Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 VEIYASA I VURAVURA | VEIMALIWAI

Dikevi na Veimaliwai

Dikevi na Veimaliwai

Ni o qara ivakasala me baleta na veimaliwai, vakacava o na rai i liu ena iVolatabu, se qori na iotioti ni vanua o na gole kina? Dina ni ivola makawa, ia raica mada na vuku e tu kina ni vakatauvatani kei na vakadidike ni gauna qo.

IDIA

E kune ena dua na vakadidike ena 2014 nira vakabauta e onosagavulukadua na pasede na itabagone era yabaki 18-25 ni “sega tu ni dua na ka levu e Idia” na veiyacovi ni bera na vakamau. E tukuna nona rai e dua na vuniwai mai Mumbai ena niusiveva na Hindustan Times “ni vakaitau e sega ni kena ibalebale nira sa vakasamataka tiko na itabagone na vakamau. Se ra mani veiyacovi ga vakadua, veitau ga vagauna se ra mani bula vata sara, e sega ni vinakati sara mera solia kina nodra dina.”

ME VAKASAMATAKI: Vakacava na mate ca ni veiyacovi kei na lomabibi, e vu vakalevu mai na veiyacovi ni bera na vakamau se veiyacovi ena lomanibai ni vakamau?—1 Korinica 6:18.

DENMARK

Nira veiba vakalevu na vuvale, e rawa ni vakaruataki kina na iwiliwili ni mate koso vei ira na sa dua toka na itaba. Ena loma ni 11 na yabaki, era vakamuria toka na dauvakadidike ena dua na koronivuli ni vuli torocake na University of Copenhagen na nodra ivakarau ni bula e rauta ni 10,000 era sa dua toka na itaba. E laurai ni o ira era veiba wasoma kei ira na wekadra era rawa ni mate totolo, ni vakatauvatani kei ira na sega ni dau veiba wasoma. E kaya e dua e vakaitavi ena volai ni vakadidike qori ni “rawa ni vakalailaitaki na kedra iwiliwili na mate totolo” oya ke da kua ni lomaleqa se lomaocaoca vakasivia, da qai saga meda walia na veileti.

E KAYA NA IVOLATABU: “Na tamata kilaka e lewa vinaka na nona vosa, kei koya e yalomatua e yalomalua tiko ga.”—Vosa Vakaibalebale 17:27.

MERIKA

Era vakaitavi ena dua na vakadidike wale tiko ga qo e le 564 na veiwatini vou mai Louisiana. E laurai ni o ira na dau vagauna tu ga nodra veitau—ya nira sega ni dei ena gauna era veibuku tiko kina, ra tinia mada, oti se ra baci veilesuvi—era na rawa ni veibiu vakalekaleka ena loma ni lima na yabaki ni nodra bula vakawati. E vaka mera dau veiba tale ga vakalevu ra qai sega ni marautaka sara nodra bula vakawati.

E KAYA NA IVOLATABU: “Na ka sa vauca vata na Kalou [ena vakamau] me kua ni tawasea na tamata.”—Maciu 19:6.