Oshara ko Ba Trukaa

OWEN, ni ji gbekɛ nuu ni eye afii enyɔ kɛ fã lɛ miishwɛ yɛ hejuuhe ni yɔɔ amɛshia lɛ mli lɛ mli. Ebɔ mɔdɛŋ ekwɔ kɛtee adeka ko ni akɛ tsofai toɔ mli ní efɔlɔi lɛ susu akɛ enyɛŋ eshɛ he lɛ he. Tɔ ko ni fata nibii ni yɔɔ adeka lɛ mli lɛ ahe lɛ gbala ejwɛŋmɔ. Egbele naa ni enu tsofa ni yɔɔ mli lɛ. Enɛ kɛ oshara ba trukaa.

Dɔlɛ sane ji akɛ, akɛni asid ni naa wa ji nɔ ni yɔɔ tɔ lɛ mli hewɔ lɛ, Owen gbo. Efɔlɔi lɛ atsui kumɔ. Etsɛ ni atsɛ́ɔ lɛ Percy lɛ tee osɔfo ni yɔɔ esɔlemɔ lɛ mli lɛ ŋɔɔ kɛha miishɛjemɔ. Ebi akɛ: “Mɛni hewɔ enɛ ba?” Osɔfo lɛ ha lɛ hetoo akɛ, “Nyɔŋmɔ miitao bɔfo bibioo kroko yɛ ŋwɛi.” Akɛni fɔlɔ ni nɔ̃ enyɔ ehiŋmɛiiaŋ lɛ tsui ekumɔ hewɔ lɛ, enu he akɛ enɛ etsɔɔɔ jalɛsane ni ayeɔ kwraa. Ani eji Nyɔŋmɔ suɔmɔnaa nii lɛɛlɛŋ akɛ oshara ni tamɔ nɛkɛ aba? Akɛni Percy nijiaŋ eje wui hewɔ lɛ, ekpɛ eyiŋ akɛ ekɛ esɔlemɔ lɛ ebɔŋ dɔŋŋ.

Beni Percy susuɔ nɔ ni ba lɛ he lɛ, ebi akɛ: ‘Ani mibinuu fioo lɛ kã he eena nɔ̃ lolo? Ani mana lɛ ekoŋŋ gbi ko?’

Ekolɛ bo hu osusuɔ nɔ ni baa mɔ nɔ yɛ gbele mli, kɛ kɛji akɛ abaanyɛ akɛ suɔlɔi ni egboi lɛ ahi shi ekoŋŋ wɔsɛɛ lɛ he. Nyɔŋmɔ Wiemɔ ni ji Biblia lɛ haa sanebimɔi nɛɛ ahetoo. Hetooi ni yɔɔ faŋŋ ni shɛjeɔ mɔ mii yɛ mli kɛha mɛi fɛɛ ni kɛ osharai ni tamɔ enɛ ekpe lɛ. Nɔ ni fe fɛɛ lɛ, ejieɔ hiɛnɔkamɔ ni yɔɔ miishɛɛ ni Nyɔŋmɔ ewo shi yɛ he, ni ji gbohiiashitee lɛ kpo.

Bɔni afee ni okase hiɛnɔkamɔ ni yɔɔ naakpɛɛ nɛɛ he nii babaoo lɛ, ofainɛ kanemɔ sane ni nyiɛ sɛɛ lɛ.