Ena Me 2026, ratou vesu tale e le vitu na iVakadinadina i Jiova e Ukraine, ni ratou sega ni via vakaitavi ena ivalu. E sega ni vakadonuya na matanitu mera vakaitavi ena taba ni veiqaravi raraba, dina ga ni vakadonui vakalawa. Era mani vesu kina e 30 na tacida.

Ena matai ni Me 2026, a vakarota e dua na mataveilewai ena yasayasa o Lviv me vesu o Brother Tiberii Boiok, e yabaki 42, ena sega ni sere ke mani sauma mada ga na ilavo. Ni bera ni vesu o Tiberii, e kaya : “Au vesu niu talairawarawa vei Jiova. Ena ituvaki dredre qo, au vinakata meu yalodina tiko ga vei Jiova qai vunautaka na yacana vei ira eso tale.

Ena ika5 ni Me, e kaya e dua tale na mataveilewai ena yasayasa o Lviv, ni na vesu qai wawa veilewai o Brother Artur Miroshkin, e yabaki 30. Ena ika8 ni Me, rau vesu tale ga o Brother Denys Havranyk, e yabaki 28, kei Brother Bohdan Rohov, e yabaki 25 mai na yasayasa o Zakarpattia. Ena sega ni vakadonui me rau sere ke rau sauma mada ga na ilavo.

Ena ika14 ni Me, e vakatulewataka na mataveilewai na Mykolaiv Court of Appeal me vesu me ono na yabaki o Brother Volodymyr Klementiev, e yabaki 42. Mai na gauna e tekivu kina na ivalu e Ukraine, qo e dua na itotogi balavu duadua. Ena ika15 ni Me, e vakatulewataka e dua na mataveilewai ena yasayasa o Lviv me vesu o Brother Roman Sarhosh, e yabaki 34, qai sega tale ga ni vakadonui me sere ke sauma mada ga na ilavo. E kaya o Brother Roman: “Ena veiyabaki sa sivi, e vesu o noqu tutu vakarua, noqu tutu kei noqu ta, ena vuku ni nodratou vakabauta. E ka dokai gona vei au meu vakatotomuria nodratou ivakaraitaki ni yalodina vei Jiova.”

Ena ika23 ni Me, e vakarota e dua na mataveilewai ena yasayasa o Odesa me vesu tu qai wawa veilewai o Brother Artem Voroniuk, e yabaki 28.

Ena ika6 ni Me 2026, e kaya na Mataveilewai Cecere e Ukraine ni na sega ni qai vesu me tolu na yabaki o Brother Roman Kvik. Ia ena sere qai dikevi tiko nona kisi me rua na yabaki, me laurai ke muria tiko na ivakaro ni mataveilewai. Ni tau oti ga na lewa qori, e marautaki ni sota tale o Brother Roman kei na nona vuvale kei ira na nona itokani. Ni sere oti, e kaya: “Au vakavinavinakataka na levu na sala e tokoni au kina o Jiova ena gauna au vesu tu kina, vaka ga me taura tiko na ligaqu. E sega wale ga ni Tamaqu o Jiova, ia e itokani dauloloma qai dauveikauaitaki.”

Nida dua na vuvale e vuravura raraba, eda na masulaki ira tiko ga na tacida ni vakatovolei nodra tawaveitovaki. Nira yalodina qai nuitaki Jiova tiko na tacida qo kei na nodra vuvale, eda kila ni o Jiova ena vakadeitaka me “vukei ira qai nodra isasabai.”​—Same 115:9.