E TOTOKA dina na kedra roka nira vuka mai ena veikau loa! Era kurabuitaka sara ga qori na dausiko vanua mai Urope nira yaco yani e Merika e Loma kei Sauca Merika ena icavacava ni ika15 ni senitiuri. Era raica na manumanuvuka na macaw. Qo e dua na mataqali koki e balavu na buidra, ra qai kune ena vanua tunumaka ena yasayasa vakaMerika. Sega ni dede, sa tu na kedra itaba ena mape ni yasayasa qo me vakaibalebaletaka na kena kune na parataisi totoka.

E duatani na manumanuvuka qo oya ni totoka ruarua na kedrau roka na ka tagane kei na ka yalewa. Era manumanu vuku ra qai dau veimaliwai. E kaukaua na rorogo ni domodra, e dau watatagi tale ga. Ena dua na qele ni manumanuvuka qo, ena tiko kina e rauta ni 30. Era na biuta mai na nodra sova mera vuka vakamataka mera lai qara na sore ni vuanikau, vuata kei na so tale na kakana. E dau matau vei ira na koki mera vakayagataka nodra iqaso mera taura kina na kedra, oti era na qai tokia e gusudra. E rawa mada ga nira dolava na qa ni vuanikau kaukaua! Nira sa kana oti, era na vuka vata kece ena so na baba se bati ni uciwai mera baria na qele. Qo e rawa ni kauta laivi na gaga e tu ena kedra kakana, vakarautaka tale ga na ka ena yaga e yagodra.

Ena dua tu ga na kedra isa me yacova  nira mate, ra qai dau veitokonitaka na nodra qaravi na luvedra. Era dau vakasova ena qaraqara ni vunikau, ena qara ni bati ni uciwai kei na nodra bure na kadivuka, se qara ni barivatu. Qo na vanua era dau laurai kina nira vakayagataka tiko nodra itoki mera veivakasavasavataki kina vakataki ira. Ni qai vula ono na luvedra era sa rawa sara ni tubu lelevu, ia era na tiko ga kei na nodra itubutubu me rauta ni tolu na yabaki. E rawa ni 30 se 40 sara na nodra yabaki ni bula o ira era bula ena veikau, ia o ira na susugi e rawa ni sivia sara na 60 na yabaki ni nodra bula. E rauta ni 18 taucoko na kena mataqali, qo eso vei ira.