Wale tiko ga qo, rau vesu e rua tale na tacida tagane vei ira na vakailesilesi e Ukraine ni rau sega ni via curu ena mataivalu. E vakadonuya na yavu ni vakavulewa e Ukraine na nodra dodonu na lewenivanua ke ra sega ni via curu ena mataivalu ena vuku ni nodra vakabauta. Ia era se vesu tiko ga na tacida ena vanua qori ra qai biu e valeniveivesu nira sega ni via vakaitavi kina.

Ena ika28 ni Me 2025, e totogitaki ena mataveilewai na Starokostiantyniv District Court of the Khmelnytskiy Region, o Brother Oleksandr Shnyra e yabaki 33, me tolu na yabaki e valeniveivesu, ni sega ni via curu ena mataivalu. A vesu tiko e nona vale ena gauna e kerea kina me rogoci tale nona kisi. Qo na ka e tukuna ni vukei koya kei na watina o Hanna me rau vosota: “E vakayaloqaqataki keirau na veivosa e tukuni ena 1 Korinica 15:​58, me keirau ‘tudei, kua ni yavala, qai vakaitavi vakalevu ena cakacaka ni Turaga.’ Keirau ogaoga tiko ga ena ka vakayalo, qai cakava na ka keirau rawata me vukei ira na lewe ni ivavakoso.”

O Brother Hennadii Barabash e yabaki 48, e rua na luvena lalai. E kau vakaukaua ena dua na keba ni mataivalu, qai sega ni kila ni sa biu na yacana me vakaitavi ena ivalu. Ia e sega ni via cakava qori, e mani totogitaki ni talaidredre vua na turaganivalu. Ena ika10 ni June 2025, e kaya na mataveilewai na Lychakivskyi District Court ena siti o Lviv, me vesu o Hennadii, me wawa veilewai. E kaya: “Au nuitaki Jiova. Au vakadeitaka ni na sega ni biuti au. Niu vakasamataka vakatitobu na nona yalayala kei na noqu dau masu vagumatua, e vukei au meu yaloqaqa qai tudei tiko ga.”

Meda masulaki ira tiko ga na tacida e Ukraine nira yaloqaqa mera muria na ivakaro i Jisu, nira “sega ni vakavuravura.”​—Joni 17:16.