Hebreo 6:1-19
6 6:1-2 Maʉ̃ bẽrã nocoɗaa wãnia Critoda biara cawaɗi carea. Dadjirãba idjiɗebema naãrã cawapeɗaɗa awa jaradiaɗaẽ́a. Wayacusa jaradiaɗaẽ́a cadjirua o panʉ carea beuɗida panʉda, cadjirua igaraɗapeɗa Ãcõrẽmaa zeɗida panʉda, Ãcõrẽ ĩjãninebemada, borocueɗiɗebemada, djabarã ʉ̃rʉ̃ jʉwa ɓʉɗiɗebemada, beuɗarã ʉ̃rẽbaɗiɗebemada, idjaɓa Ãcõrẽba cawa oɗarã ewariza bia mĩgaɗiɗebema siɗa.
2 –
3 Ãcõrẽba quĩrĩã ɓʉbʉrʉ, jũma maʉ̃gʉɗebemada wayacusa jaradiaɗi cãyãbara dadjirãra nocoɗaa wãnia Critoda biara cawaɗi carea.
4 Ʉ̃cʉrʉba wãrã beɗeara cawa panasiɗaa. Ãcõrẽba dia ɓʉ carea ɓʉsriɗa panasiɗaa. Idji Jaureɗeba ne edasiɗaa.
5 Idji beɗea bio bia ɓʉda, idji ʉɓʉa nocoarebema ewariɗe unubi siɗa cawa panasiɗaa.
6 Ãdjirãba Critoda igarapeɗaɗa bẽrã wayacusa poya jẽda idjimaa zeɗaẽ́a. Zesiɗara Ãcõrẽ Warra wayacusa cruɗe cachibʉda quĩrãca idjiɗebemada jũmarãa biẽ́ beɗeabiɗia.
7 Cue zebʉrʉza egoroba dobaria. Maʉ̃ba egoro biaɗe ne uɗara dji uɗa itea bia zaubaria. Ãcõrẽba maʉ̃ ẽjũãra bia jarabaria. Crito igaraẽ́ ɓeara maʉ̃ ẽjũã quĩrãca panʉa.
8 Baribʉrʉ cue zeɗacarea ʉrʉda, chirua cadjirua siɗa tunuibʉrʉ, maʉ̃ egorora biẽ́ ɓʉa. Ãcõrẽba maʉ̃ ẽjũãra biẽ́ jarapeɗa jĩrũare jũma babueya. Crito igara ɓeara maʉ̃ ẽjũã cadjirua quĩrãca panʉa.
9 Djabarã, daira mãwã beɗea panʉmĩna cawa panʉa Ãcõrẽba bãrãra ẽdrʉ edaɗa bẽrã o biaɗe wãbʉdada.
10 Ãcõrẽra jipa ɓʉ bẽrã bãrãba bia o panʉra idjaɓa idji quĩrĩã panʉra quĩrãdoaẽ́a. Idji ẽberãrã careba panʉneba unubisiɗaa idjira quĩrĩã panʉda. Iɗi biɗa careba panʉa.
11 Daiba quĩrĩã panʉa bãdjiza mãwã o pananida aɓa beubʉdaɗaa. Mãwãbʉrʉ bãrãba Ãcõrẽneba edaɗi carea jʉ̃ã panʉra jũma edaɗia.
12 Daiba quĩrĩãnaẽ́a bãrãra coa ɓeaɗida, ãtebʉrʉ quĩrĩã panʉa bãrãra dewararã djabarã quĩrãca ɓeaɗida. Ãdjirãba Critoda ĩjã panʉ bẽrã idjaɓa jũma droa panʉ bẽrã, Ãcõrẽba diai jaraɗara jũma edaɗia.
Ãcõrẽba beɗea ɓʉɗara wãrãda oya
13 Ãcõrẽ cãyãbara dji dromaara ɓʉda neẽ́a. Maʉ̃ bẽrã Abrahaʉ̃ ume beɗea ɓʉsiɗe ara idji trʉ̃neba wãrãda carebayaɗa asia.
14 Nãwã jarasia: “Wãrãda mʉ̃a bʉra carebaya idjaɓa bʉɗeba zocãrã yõbiya.”*
15 Abrahaʉ̃ba jũma droa ɓʉɗeba jʉ̃ã ɓapeɗa Ãcõrẽba warra diai jaraɗada unusia.
16 Ẽberãrãba wãrãneba jarabʉdaɗe ãdji cãyãbara dji dromaara ɓʉ trʉ̃neba mãwã jarabadaa. Maʉ̃ne ni aɓaʉba poya sewaaɗa aɗacaa.
17 Ara maʉ̃ quĩrãca Ãcõrẽba ebuɗa cawabi quĩrĩãsia idjia diai jaraɗa edaɗi ẽberãrãba maʉ̃ra wãrãda edaɗida idjaɓa idjia crĩcha ɓʉ quĩrãca wãrãda obarida. Maʉ̃ carea ara idji trʉ̃neba diayaɗa asia.
18 Ãcõrẽra sewa oca bẽrã idjia diai jaraɗara wãrãda diaya idjaɓa idji trʉ̃neba jaraɗara quĩrã awara oẽ́a. Maʉ̃ bẽrã Ãcõrẽba dadjirã waga ɓamãrẽã jʉrʉsiɗaa. Idjia jaraɗara wãrãda oida cawa panʉ bẽrã dadjirãba poya sozarra ĩjã panania. Maʉ̃ba Jesuɗeba edaɗi carea jʉ̃ã panʉra quenaɓariɗaẽ́a.
19 6:19-20 Dadjia jʉ̃ã panʉra wãrãda edaɗida cawa panʉa. Maʉ̃ba dadjirãra careba ɓʉa bio ĩjã pananamãrẽã anclaba barco ero ũmabari quĩrãca. Dadjia jʉ̃ã panʉra wãrãda edaɗida cawa panʉa Jesura bajãnaa dadjirã na wãna bẽrã. Idjira Ãcõrẽ deɗe wuaba eatʉ jira ɓʉ eɗaare wãsia dadjirã carebai carea. Mama idjira dadjirã Sacerdote dji Dromada ɓesia Melquisedé ɓaɗa quĩrãca. Ewariza mãwã ɓʉa.
Beɗea eɗaare
^ 6:14. Genesi 22:17.
