Pilipo 2:1-30
2 2:1-2 Critoba bãrã crĩchara careba ɓʉ bẽrã, idji quĩrĩãba bãrã sora biabi ɓʉ bẽrã, Ãcõrẽ Jaurera bãrã ume ɓʉ bẽrã, idjia bãrãra quĩrĩã ɓʉ bẽrã, idjaɓa quĩrã djuburia ɓʉ bẽrã mʉ̃ra nãwã bio ɓʉsriɗabiɗadua: aɓari crĩchada eroɓeaɗadua, dji quĩrĩã pananadua, idjaɓa aɓari crĩchaɗeba jũma oɗadua.
2 –
3 Djãrã cãyãbara biara ɓeada crĩcha panʉneba ni cãrẽ siɗa orãnadua. Idjaɓa orãnadua aɓabe bãdji iteabʉrʉ bia ɓeaɗi carea. Ãtebʉrʉ crĩchaɗadua dewararãda bãrã cãyãbara biara ɓeada.
4 Ara bãdjiza bia ɓeaɗi carea jʉrʉrãnadua, ãtebʉrʉ jʉrʉɗadua djãrã siɗa bia ɓeaɗamãrẽã.
5 Jesucritoba crĩcha ɓaɗa quĩrãca crĩchaɗadua:
6 Idjira Ãcõrẽmĩna Ãcõrẽca ɓaida crĩchaca basía.
7 Ãtebʉrʉ idji baɗada idu ɓʉsia nezoca bai carea. Maʉ̃be dadjirã quĩrãca naʉ̃ djaraɗe ɓesia.
8 Maʉ̃be eɗaara ɓesia. Ãcõrẽba beuida ɓʉaɗa asiɗe idjia ĩjã osia. Cruɗe bia mĩga beuimĩna ĩjã osia.
9 Maʉ̃ carea bajãne Ãcõrẽba idjira dji dromaara ɓʉsia. Idjira jũmarã Boroda ɓʉsia.*
10 Mãwã jũma bajãne ɓeara, naʉ̃ ẽjũãne ɓeara, beuɗarã panabadama ɓearã siɗa Jesu quĩrãpita chĩrãboroɗe coɓeaɗia.
11 Maʉ̃ne jũmarãba ebuɗa jaraɗia Jesucritora jũmarã Boroda idjaɓa jũmarãda dadjirã Zeza Ãcõrẽa bia beɗeaɗia.
Djabarã naʉ̃ ẽjũãne sãwã ɓeaɗida panʉ
12 Mʉ̃ djabarã, mʉ̃ bãrã ume ɓaɗaɗeba ʉ̃taa Ãcõrẽ beɗeara ĩjã o panʉa. Iɗi mʉ̃ra bãrã ume ɓʉẽ́mĩna Ãcõrẽ bio waya panʉneba ĩjã o pananadua idjia bãrãra ẽdrʉ edaɗa bẽrã.
13 Ãcõrẽbʉrʉ bãrãra careba ɓʉa idjia quĩrĩã ɓʉra o pananamãrẽã idjaɓa mãwã o quĩrĩã ɓeaɗamãrẽã.
14 Idarraɗaẽ́ne, caicayaɗaẽ́ne jũma oɗadua.
15 Mãwã bãrãra biẽ́ jaraɗi neẽ́ ɓeaɗia idjaɓa jipa ɓeaɗia. Ẽberãrã bio cadjirua obada tãẽna panʉmĩna cadjirua neẽ́ ɓeaɗadua. Ãcõrẽ warrarã bẽrã ãdjirã tãẽna chĩdau udjizua ɓea quĩrãca panʉa.
16 Beɗea zocai ɓaiɗebemada ãdjirãa ebuɗa cawabi pananadua. Mãwã Crito zebʉrʉɗe mʉ̃ra bãrã carea ɓʉsriɗaya. Maʉ̃ne mʉ̃a cawaya mʉ̃dji quĩrĩãbe nĩbaẽ́ basida idjaɓa mʉ̃dji quĩrĩãbe trajaẽ́ basida.
17 Dãrãẽ́ne mʉ̃ra Crito carea beaɗisicada. Mãwã uva ɓa Ãcõrẽa wea diaɗa quĩrãca ɓaya. Idjaɓa bãrãba Crito ĩjã panʉra animarã Ãcõrẽa babue diaɗa quĩrãca ɓʉa.* Maʉ̃ carea mʉ̃ra bãrã ume bio ɓʉsriɗa ɓʉa.
18 Ara maʉ̃ quĩrãca bãrã siɗa mʉ̃ ume ãbaa ɓʉsriɗa ɓeaɗida panʉa.
Timoteo idjaɓa Epaprodito
19 Dadjirã Boro Jesuba quĩrĩãsira mʉ̃a Timoteoda isabe bãrãmaa wãbiya. Mãwã idji wayacusa mʉ̃maa zebʉrʉɗe mʉ̃ siɗa ɓʉsriɗa ɓaya bãrã sãwã duanʉda cawai bẽrã.
20 Nama mʉ̃ ume idji quĩrãca ɓʉda dewara neẽ́a. Idjia bãrãra wãrãda careba quĩrĩã ɓʉa.
21 Jũmarãba ara ãdji bia ɓeaɗida jʉrʉbadaa Jesucritoba quĩrĩã ɓʉ jʉrʉɗi cãyãbara.
22 Baribʉrʉ bãrãba cawa panʉa Timoteoba biada obarida. Warraba idji zeza carebabari quĩrãca idjia beɗea bia Critoɗebemada careba jaradia ɓʉa.
23 Mʉ̃ sãwã oɗida cawasira Timoteora bãrãmaa diabueida crĩcha ɓʉa.
24 Baribʉrʉ crĩcha ɓʉa dadjirã Boroba mʉ̃ra carebaida dãrãẽ́ne mʉ̃ siɗa bãrãmaa wãmãrẽã.
25 Bãrãba djaba Epaproditoda mʉ̃ carebamãrẽã diabuesiɗaa. Idjia mʉ̃ ume aɓarica Ãcõrẽ beɗeara jaradia ɓʉa sordao djõ ɓʉ quĩrãca. Nawena mʉ̃a idjira jẽda wãbiya.
26 Idjia bãrãra wãrãda unu quĩrĩã ɓʉa. Idjira bio sopua ɓʉa, bãrãba idji cacua biẽ́ ɓʉda ũrĩsiɗaɗe sopuasiɗa bẽrã.
27 Wãrãda idjira cacua biẽ́ ɓasia. Berara beusia. Baribʉrʉ Ãcõrẽba idjira quĩrã djuburiasia. Aɓabe idjida quĩrã djuburiaẽ́ basía, ãtebʉrʉ mʉ̃ siɗa quĩrã djuburiasia wetara sopuarãmãrẽã.
28 Maʉ̃ bẽrã mʉ̃a idjira isabe jẽda wãbi quĩrĩã ɓʉa bãrãba idji unubʉdaɗe wayacusa ɓʉsriɗaɗamãrẽã. Mãwã mʉ̃ra bãrã carea mãcua sopua ɓaẽ́a.
29 Idjira bio ɓʉsriɗa edaɗadua dadjirã Boro Jesucritoɗe bẽrã. Idjida, djabarã idji quĩrãca ɓea siɗa bia wayaɗadua.
30 Critoba obi ɓʉ carea idjira berara beusia. Bãrãba jãmaʉba mʉ̃ carea poya oɗaẽ́ panʉda idjia beui adua osia.
