Rawa ni Dei Nomu Veigauna se Bera Mai ke Vinaka Nomu iTovo?
Ena vica na senitiuri sa oti era nanuma e levu, ni na vinaka nodra veigauna se bera mai ke vinaka nodra itovo. Kena ivakaraitaki, e levu mai Esia era duavata kei na ka e tukuna na qasenivuli kilai levu o Confucius (551-479 B.G.V.) E kaya: “Kua ni cakava vei ira eso tale na ka o sega ni vinakata me caka vei iko.” *
NODRA VAKATULEWA E LEVU
Levu era vakabauta ke vinaka na nodra itovo, ena lai vinaka nodra veigauna se bera mai. Era saga gona mera veidokai, itovo vinaka, qarava vinaka nodra itavi ra qai saga tiko ga me vinaka nodra lewaeloma. E kaya e dua na yalewa o Lina mai Vietnam: “O na vakalougatataki ke o daudina qai vinaka nomu itovo.”
Eso e dau uqeti ira nodra lotu me vinaka nodra itovo. E tukuna e dua na tagane o Uraia e tiko mai Taiwan: “Ke vinaka na noda itovo eda na marau ena gauna eda mate kina. Ia ke sega, eda na lai vakararawataki.”
CAVA E YACO KINA?
Eda vakadinadinataka ni yaga vakalevu vei keda noda caka vinaka vei ira eso tale. Ia era raica e levu ni sega ni dau saumi lesu na ka vinaka era cakava vei ira eso tale. E kaya e dua na yalewa o Seini mai Ogo Kogo: “Na ka au sotava au raica kina ni sega ni dau yaga tu ga noda caka vinaka vei ira eso tale. Au solia noqu vinaka kece meu qarava noqu vuvale. Ia e leqa noqu vakawati, qai biuti keirau vakaveitinani o watiqu.”
Levu tale era raica nira sega ni tamata vinaka kece na daulotu. E kaya o Ema e tiko mai Japani: “Au lewena e dua na lotu qai dau tuvanaka na veika mera cakava na itabagone. Ia au kurabuitaka niu raica eso era itovo vakasisila, veivuvutaki, era butakoca mada ga na ilavo ni lotu.”
“Au solia noqu vinaka kece meu qarava noqu vuvale. Ia e leqa noqu vakawati, qai biuti keirau vakaveitinani o watiqu.”—SEINI, OGO KOGO
Era saga eso na daulotu me vinaka na nodra itovo. Ia toso na gauna era rarawataka ni sega ni saumi lesu na veika vinaka era dau cakava. Qori na ka sara ga e sotava e dua na yalewa o Vani mai Vietnam. E kaya: “Veisiga au na kauta na vuata, senikau, kei na kakana meu lai cabora vei ira na tukaqu era sa mate. Vica vata na yabaki noqu caka vinaka tu mai, au vakaitavi tale ga ena so na ivakarau ni sokalou. Ia e tauvimate bibi o watiqu, a mate tale ga o luvequ yalewa ni vuli tu mai vanuatani.”
Ena vinaka vakacava noda veisiga nimataka ke sega ni vakatau qori ena noda itovo vinaka? Ena sauma qori e dua na idusidusi e nuitaki. Eda na kila tale ga na sala me vinaka kina noda veisiga nimataka. Eda na raica i vei na idusidusi qori?
^ para. 2 Me ikuri ni ivakamacala i Confucius, raica na wase 7, parakaravu 31-35, ni vola Mankind’s Search for God, tabaka na iVakadinadina i Jiova. E tiko tale ga ena neimami website na www.jw.org.
Rawa ni o Wilika Tale ga
YADRA!
Vakaduiduitaka na Vinaka kei na Ca
Vakavulici ni luvemu me vakaduiduitaka na vinaka kei na ca ni qori ena vukei koya ena veigauna se bera mai me dei.
SAUMI NA TARO VAKAIVOLATABU
Na Cava na Vunau Koula?
Ni tukuna o Jisu na Vunau Koula, e vakavulica meda lomani ira na tamata kece ga, wili kina o ira na keda na meca.
NA VALE NI VAKATAWA
Era Sotava na Tamata Vinaka na Veika Ca—Na Vuna?
E vakamacalataka na iVolatabu e tolu na ka e vakavuna noda rarawa.
