Esdra 6:15-22
15 Darío sei poa Persiaɗebema boroda ɓeɗacarea Adar jeɗecoɗe ewari ũbeaɗe israelerãba Ãcõrẽ de dromara pãrãsiɗaa.*
16 Pãrãpeɗaɗacarea jũma dji Babilonianeba zepeɗaɗa israelerãba, sacerdoterãba, levitarã biɗa Ãcõrẽ de dromara ɓʉsriɗa jʉrasiɗaa.
17 Jʉrasiɗaɗe paca zaque dji umaquĩrãda cien, oveja dji umaquĩrãda dosciento, idjaɓa oveja zaquerãda cuatrociento Ãcõrẽa babue diasiɗaa. Maʉ̃ awara ãdjia cadjirua opeɗaɗa carea chiwatu dji umaquĩrãda doce babue diasiɗaa.* Israelɗeba doce puru yõpeɗaɗa carea aɓa aɓa babue diasiɗaa.
18 Maʉ̃be Moise cartaɗe ɓʉ́ ɓʉ quĩrãca Jerusaleʉ̃ne sacerdoterãba Ãcõrẽ de dromane trajaɗida panʉ ewarida ãdjiɗe cawacawa ɓʉsiɗaa. Levitarã biɗa trajaɗida panʉ ewarida ãdjiɗe cawacawa ɓʉsiɗaa.
19 Maʉ̃be Babilonianeba jẽda zepeɗaɗa israelerãba dewarabema poaɗe dji nabema jeɗecoɗe ewari catorceɗe ãdji Egiptoɗeba ẽdrʉpeɗaɗa quĩrãnebabada ewarida osiɗaa.*
20 Naãrã sacerdoterãba, levitarã biɗa Ãcõrẽ quĩrãpita bia duanani carea jũma osiɗaa. Maʉ̃ bẽrã levitarãba animarã maʉ̃ ewari dromane beaɗida panʉra beasiɗaa jũma Babilonianeba jẽda zepeɗaɗarã itea, ãdji djabarã sacerdoterã itea idjaɓa ara ãdjirã itea biɗa.
21 Maʉ̃be jũma Babilonianeba jẽda zepeɗaɗa israelerãba maʉ̃ ewariɗe cobadara cosiɗaa. Dewararã biɗa cosiɗaa, ãdji caita ɓea puruba cadjirua obadara igaraɗapeɗa israelerã Ãcõrẽda ẽpẽ panena bẽrã.
22 Siete ewari paʉ̃ ẽsãbari neẽ́ cobada ewarida ɓʉsriɗa osiɗaa. Ãcõrẽba ãdjirãra bio ɓʉsriɗabisia. Idjia Persiaɗebema boroa ãdjirãda bia unubiɗa bẽrã dji boroba israelerã Ãcõrẽ de dromada careba osia.*
Beɗea eɗaare
^ 6:15 Dadjirãba jeɗeco juachabada quĩrãca maʉ̃ Adar jeɗecora febreroɗe wa marzoɗe ɓaebaria.
^ 6:17 Levitico capítulo 3.
^ 6:19 Levitico 23:4-8
^ 6:22 Persiaɗebema boro. Hebreo beɗeaɗe ɓʉ́ ɓʉa “Asiriaɗebema boro.” Mãwã jara ɓʉa Persiaɗebema boroba Asiria druada idji jʉwaeɗa eroɓaɗa bẽrã.
