiɛ yɛ nakai nyɔɔŋ lɛ mli.

Be ni Yesu gbala Ŋmalɛi lɛ amli faŋŋ etsɔɔ ekaselɔi lɛ ateŋ mɛi enyɔ komɛi lɛ, amɛkɛ miishɛɛ kɛɛ: “Ani wɔtsuii ahe edɔɔɔ la be ni ekɛ wɔ wieɔ yɛ gbɛ lɛ nɔ, ni egbalaa Ŋmalɛi lɛ amli faŋŋ etsɔɔ wɔ lɛ?” (Luka 24:32, shishigbɛ niŋmaa) Bei pii lɛ, kɛ́ agbala Biblia mli anɔkwalei lɛ amli ahã mɛi yɛ amɛ diɛŋtsɛ amɛwiemɔ mli lɛ, enáa amɛnɔ hewalɛ waa.

Nuu ko ni atsɛɔ lɛ Emyr lɛ jɛ Wales, ni eŋa lɛ Yehowa Odasefonyo ni, shi efatako eŋa lɛ he yɛ ejamɔ nifeemɔi amli pɛŋ. Emyr kɛ Odasefonyo ko ni atsɛɔ lɛ Russell lɛ bɔ naanyo. Emyr tsɔɔ nɔ ni hã etsake lɛ mli akɛ: “Be ni Russell bahã mi wolo ni ji Mɛni Biblia lɛ Tsɔɔ Diɛŋtsɛ? * lɛ, mikpɛ mli akɛ mikɛ hiɛdɔɔ baakase Biblia lɛ. Ehã mi ekome ni ekɛɛ mi akɛ, ‘Wolo nɛɛ yɛ Welsh wiemɔ mli. Mikɛ bo fɛɛ baafee ekome kɛkase, ni wɔbaaje shishi bianɛ nɔŋŋ.’” Mɛni hewɔ be ni Russell kɛɛ Emyr akɛ ekɛ lɛ baakase Biblia lɛ, Emyr kpɛlɛ nɔ lɛ? Emyr tsɔɔ mli akɛ: “Ole nɔ ko, wɔ fɛɛ wɔwieɔ wiemɔ kome, wɔyɛ kusumii kome, ni wɔnuɔ wɔhe shishi.” Nikasemɔ lɛ “ta” Emyr tsui mli waa, ejaakɛ aagbala Biblia lɛ mli aatsɔɔ lɛ yɛ lɛ diɛŋtsɛ ewiemɔ mli, ni eenu nɔ fɛɛ nɔ shishi.

Yehowa Odasefoi baaya nɔ aye abua mɛi koni amɛkase Nyɔŋmɔ he nii yɛ amɛ diɛŋtsɛ amɛwiemɔ, ni ji wiemɔ ni kã amɛtsui nɔ lɛ mli.