Numero 12:1-16
12 Mariaba, Aaroʉ̃ biɗa ãdji djaba Moiseda biẽ́ jara panesiɗaa ãĩbema wẽrã edaɗa carea.*
2 Ãdjia nãwã jarasiɗaa:
–¿Ãcõrẽra aɓabe Moiseɗeba beɗeabarica? ¿Dadjiɗeba biɗa beɗeacaca?–
Mãwã beɗea panʉra Ãcõrẽba biẽ́ ũrĩsia.
3 (Jũma naʉ̃ ẽjũãne Moisera dji dromaara ɓai crĩchara neẽ́ ɓasia.)
4 Ara maʉ̃da Ãcõrẽba Moisea, Aaroʉ̃a, Mariaa biɗa jarasia:
–Bãrã ũbea mʉ̃ wua demaa zeɗadua.–
Ara maʉ̃da wãsiɗaa.
5 Maʉ̃ne Ãcõrẽra jʉ̃rãrã ʉ̃tʉba eɗaa drasoa jira ɓʉɗe eɗaa zesia idji wua deɗe eɗa wãbadamaa. Mama Aaroʉ̃ra Maria siɗa caitaara trʉ̃sia. Ara maʉ̃da caitaara wãsiɗaa.
6 Maʉ̃be Ãcõrẽba ãdjía jarasia:
–Mʉ̃a jarabʉrʉda bio ũrĩnadua. Mʉ̃neba beɗeabadarã bãrã tãẽna ɓea ume mʉ̃ra cãĩmocaraɗeba idjaɓa cãĩmocara quĩrãca ne unubi ɓʉɗeba beɗeabaria.
7 Baribʉrʉ mʉ̃ nezoca Moise ume mãwã beɗeacaa. Jũma mʉ̃ ẽberãrã cãyãbara idjiabʉrʉ mʉ̃ra biara ĩjã ɓʉa.*
8 Idji ume mʉ̃ra nẽbʉrʉbaria. Ne jara ɓʉɗeba idji ume beɗeacaa. Ãtebʉrʉ ebuɗa jarabaria. Idjia mʉ̃ra unubaria. Mãwã ɓʉ bẽrã ¿bãrãba cãrẽ cãrẽã wayaɗaẽ́ basi mʉ̃ nezoca Moisera biẽ́ jaraɗi carea?–
9 Ãcõrẽra ãdji ume bio quĩrũpeɗa wãsia.
10 12:10-11 Ãcõrẽ wua demaʉba jʉ̃rãrã ʉ̃taa wãbʉrʉɗe Mariara aiɗaba bira nũmesia.* Maʉ̃ unusiɗe Aaroʉ̃ba Moisea nãwã beɗea djuburiasia:
–Mʉ̃ boro, mʉ̃ quĩrã djuburia daiba crĩchaɗaẽ́ne cadjirua opeɗaɗara quĩrãdoadua.
12 Maria cacuara idu jũma ãrĩ ɓebirãdua warra ʉradʉgaɗa quĩrãca.–
13 Ara maʉ̃da Moiseba Maria carea Ãcõrẽa quĩrã djuburiada nãwã iwiɗisia:
–Ãcõrẽ, mʉ̃ quĩrã djuburia mʉ̃ djabawẽrã Mariara biabidua.–
14 Ãcõrẽba panusia:
–Idji zezaba cawa obʉrʉɗe idji quĩrãdarraɗe iɗoɗabara, ¿siete ewari puru jĩga ɓʉɗaẽ́ bacasiɗaca quĩrã peramãrẽã?* Ara maʉ̃ quĩrãca bãrãba idjira siete ewari puru jĩga ɓʉɗida panʉa. Mãwãnacarea poya jẽda zeya.
15 Ara maʉ̃da israelerãba Mariara puru jĩga ɓʉɗe wãsiɗaa siete ewari mama ɓamãrẽã. Maʉ̃ siete ewariɗe israelerãra nocoɗaa wãnaẽ́ basía aɓa Maria jẽda zebʉrʉɗaa.
16 Zeɗacarea Hazeroɗeba Paraʉ̃ ẽjũã põãsa ewaraga ɓʉɗe jũẽne wãsiɗaa.
Beɗea eɗaare
^ 12:1 Ãĩbema wẽrã. Hebreo beɗeaɗe ɓʉ́ ɓʉa: “Cusita wẽrã.” Ebuɗa ɓʉẽ́a maʉ̃ wẽrãra Seporá basida wa Moiseba dewarada edasida.
^ 12:7 Idjiabʉrʉ mʉ̃ra biara ĩjã ɓʉa. Ʉ̃cʉrʉmaarã nãwã jara ɓʉa: “Mʉ̃ purura idjía diasia wagamãrẽã.”
^ 12:10-11 Mariara aiɗaba bira nũmesia. Hebreo beɗeaɗe ɓʉ́ ɓʉa: “Mariara aiɗaba nieve quĩrãca ɓasia.”
^ 12:14 Aɓaʉba djãrã quĩrãdarraɗe iɗosira maʉ̃ ẽberãra Ãcõrẽ quĩrãpita biẽ́ ɓesia.
