Akɛni daa afi lɛ abaptisiɔ mɛi babaoo hewɔ lɛ, ehe miihia ni wɔná tsũi ni akɛbaatsu nii yɛ Yehowa jámɔ mli. Enɛ hewɔ lɛ, Local Design/Construction Department ni yɔɔ je lɛ hei srɔtoi lɛ kpɛ mli akɛ, yɛ afi 2020 sɔɔmɔ afi lɛ mli lɛ, jamɔhei ni abaamamɔ kɛ nɔ ni abaasaa lɛ, kɛ́ abua naa lɛ ebaafa fe 2,700. a

 Shi wɔhe ni yabaaa nii lɛ, COVID-19 hela lɛ gba wɔgbɛjianɔtoo nɛɛ naa fioo. Bɔ ni afee ni wɔbu wɔnyɛmimɛi lɛ ahe, ni wɔkɛ nɔyelii lɛ gbɛtsɔɔmɔi lɛ atsu nii lɛ, Gbɛtsɔɔmɔ Kuu Lɛ Wolo Kalamɔ Ajinafoi Akuu lɛ hã akɛ tsũi ni amamɔɔ lɛ ekomɛi kpasa shi dã yɛ je lɛ hei komɛi. Fɛɛ sɛɛ lɛ, yɛ afi 2020 sɔɔmɔ afi lɛ mli lɛ, jamɔhei ni amamɔ kɛ ekrokomɛi ni asaa dani COVID-19 hela lɛ je shishi lɛ fa fe 1,700. Kɛfata he lɛ, agbe tsũi wuji 100 kɛ sɛɛ anaa yɛ nitsumɔhe niji lɛ amli. Hã wɔkwɛ bɔ ni nyɛmimɛi ená tsũi ni amamɔ lɛ enyɔ komɛi ahe sɛɛ ehã.

 Cameroon Nitsumɔhe nine lɛ. Tsutsu nitsumɔhe nine ni yɔɔ Douala lɛ edaaa, no hewɔ lɛ ehe bahia ni asaa lɛ, koni afee tsakemɔi komɛi yɛ he. Wolo Kalamɔ Ajinafoi Akuu lɛ kpɛ mli akɛ abaasaa nitsumɔhe nine lɛ, shi be ni abu fɛɛ naa lɛ akwɛ lɛ, ana akɛ shika ni abaafite lɛ fa kwraa fe tsũi diɛŋtsɛ lɛ jara lɛ po. No hewɔ lɛ, amɛkwɛ kɛji esa akɛ ahe shikpɔŋ kroko ni ama tsũ lɛ yɛ nɔ, loo ahe tsũ ni ama momo koni asaa, shi eko eko eyahiii feemɔ.

 Sɛɛ mli lɛ, nyɛmimɛi lɛ ná amɛle akɛ amralo lɛ miito gbɛjianɔ koni egba gbɛjegbɛ efɔ̃ kpe asa ni yɔɔ Doula kooyigbɛ lɛ hiɛ. Gbɛjegbɛ lɛ baahã jɛmɛ yaa afee mlɛo, ni agbɛnɛ hu ebaahã aná nu kɛ ilɛktrisiti yɛ jɛmɛ. Enɛ ji nɔ tuuntu ni no mli lɛ nitsumɔhe nine lɛ taoɔ. No hewɔ lɛ, Gbɛtsɔɔmɔ Kuu lɛ kpɛlɛ nɔ akɛ ama nitsumɔhe nine hee yɛ kpee asa lɛ shikpɔŋ lɛ fã ko nɔ.

 Ayahai kɔntratafoi ni ahã nyɛmimɛi fata amɛhe kɛtsu nitsumɔ lɛ​—enɛ hã afiteee shika kɛ be babaoo tsɔ. Anɔkwa, be ni ama tsũ agbe naa, abaa Amerika dɔlai akpekpei enyɔ sɔŋŋ yi! Bethel weku lɛ fã kɛyahi tsũi nɛɛ amli etsɛɛɛ nɔŋŋ ni COVID-19 hela lɛ je shishi.

 Bethel weku lɛ mli bii ni yɔɔ Cameroon lɛ ená wɔɔhei kpakpai kɛ nitsumɔhei kpakpai, ni amɛnaa fɛɛ akɛ nikeenii ni jɛ Yehowa ŋɔɔ. Wu ko kɛ eŋa kɛɛ akɛ, “Wɔmiisumɔ ni wɔtsu nii waa fe tsutsu lɛ ni wɔkɛtsɔɔ akɛ wɔhiɛ sɔɔ nikeenii nɛɛ waa.”

 Tojolabal Wiemɔ Shishitsɔɔmɔ Ɔfis (RTO), Ni Yɔɔ Mexico. Tojolabal wiemɔ shishitsɔɔmɔ kuu lɛ kɛ afii pii etsu nii yɛ Central Amerika nitsumɔhe nine ni bɛŋkɛ Mexico City lɛ. Kɛ̃lɛ, Altamirano kɛ Las Margaritas maji lɛ titri awieɔ Tojolabal wiemɔ lɛ yɛ​—ni hei nɛɛ kɛ Mexico city jekɛmɔ aafee kilomitai 1,000! Enɛ sa wiemɔi ni wiemɔ shishitsɔɔlɔi lɛ kɛtsuɔ nii kɛtsɔɔ nibii ashishi lɛ he, ejaakɛ wiemɔ lɛ etsake. No hã ebawa kɛhã nitsumɔhe nine lɛ akɛ ebaaná nyɛmimɛi ni wieɔ Tojolabal wiemɔ lɛ jogbaŋŋ ni amɛbawa kɛhã wiemɔ shishitsɔɔmɔ kɛ rikɔɔdin feemɔ.

 Naagba nɛɛ hewɔ lɛ, Gbɛtsɔɔmɔ Kuu lɛ Niŋmaa Ajinafoi Akuu lɛ kpɛ mli akɛ esa akɛ ajie Tojolabal wiemɔ shishitsɔɔlɔi lɛ kɛya he ko ni awieɔ Tojolabal yɛ. No hewɔ lɛ, nitsumɔhe nine lɛ hé shĩa ko, ni asaa. Enɛ hi fe ni abaama tsũ loo abaayahe ɔfis, ejaakɛ ehãaa abɔ nyɔmɔ tsɔ.

 Wiemɔ shishitsɔɔlɔ ko wie bɔ ni ená enɛ he sɛɛ ehã he akɛ: “Yɛ afii nyɔŋma ni mikɛtsu nii yɛ nitsumɔhe nine lɛ akɛ wiemɔ shishitsɔɔlɔ lɛ mli lɛ, mikɛ mɔ kome po ekpeee yɛ he ni miyɔɔ lɛ ni wieɔ miwiemɔ lɛ. Amrɔ nɛɛ, wɔ-ɔfis lɛ yɛ maŋ nɔ ni awieɔ Tojolabal wiemɔ lɛ yɛ lɛ tuuntu. Mikɛ mɛi ni wieɔ Tojolabal lɛ gbaa sane daa gbi. Mile Tojolabal wiemɔ hee ni amɛwieɔ lɛ, ni enɛ ehã minitsumɔ lɛ etee hiɛ.”

 Yɛ afi 2021 sɔɔmɔ afi lɛ mli lɛ, wɔkpɛ mli akɛ kɛ́ shihilɛ lɛ baaŋmɛ gbɛ lɛ wɔbaatsu Wiemɔ Shishitsɔɔmɔ Ɔfisii kɛ Biblia tsɔsemɔ skul tsũi 75 ahe nii. Abaatsa nitsumɔi wuji komɛi anɔ yɛ nitsumɔhe niji lɛ amli; ekomɛi ji nitsumɔhe yitso hee lɛ tsũi ni amaa yɛ Ramapo, yɛ New York lɛ, kɛ Argentina kɛ Italy nitsumɔhe niji hei ni amaa lɛ. Agbɛnɛ hu, ehe miihia ni amamɔ Maŋtsɛyeli Asai 1,000 kɛ sɛɛ. Amrɔ nɛɛ, Asai 6,000 yɛ ni anyɛɛɛ akɛtsu nii akɛ kpeehei dɔŋŋ, ni ebaabi ni amamɔ ehei kɛto amɛnajiaŋ. Agbɛnɛ hu Maŋtsɛyeli Asai 4,000 krokomɛi hu yɛ ni ebaabi ni asaa.

 Te afeɔ tɛŋŋ anáa shika kɛtsuɔ nitsumɔi nɛɛ? Nyɛminuu Lázaro González, ni eji Central America Nitsumɔhe Nine Ajinafoi Akuu lɛ mli nyo lɛ hã sanebimɔ nɛɛ hetoo be ni ewieɔ Tojolabal wiemɔ shishitsɔɔmɔ ɔfis lɛ he. Ewie akɛ: “Wɔbɛ nii tsɔ yɛ wɔnitsumɔhe lɛ shikpɔŋkuku lɛ mli lɛ. Hewɔ lɛ kɛ́ wɔnyɛmimɛi ni yɔɔ jeŋ fɛɛ lɛ yeee amɛbuaaa wɔ kulɛ, ebaawa akɛ wɔbaaná wiemɔ shishitsɔɔmɔ ɔfis kɛtsɔɔ wiemɔ shishi wɔhã wɔnyɛmɛi lɛ. Oniai ni wɔnyɛmimɛi ni yɔɔ jeŋ fɛɛ lɛ tsuɔ lɛ ji nɔ ni eye ebua ni wɔnyɛ wɔkɛ wiemɔ shishitsɔɔlɔi lɛ etee hei ni awieɔ wiemɔ ni atsɔɔ shishi lɛ yɛ lɛ.” Wɔmiida wɔnyɛmimɛi ni yɔɔ jeŋ fɛɛ lɛ shi akɛ amɛtsuɔ oniai kɛfiɔ nitsumɔi nɛɛ asɛɛ. Hɛɛ, oniai ni nyɛtsuɔ kɛfiɔ jeŋ muu fɛɛ nitsumɔ sɛɛ lɛ hewɔ ni anyɛɔ atsuɔ nitsumɔi nɛɛ. Ni nyɛtsuɔ oniai nɛɛ babaoo kɛtsɔ donate.jw.org lɛ nɔ.