Raica sara na lewena

E Tiko Nomuni iVolatabu na iVakadinadina i Jiova?

E Tiko Nomuni iVolatabu na iVakadinadina i Jiova?

Ni keimami vulica na iVolatabu keimami vakayagataka e levu na vakadewa. Ia ke sa tabaki ena neimami vosa na vakadewa ni New World Translation, keimami na vakayagataka ni volai kina na yaca ni Kalou, e donu, qai matata.

  • Volai kina na yaca ni Kalou. Eso era tabaka na iVolatabu era sega ni rokovi koya e vakavuna na kena volai. Kena ivakaraitaki, e volai ena dua na vakadewa na yacadra e 70 vakacaca era veitokoni ena kena tabaki. Ia na iVolatabu vata qori e sega sara ga ni volai kina na yaca ni Kalou o Jiova, o koya e vakavuna!

    E duidui sara na New World Translation ni volai kina na yaca ni Kalou ena vica vata na udolu na vanua me vaka e laurai ena ilavelave taumada ni iVolatabu. E sega tale ga ni volai kina na yacadratou na lewe ni komiti e vakarautaka na vakadewa qo.

  • Donu. Na vakadewa kece e sega ni vakadewataka vakadodonu na ka e volai ena ilavelave taumada. Kena ivakaraitaki, e volai ena dua na vakadewa na Maciu 7:13: “Dou curu ina matamata qiqo, ni rabailevu na matamata i eli qai rawarawa na kena sala.” Ia na ilavelave taumada e volai kina na vosa “rusa,” sega ni “eli.” De dua era biuta na dauvakadewa na vosa “eli” nira vakabauta nira na vakararawataki tawamudu na tamata ca ena bukawaqa i eli. E sega ni tokona na vakasama qori na iVolatabu. E donu gona na vakadewa ni New World Translation: “Dou curu ina matamata qiqo, ni rabalevu na matamata qai galala na sala e basika ina rusa.

  • Matata. Na vakadewa vinaka e sega wale ga ni donu, ia me matata qai kilai rawarawa. Dikeva e dua na kena ivakaraitaki. Na yapositolo lotu vaKarisito o Paula e vakayagataka ena Roma 12:11 e dua na matavosa ke vakadewataki vakadodonu, e kena ibalebale “me buebue na yalo.” Ia e sega ni vakaibalebale ena vosa vakavalagi na vakadewa qori. E vakadewataka gona vakarawarawa na New World Translation me matata. E kaya ni dodonu me ‘uqeti keda na lotu vaKarisito na yalo tabu.’

E duidui gona na vakadewa ni New World Translation ni volai kina na yaca ni Kalou, e donu, qai matata. Ia e dua tale na ka e duidui kina ni sega ni volitaki. Rawa gona nira wilika na iVolatabu e vica vata na milioni ena nodra vosa ga, wili kina o ira na sega ni volia rawa e dua na iVolatabu.