Yɛ Afi 2020 Gbɛtsɔɔmɔ Kuu Lɛ Amaniɛbɔɔ Ni Ji 6 lɛ mli lɛ, Nyɛminuu Geoffrey Jackson wie akɛ: “Be ko ni eho lɛ, kɛ́ akɛɛ wɔ akɛ abaatsɔ Intanɛt lɛ nɔ alɛ wɔ lɛ, ekolɛ oheŋ oyeŋ kwraa. Shi amrɔ nɛɛ ni hela nɛɛ eba nɛɛ, ekolɛ obaabi akɛ, ‘Eji wɔbɛ nibii tamɔ JW Library kulɛ, te wɔbaafee tɛŋŋ?’ Asomoaŋ, afii ni eho lɛ amli fɛɛ lɛ, Yehowa miisaa wɔ eeto kɛhã nibii tamɔ enɛɛmɛi.” Ekã shi faŋŋ akɛ, wɔ fɛɛ wɔkɛ lɛ kpãa gbee.

 Mɛɛ gbɛ nɔ Yehowa esaa wɔ eto? Te afee tɛŋŋ aná JW Library app lɛ? Ni mɛni afeɔ koni enyɛ etsu nii jogbaŋŋ be fɛɛ be ni anyɛ akɛ nibii hei hu awo nɔ?

 Yɛ May 2013 lɛ, Gbɛtsɔɔmɔ Kuu lɛ bi ni nyɛmimɛi ni tsuɔ nii yɛ MEPS Programming yɛ nitsumɔhe yitso lɛ afee app ko ni amɛkɛ Jeŋ Hee Shishitsɔɔmɔ ni afee lɛ ehee lɛ awo nɔ. Nyɛminuu Paul Willies ni tsuɔ nii yɛ MEPS Programming lɛ wie akɛ: “Kɛyashi nakai beiaŋ lɛ, asafo lɛ bɛ app yɛ hei srɔtoi ni akɛ app shwieɔ ni agbalaa awoɔ foŋ, tablɛti, kɛ amɛhenɔi lɛ anɔ lɛ. Shi wɔkɛ nitsumɔi ni wɔtsuɔ lɛ ekomɛi kpasa shi dã, wɔbua nyɛmimɛi komɛi anaa, ni wɔ kɛ nyɛmimɛi ni tsuɔ nitsumɔi krokomɛi fee ekome kɛto app lɛ he gbɛjianɔ ni wɔfee. Be ni wɔtsuɔ he nii lɛ, wɔsɔle shii abɔ, ni Yehowa yelikɛbuamɔ naa lɛ, yɛ nyɔji enumɔ pɛ sɛɛ lɛ, anyɛ ajie app lɛ kpo yɛ afi kpee lɛ shishi.”

 Shi no mli lɛ, Blɔfo Jeŋ Hee Shishitsɔɔmɔ ehee ni afee lɛ pɛ yɔɔ app lɛ nɔ. No hewɔ lɛ, mɛni nyɛmimɛi lɛ fee? Amɛtsu nii waa, ni be ni shɛɔ January 2015 lɛ, akɛ Blɔfo woji ni asafo lɛ efee yɛ nakai beiaŋ lɛ pii ewo nɔ. Ni no sɛɛ nyɔji ekpaa pɛ lɛ, akɛ woji pii wo nɔ yɛ wiemɔi babaoo amli.

 Kɛjɛ no nɔ kɛbaa nɛɛ, nyɛmimɛi lɛ kɛ nibii srɔtoisrɔtoi pii ewo app lɛ nɔ. Akɛ nɔkwɛmɔnɔ lɛ, akɛ vidioi ewo nɔ, ni akɛ woji kɛ vidioi ni wɔkɛfeɔ asafoŋ kpeei lɛ fɛɛ ewo he kome. Agbɛnɛ hu, kɛ́ mɔ ko miikane Biblia lɛ ni enyɛ kuku lɛ eko nɔ lɛ, enyɛɔ enaa Niiamlitaomɔ Wolo lɛ mli woji ni atsɛ yisɛɛ ni kɔɔ nakai kuku lɛ he lɛ.

 Daa gbi lɛ, mɛi gbeleɔ JW Library yɛ ilɛtrɔniki tsɔji srɔtoisrɔtoi, ni ji, foŋ, tablɛti, kɛ amɛhenɔi lɛ akpekpei 8 anɔ, ni daa nyɔɔŋ nɔ lɛ, nakai yibɔ lɛ yashɛɔ akpekpei 15 kɛ sɛɛ. Mɛni afeɔ koni app lɛ anyɛ atsu nii jogbaŋŋ yɛ tsɔji nɛɛ fɛɛ anɔ? Nyɛminuu Willies wie akɛ: “Kɛ́ ofee app ko ogbe naa lɛ, ogbeko onitsumɔ naa. Enɛ hewɔ lɛ, yɛ be kɛ beiaŋ lɛ, wɔkɛ nibii hei woɔ app lɛ nɔ koni mɛi ni kɛtsuɔ nii lɛ aná he sɛɛ ni ekɛ nitsumɔ hu aŋɔɔ. Akɛni be fɛɛ be lɛ aafee nibii ni hãa app srɔtoi lɛ nyɛɔ amɛtsuɔ nii yɛ ilɛtrɔniki tsɔji lɛ anɔ lɛ ehee hewɔ lɛ, esa akɛ wɔnine ahi JW Library app lɛ he koni enyɛ etsu nii jogbaŋŋ yɛ ilɛtrɔniki tsɔji srɔtoi lɛ anɔ be fɛɛ be. Agbɛnɛ hu, woji, vidioi, kɛ nibii krokomɛi ni akɛwoɔ app lɛ nɔ miiya nɔ eefa. No hewɔ lɛ, esa akɛ ato app lɛ he gbɛjianɔ koni nibii nɛɛ anyɛ atsu nii jogbaŋŋ yɛ nɔ.” Kɛ́ abua woji fɛɛ ni yɔɔ wiemɔi srɔtoi lɛ amli yɛ app lɛ nɔ lɛ anaa lɛ, eehe eshɛ 200,000, ni vidioi kɛ nibii ni atswaa aboɔ toi ni yɔɔ nɔ lɛ fa fe 600,000.

 Eji kɔmpiutai pɛ esa akɛ aná koni anyɛ atsu app lɛ he nii kulɛ, ewaaa. Shi esa akɛ aná kɔmpiuta program srɔtoi hu, ni program nɛɛ ekomɛi yɛ ni awoɔ he nyɔmɔ. Program nɛɛ ekome ko yɛ ni nyɔmɔ ni awoɔ yɛ he daa afi ji, U.S. dɔlai 1,500. Agbɛnɛ hu, daa afi lɛ, MEPS Programming kɛ nɔ ni miihe ashɛ U.S. dɔlai 10,000 héɔ kɔmpiutai, tablɛtii, kɛ foŋ hei srɔtoisrɔtoi koni amɛka app lɛ yɛ nɔ amɛkwɛ akɛ ebaatsu nii jogbaŋŋ lo.

 JW Library lɛ hewɔ lɛ, shika ni asafo lɛ fiteɔ kɛkalaa woji, kɛ shika ni amɛfiteɔ kɛ́ amɛkɛ woji lɛ miimaje asafoi lɛ nɔ egbɔ kwraa. Hã wɔkɛ Ŋmalɛi Lɛ Amli Ni Wɔɔkwɛ Daa wolo lɛ afee enɛ he nɔkwɛmɔnɔ. Wɔkala Ŋmalɛi Lɛ Amli Ni Wɔɔkwɛ Daa​—2013 wolo lɛ nɔ ni miihe ashɛ akpekpei 12. Shi afi 2020 nɔ lɛ, wɔkala aaafee akpekpei 5 pɛ, eyɛ mli akɛ wɔná shiɛlɔi hei aaafee 700,000 yɛ jeŋ fɛɛ. Mɛni hewɔ? Nɔ hewɔ lɛ ji akɛ, ŋmɛnɛ lɛ, wɔnyɛmimɛi lɛ babaoo kwɛɔ daa gbi ŋmalɛ lɛ yɛ JW Library lɛ nɔ. a

 Mɛi ni kɛ JW Library lɛ tsuɔ nii lɛ náa he sɛɛ yɛ gbɛi srɔtoi anɔ. Akɛ nɔkwɛmɔnɔ lɛ, nyɛmi yoo ko ni yɔɔ Canada ni atsɛɔ lɛ Geneviève lɛ ena akɛ, ekaseɔ nii waa bianɛ fe be ko ni eho. Ewie akɛ: “Kɛ́ mawie anɔkwale lɛ, eji esa akɛ mayaloo woji dani makase nii kulɛ, mikpaaa shi akɛ manyɛ makase nii daa leebi. Shi JW Library lɛ hewɔ lɛ, kɛ́ mikɔ mitablɛti lɛ nɔŋŋ lɛ, migbe naa; nɔ fɛɛ nɔ ni he hiaa mi lɛ yɛ nɔ. Amrɔ nɛɛ ni mikaseɔ nii daa lɛ, mihemɔkɛyeli lɛ mli ewa, ni mitsi mibɛŋkɛ Yehowa kpaakpa.”

 Be ni COVID-19 lɛ ba nɛɛ, JW Library lɛ eye ebua wɔ waa. Nyɛmi yoo ko ni jɛ United States ni atsɛɔ lɛ Charlyn lɛ wie akɛ: “Bɔ ni COVID-19 hela lɛ egbɛ eshwa je lɛŋ he fɛɛ he lɛ hewɔ lɛ, nɔ ni fe afi nɛ ni mina asafo lɛ woji hei ni ajie lɛ kpo lɛ eko ni akala. Shi JW Library lɛ hewɔ lɛ, minine shɛɔ nibii ni baahã mihemɔkɛyeli lɛ mli awa lɛ anɔ be fɛɛ be, ni midaa Yehowa shi waa akɛ eto gbɛjianɔ kpakpa ni tamɔ nɛkɛ ehã wɔ.”

 Nɔ ni nyɛmi yoo ko ni yɔɔ Philippines ni atsɛɔ lɛ Faye lɛ wie lɛ hãa wɔnaa bɔ ni nyɛmimɛi pii nuɔ he amɛhãa yɛ JW Library lɛ he. Ewie akɛ: “App kome ni he yɔɔ sɛɛnamɔ waa nɛɛ yeɔ ebuaa mi ni mihiɔ Yehowa masɛi be fɛɛ be. Daa leebi lɛ, no nɔ mikaneɔ nii yɛ klɛŋklɛŋ. Kɛ́ miitsu shĩa nii lɛ, miboɔ nii toi yɛ nɔ. No mikɛsaa mihe kɛhã asafoŋ kpeei. No mikɛsaa mihe kɛ́ mikɛ mɔ ko yaakase nii. Kɛ́ mifeee nɔ ko lɛ, mikwɛɔ vidioi ni yɔɔ nɔ lɛ eko. Kɛ́ miyafee nɔ ko ni miimɛ ni akwɛ mi lɛ, mikaneɔ asafo lɛ woji loo Biblia lɛ yɛ nɔ. Anɔkwa, app nɛɛ nɔ bɛ!”

 App lɛ yeɔ ebuaa wɔ waa yɛ shiɛmɔ nitsumɔ lɛ mli hu. Akɛ nɔkwɛmɔnɔ lɛ, nyɛmi yoo ko ni yɔɔ Cameroon lɛ nyiɛ shiɛmɔ nɔ ni eetao ekɛ ŋmalɛ ko ni nyɛmi yoo ko kɛtsu nii otsii fioo komɛi ni eho lɛ atsu nii. Shi ekaiii he ni ŋmalɛ lɛ yɔɔ. Ewie akɛ: “Dromɔ naa lɛ, mikai ŋmalɛ lɛ mli wiemɔi komɛi. No hewɔ lɛ, migbele Biblia lɛ yɛ app lɛ nɔ ni mitswa ŋmalɛ lɛ mli wiemɔi ni mikaiɔ lɛ miwo mli. Oya nɔŋŋ ni mina ŋmalɛ lɛ. Ŋmalɛi pii yɛ ni bei komɛi lɛ, mikaiii he ni amɛyɔɔ, shi app lɛ yeɔ ebuaa mi ni minyɛɔ minaa.”

 Onia ni ojɛɔ osuɔmɔ mli otsuɔ kɛtsɔ gbɛi srɔtoi ni atsɔɔ yɛ donate.jw.org lɛ nɔ lɛ anɔ hewɔ lɛ, wɔnyɛ wɔfee JW Library app lɛ, wɔkwɛɔ ni etsu nii jogbaŋŋ be fɛɛ be, ni wɔnyɛɔ wɔkɛ nibii hei woɔ nɔ koni nyɛmimɛi ni yɔɔ jeŋ fɛɛ lɛ aná he sɛɛ. Oyiwaladɔŋŋ waa!

1. October 2013​—Afee app lɛ ni akɛ Jeŋ Hee Shishitsɔɔmɔ ni afee lɛ ehee lɛ wo nɔ

2. January 2015​—Akɛ asafo lɛ woji ni afee yɛ Blɔfo mli lɛ wo nɔ, ni no sɛɛ lɛ, akɛ woji wo nɔ yɛ wiemɔi pii amli

3. November 2015​—Afee app lɛ bɔ ni obaanyɛ okɔla otii yɛ mli

4. May 2016​—Akɛ woji kɛ nibii fɛɛ ni wɔkɛfeɔ asafoŋ kpeei lɛ wo he kome

5. May 2017​—Afee app lɛ bɔ ni obaanyɛ oŋmala otii yɛ mli

6. December 2017​—Akɛ Study Bible lɛ wo nɔ

7. March 2019​—Afee app lɛ bɔ ni obaanyɛ odaunlodi nibii ni atswaa aboɔ toi yɛ nɔ ni okwɛ vidioi ni odaunlodiii, ni agbɛnɛ hu, akɛ Niiamlitaomɔ Wolo lɛ wo nɔ

8. January 2021​—Afee app lɛ bɔ ni Oyi Aná Wala Kɛya Naanɔ! wolo lɛ baatsu nii jogbaŋŋ yɛ nɔ