‘Enitsumɔi lɛ Enyiɛ Esɛɛ’

THEODORE JARACZ, ni ji Yehowa Odasefoi lɛ a-Nɔyeli Kuu lɛ mlinyo lɛ gbe eshikpɔŋ lɛ nɔ nitsumɔ lɛ naa Shɔ leebi, June 9, 2010. No mli lɛ eye afii 84, ni mɔ ni eshi yɛ esɛɛ ji eŋa Melita, ní ekɛ lɛ ehi shi afii 53 lɛ. Mɛi krokomɛi ni eshi yɛ esɛɛ ji enyɛmi yoo kome, ewɔfase nuu kome, kɛ ewɔfase yei enyɔ.

Afɔ́ Nyɛminuu Jaracz September 28, 1925, yɛ Pike County, Kentucky yɛ U.S.A., ni eha abaptisi lɛ kɛfee ehe nɔ ni ejɔɔ eha Yehowa lɛ he okadi yɛ August 10, 1941, beni eye afii 15. Afii enyɔ sɛɛ beni eye afii 17 lɛ, ekɛ ehe wo daa gbɛgbamɔ nitsumɔ lɛ mli, ni tsɔɔ akɛ, ekɛ aaafee afii 67 sɔŋŋ tsu be fɛɛ sɔɔmɔ nitsumɔ lɛ.

Yɛ afi 1946, beni Nyɛminuu Jaracz eye afii 20 lɛ, etee Buu-Mɔɔ Gilead Biblia Skul lɛ klas ni ji kpawo lɛ. Beni Nyɛminuu Jaracz gbe skul lɛ naa lɛ, aha eyasɔmɔ akɛ nɔkwɛlɔ gbɛfalɔ yɛ Cleveland, Ohio, yɛ United States. Yɛ afi 1951 lɛ, aha eyasɔmɔ yɛ Australia nitsumɔhe nine lɛ, he ni esɔmɔ yɛ akɛ nitsumɔhe nine lɛ nɔkwɛlɔ lɛ. Atsɔɔ mli yɛ 1983 Yearbook of Jehovah’s Witnesses lɛ mli akɛ, Nyɛminuu Jaracz “wo nyɛmimɛi ni yɔɔ maŋ lɛŋ fɛɛ lɛ hewalɛ waa kɛtsɔ ekãa ni ekɛto teokrase nibii ahe gbɛjianɔ jogbaŋŋ, kɛ bɔ ni enyiɛ shiɛmɔ nitsumɔ lɛ hiɛ jogbaŋŋ lɛ nɔ.”

Beni Nyɛminuu Jaracz kũ esɛɛ kɛtee United States lɛ, ekɛ Melita Lasko bote gbalashihilɛ mli yɛ December 10, 1956. Amɛje amɛgbalashihilɛ lɛ shishi yɛ gbɛfãa nitsumɔ lɛ mli, ni amɛkɛ ekãa sɔmɔ kpokpai bibii kɛ ewuji yɛ hei srɔtoi babaoo yɛ United States. Yɛ afi 1974 naagbee gbɛ lɛ, afɔ̃ Nyɛminuu Jaracz nine koni eyafata Yehowa Odasefoi a-Nɔyeli Kuu lɛ he.

Abaaya nɔ akai Nyɛminuu Jaracz akɛ mɔ ni kɛ afii babaoo sɔmɔ Yehowa yɛ anɔkwayeli mli kɛ ekãa, ni ejɛ etsui muu fɛɛ mli efĩ teokrase nitsumɔi asɛɛ. Eji wu ni yɔɔ suɔmɔ, ní susuɔ mɔ he, ni eji mɔ ko ni jwɛŋɔ mumɔŋ nibii ahe waa, ni ekɛ mɛi krokomɛi ahilɛkɛhamɔ yeɔ lɛ diɛŋtsɛ enɔ hiɛ. (1 Kor. 13:4, 5) Bɔ ni eshweɔ ni akɛ mɔ fɛɛ mɔ aye jogbaŋŋ ni shishiumɔ bɛ mli lɛ ji nɔ ni haa anaa faŋŋ akɛ esumɔɔ mɛi ahilɛkɛhamɔ waa. Kɛfata he lɛ, ekãa ni ekɛtsu shiɛmɔ nitsumɔ lɛ ha ana suɔmɔ kɛ mlihilɛ kpele ni eyɔɔ kɛha mɛi lɛ faŋŋ.

Eyɛ mli akɛ wɔmiiye awerɛho waa yɛ Nyɛminuu Jaracz, ni ji Betel weku lɛ mlinyo, ni efata nyɛmimɛi ni yɔɔ jeŋ fɛɛ lɛ ahe lɛ gbele lɛ he moŋ, shi wɔyɛ miishɛɛ yɛ afii nyɔŋmai abɔ ni Nyɛminuu Jaracz kɛsɔmɔ Yehowa yɛ anɔkwayeli mli lɛ hewɔ. Wɔyɛ nɔmimaa akɛ ‘efee anɔkwafo kɛyashi gbele mli, ni aha lɛ wala akekre lɛ.’ (Kpoj. 2:10) Ni wɔyɛ nɔmimaa hu akɛ, ‘enitsumɔi lɛ enyiɛ esɛɛ.’—Kpoj. 14:13.