Ena ika13 ni Okosita 2023, e sevutaka o Brother Charles Fonseca, e lewe ni Komiti ni Tabana e Mozambique, na ivola The Bible—The Good News According to Matthew ena vosa vakaPhimbi. Qo na imatai ni ivola ena iVolatabu me tabaki ena vosa vakaPhimbi. E sevutaki ena soqo ni veiwasewase ni 2023, e kena usutu “Vakaraitaka na Vosota!” E caka na soqo qori ena koro o Fingoe, ra qai tiko kina na le 3,055. E veisoliyaki na kena ilavelave tabaki, qai rawa tale ga ni download ena iyaya vakalivaliva.

E vosataki vakalevu na vosa vakaPhimbi ena ra ni yasana o Tete e Mozambique, volekati Zambia. Era vosataka e sivia na 100,000 na lewenivanua. Era veiqaravi e le 897 na dautukutuku ena 20 na ivavakoso vosa vakaPhimbi kei na 2 na iwasewase lailai. E kaya e dua na mata mai na valenivolavola ni tabana e Mozambique, “Keimami marautaka vakalevu ni sa rawa nira vakayagataka na tacida era vosa vakaPhimbi na ivola i Maciu ena nodra vosa.”

Eda marau vata kei ira na tacida era vosa vakaPhimbi ni soli vei ira na iloloma talei qo e vakadeitaka vei ira kei na so tale na “yalomalua” na ka e yalataka o Jisu ena veigauna se bera mai.—Maciu 5:5.