Mai na icavacava ni 2025 ina itekitekivu ni 2026, e ratou vesu tale e va na tacida tagane ni ratou sega ni via lewena na mataivalu. E vakalawataki nira rawa ni vakaitavi ena tabana ni veiqaravi raraba ke ra sega ni curu ina mataivalu, ia era vakatulewataka ga na vakailesilesi me ratou vesu na tacida.

Ena ika18 ni Tiseba 2025, e vesu o Brother Oleksandr Shnyra qai totogitaki me tolu na yabaki e valeniveivesu ni sega ni via vakaitavi ena ivalu. E kerea me rogoci tale nona kisi, ia e kaya na mataveilewai na Starokostiantyniv District Court of the Khmelnytskiy Region ni cala o koya.

Ena ika22 ni Janueri 2026, e vesu o Brother Viktor Marko qai totogitaki me tolu na yabaki. Ena Noveba 2024, e vakatulewataki ena mataveilewai na Chortkiv District Court me vesu o Brother Viktor Marko. Ena Tiseba 2025, e veilewaitaki tale ena Ternopil Court of Appeal, ia e sega ni veisau na lewa e tau me baleti koya. E qaravi rau tiko nona itubutubu tabaqase o Victor, qo na ka e kaya: “Ena gauna au sotava tiko kina na ituvaki dredre qo, e solia vei au o Jiova na lomavakacegu e uasivia na kaukaua ni tamata. Au vakila niu sa qai veivolekati tiko ga kei koya.”

Ena ika28 ni Janueri 2026, e vesu o Brother Vasyl Kononchuk qai totogitaki me tolu na yabaki. Ni tau oti ga na kena itotogi e kau sara me lai vesu, dina ga ni sega ni dodonu me caka qori. E kaya o Vasyl: “Na ituvaki au sotava tiko e vaqaqacotaka noqu vakabauta. Qo e dua na ivakadinadina vinaka ina mataveilewai.”

Ena ika9 ni Feperueri 2026, e toso tale na kena itotogi o Brother Ihor Melnychenko. Dina ni a kerea o Ihor me vakaitavi ena tabana ni veiqaravi raraba ia era vakalewena lo na vakailesilesi na fomu me lewena na mataivalu, qai beitaki ni sega ni via muria na lewa ni mataivalu. E wawa veilewai tiko ena gauna qo, qai nanumi ni rawa ni totogitaki me tini na yabaki e valeniveivesu.

E ka ni marau me vakaraitaki yani ni sa sere o Brother Mykhailo ena Noveba 2025, ni waraka tiko nona veilewai.

Nida dua na vuvale vakayalo, eda masulaka me vakaukauataki ratou tiko na tacida qo o Jiova kei na nodratou vuvale, me solia tale ga na vuku kei na kilaka me rawa nira vosota.​—Aisea 33:6.