Levitico 1:1-17
1 Ãcõrẽba idji wua deɗeba Moisea jarasia:
2 –Israelerãa nãwã jaradua: “Aɓaʉba idji animarãnebemada Ãcõrẽa diaibʉrʉ, pacada, ovejada, wa chiwatuda diaida ɓʉa.
3 Pacada babue diaibʉrʉ, dji umaquĩrãdrʉ diaida ɓʉa. Maʉ̃ pacara jũma bia ɓaida ɓʉa. Maʉ̃ra Ãcõrẽ wua deɗe eɗa wãbadamaa edeida ɓʉa idjia diabʉrʉra Ãcõrẽba bia unumãrẽã.
4 Dji diabʉrʉba idji jʉwara paca boro ʉ̃rʉ̃ ɓʉida ɓʉa. Mãwã Ãcõrẽba maʉ̃ pacara dji ẽberã cacuabari edaya idjia cadjirua oɗa quĩrãdoai carea.
5 Maʉ̃be Ãcõrẽ quĩrãpita pacara o ʉrrãgo beaida ɓʉa. Maʉ̃ne Aaroʉ̃ warrarã sacerdoterãba dji oara piaɗapeɗa animarã babue diabada orroza jĩãpoɗida panʉa Ãcõrẽ wua de quĩrãpe.
6 Dji diaɗaba pacara epapeɗa, drapetapeɗa tʉcuaida ɓʉa.
7 Mãwã o ɓʉɗe sacerdote Aaroʉ̃ warrarãba animarã babue diabada ʉ̃rʉ̃ tʉbʉra uruga nũmʉnida panʉa.
8 8-9 Dji diaɗaba paca jʉ̃sira, dji jĩrũ siɗa baidoba sʉgʉida ɓʉa. Sʉgʉɗacarea Aaroʉ̃ warrarã sacerdoterãba maʉ̃gʉra, dji animarã tʉcuaɗara, dji borora, dji draga siɗa animarã babue diabadaɗe tʉbʉ uruga nũmʉ ʉ̃rʉ̃ ɓʉɗapeɗa jũma babue diaɗida panʉa. Maʉ̃ paca babue diabʉrʉra Ãcõrẽba bia unuya.*
10 Aɓaʉba idji animarãnebema ovejada wa chiwatuda Ãcõrẽa babue diaibʉrʉ, dji umaquĩrãdrʉ diaida ɓʉa. Maʉ̃ animarãra jũma bia ɓaida ɓʉa.
11 Maʉ̃ra Ãcõrẽ quĩrãpita animarã babue diabada jʉwa araare o ʉrrãgo beaida ɓʉa. Maʉ̃ne Aaroʉ̃ warrarã sacerdoterãba dji oara piaɗapeɗa animarã babue diabada orroza jĩãpoɗida panʉa.
12 1:12-13 Dji diaɗaba animarãra drapetapeɗa tʉcuaida ɓʉa. Tʉcuapeɗa dji jʉ̃sira, dji jĩrũ siɗa baidoba sʉgʉida ɓʉa. Maʉ̃gʉra, dji animarã tʉcuaɗara, dji borora, dji draga siɗa sacerdoteba animarã babue diabadaɗe tʉbʉ uruga nũmʉ ʉ̃rʉ̃ ɓʉpeɗa jũma babue diaida ɓʉa. Maʉ̃ animarã babue diabʉrʉra Ãcõrẽba bia unuya.
14 Aɓaʉba ĩbanada Ãcõrẽa babue diaibʉrʉ, puchirãda wa putujuda diaida ɓʉa.
15 Sacerdoteba maʉ̃ ĩbanara animarã babue diabadamaa edepeɗa otapuya beaida ɓʉa. Beapeɗa dji borora animarã babue diabadaɗe babueida ɓʉa. Dji oara animarã babue diabada orroɗe zowuabida ɓʉa.
16 Maʉ̃be caraɓapeɗa, jẽsapeɗa dji jʉ̃sida, dji cara siɗa animarã babue diabada orrocawa ɓʉida ɓʉa dji tʉbʉ pora ɓʉmaa.* Dji tʉbʉ porara animarã babue diabada ʉ̃mãdau odjabariare ɓʉa.
17 Maʉ̃be dji iɗe jidapeɗa ĩbanara drawe ewara coɓʉida ɓʉa. Mãwã coɓʉpeɗa animarã babue diabadaɗe babue diaida ɓʉa. Maʉ̃ ĩbana babue diabʉrʉra Ãcõrẽba bia unuya.”–
