Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

ANI MƆ KO NI FEE?

Bonso Ni Hewolo Nyɛɔ Ejieɔ Muji Kɛjeɔ Ehe

Bonso Ni Hewolo Nyɛɔ Ejieɔ Muji Kɛjeɔ Ehe

Kakaradai kɛ nibii krokomɛi ni yɔɔ ŋshɔ mli ni kpɛtɛɔ meelei ashishi lɛ gbaa meelei anɔtsɛmɛi anaa waa. Nibii nɛɛ hãaa meelei lɛ anyɛ ajo foi, ehãa amɛfiteɔ pɛtro waa, ni ekolɛ, daa afii enyɔ lɛ, ebaabi ni afo nitsumɔ mli ni ayajie nibii nɛɛ fɛɛ yɛ meelei lɛ he. Jeŋ shikpalɔi miikwɛ akɛ amɛbaaná enɛ naa tsabaa kɛjɛ adebɔɔ nibii amli lo.

Susumɔ he okwɛ: Niiamlitaomɔ ehã ana akɛ bonso henɔ ko yɛ ni efiji kɛlɛ; ni kɛ́ muji ba ehewolo nɔ lɛ, ehewolo lɛ diɛŋtsɛ nyɛɔ ejieɔ. Gbɛi bibii komɛi yɛ ehewolo lɛ nɔ tamɔ bɔ ni ziŋele yɔɔ lɛ, shi gbɛi nɛɛ yɛ bibii tsɔ, no hewɔ lɛ, kakaradai kɛ ŋshɔŋ nibii nyɛɛɛ akpɛtɛ he. Mu ko yɛ gbɛi bibii nɛɛ amli ni hãaa ŋshɔŋ nibii nɛɛ akpɛtɛ he. Kɛ́ eejie ehewolo lɛ, eŋaa mu eshwieɔ ehe.

Jeŋ shikpalɔi eto akɛ amɛbaakwɛ bɔ ni bonso nɛɛ hewolo lɛ nyɛɔ ejieɔ muji kɛjɛɔ ehe lɛ nɔ amɛfee meelei ashishi nakai. Be ko ni eho lɛ, akɛ pɛnte henɔ ko kpaa meelei lɛ ashishi. Shi nyɛsɛɛ nɛɛ, agu pɛnte nɛɛ kɛnitsumɔ ejaakɛ ana akɛ, ebɔɔ loo pɔizin ko yɛ mli ni gbeɔ ŋshɔŋ loi. No hewɔ lɛ, niiamlitaolɔi ekpɛ amɛyiŋ akɛ, amɛkɛ dade yaa ko baaha meele lɛ shishi, he ni bui komɛi yɔɔ lɛ, ni ebaaŋa tsofa ko ni hãŋ ŋshɔŋ nibii nɛɛ anyɛ akpɛtɛ meelei lɛ ashishi. Kɛ́ tsofai nɛɛ bote ŋshɔ lɛ mli lɛ, efĩɔ tamɔ mu ni ehaa meele lɛ shishi fɛɛ. Kɛ́ be shwie mli lɛ, mu ni eha meele lɛ shishi lɛ tilɛ aaafee intsi 0.03 kpɔɔ, ni no hãa nɔ fɛɛ nɔ ni ekpɛtɛ he lɛ hu kpɔɔ. No sɛɛ lɛ, dade yaa lɛ ni ha meele lɛ shishi lɛ ŋaa mu kroko kɛhaa meele lɛ shishi ekoŋŋ.

Kakaradai hãaa meelei anyɛ ajo foi ni amɛjiemɔ hu wa

Niiamlitaomɔi ehã ana akɛ, enɛ baanyɛ agbɔ bɔ ni nibii nɛɛ kpɛtɛɔ meelei lɛ ashishi lɛ nɔ toi 100. Nitsumɔhei ni yɔɔ meelei lɛ baaná enɛ he sɛɛ waa, ejaakɛ kɛ́ meele bakpeleke ni abaajie nibii nɛɛ yɛ shishi lɛ, abɔɔ nyɔmɔ waa.

Te osusuɔ tɛŋŋ? Ani bonso nɛɛ hewolo ni nyɛɔ ejieɔ muji kɛjeɔ ehe lɛ ba kɛtsɔ sutsakemɔ nɔ? Aloo mɔ ko ni fee?