2 Reye 2:1-25
2 Ãcõrẽba Elía nãũrã jũrẽɓaribʉrʉba bajãnaa edei carea ɓasiɗe Elíara, Eliseo siɗa Gilgalɗeba wãbʉda basía.
2 Maʉ̃ne Elíaba Eliseoa nãwã jarasia:
–Nama ɓedua. Ãcõrẽba mʉ̃ra Betel puruɗaa wãbi ɓʉa.–
Baribʉrʉ Eliseoba panusia:
–Ãcõrẽ zocai ɓʉ quĩrãpita, bʉ quĩrãpita biɗa wãrãneba jaraya: bʉduɓa wãbiẽ́a.–
Ara maʉ̃da Betel puruɗaa wãsiɗaa.
3 Jũẽbʉdaɗe Ãcõrẽneba beɗeabadarã Betelɗebemada Eliseomaa zeɗapeɗa nãwã iwiɗisiɗaa:
–¿Bʉa cawa ɓʉca iɗi Ãcõrẽba bʉ boro Elíara edeida?–
Eliseoba panusia:
–Mãẽ, cawa ɓʉa. Chupea pananadua.–
4 Maʉ̃be Elíaba Eliseoa jarasia:
–Eliseo, nama ɓedua. Ãcõrẽba mʉ̃ra Jerico puruɗaa wãbi ɓʉa.–
Eliseoba panusia:
–Ãcõrẽ zocai ɓʉ quĩrãpita, bʉ quĩrãpita biɗa wãrãneba jaraya: bʉduɓa wãbiẽ́a.–
Ara maʉ̃da Jerico puruɗaa wãsiɗaa.
5 Jũẽbʉdaɗe Ãcõrẽneba beɗeabadarã Jericoɗebemada Eliseomaa zeɗapeɗa iwiɗisiɗaa:
–¿Bʉa cawa ɓʉca iɗi Ãcõrẽba bʉ boro Elíara edeida?–
Eliseoba panusia:
–Mãẽ, cawa ɓʉa. Chupea pananadua.–
6 Maʉ̃be Elíaba Eliseoa jarasia:
–Nama ɓedua. Ãcõrẽba mʉ̃ra Jordaʉ̃ doɗaa wãbi ɓʉa.–
Eliseoba panusia:
–Ãcõrẽ zocai ɓʉ quĩrãpita, bʉ quĩrãpita biɗa wãrãneba jaraya: bʉduɓa wãbiẽ́a.–
Ara maʉ̃da wãsiɗaa.
7 Ãdji caiɗu Ãcõrẽneba beɗeabadarãda cincuenta wãsiɗaa. Tʉmʉba ãdjirãba acʉ duanasiɗaa Elíada, Eliseo siɗa Jordaʉ̃ do icawa nũpanʉda.
8 Mãwã panʉne Elíaba cacuaɗe jʉ̃ ɓʉra ẽrãpeɗa ɓeɗatʉ edasia. Maʉ̃ba doɗe tawesia. Tawebʉrʉɗe oda ewa dogosia. Elíara, Eliseo siɗa maʉ̃ oɗe Jordaʉ̃ do chãsiɗaa.
9 Chãnapeɗa Elíaba Eliseoa jarasia:
–Ãcõrẽba mʉ̃ edei naẽna ¿bʉa cãrẽda quĩrĩã ɓʉ mʉ̃a bʉ itea oida?–
Eliseoba panusia:
–Mʉ̃ quĩrã djuburia bʉa eroɓʉ jaureɗeba poya obarira dewararã cãyãbara mʉ̃́a auɗuara diadua.–*
10 Elíaba jarasia:
–Bʉa iwiɗi ɓʉra zarea ɓʉa. Baribʉrʉ Ãcõrẽba mʉ̃ edebʉrʉda unuibʉrʉ, bʉa iwiɗiɗara edaya. Unuẽ́bʉrʉ edaẽ́a.–
11 Ãdji nẽbʉrʉ nĩnane cawaẽ́ne tʉbʉ uruada cawayo carreta bara ɓʉ quĩrãca ɓʉda zesia. Maʉ̃ra ãdji ẽsi dogosia jĩga wãnamãrẽã. Maʉ̃be nãũrã jũrẽɓaribʉrʉba Elíara bajãnaa edesia.
12 Mãwã unubʉrʉɗe Eliseoba Elíaa ɓia jarasia:
–¡Zeza, zeza! Carretaɗeba djõbadarã idjaɓa cawayoɗeba djõbadarã quĩrãca bʉa israelerãra bio careba ɓasia.–*
Maʉ̃ne Eliseoba cacuaɗe jʉ̃ ɓʉra sopuaba ẽsidra cõãtasia. Elíara waa unuẽ́ basía.
13 Elía ʉ̃taa wãsiɗe idjia cacuaɗe jʉ̃ ɓaɗara egode ẽrã ɓaesia. Maʉ̃gʉra Eliseoba edapeɗa jẽda Jordaʉ̃ doɗaa wãpeɗa do icawa nũmesia.
14 Maʉ̃ne Elíaba cacuaɗe jʉ̃ ɓaɗaba doɗe tawesia. Tawebʉrʉɗe nãwã jĩgua jarasia:
–¿Elía Ãcõrẽra sãma ɓʉ?–
Ara maʉ̃ne oda ewa dogosia. Maʉ̃ oɗe Eliseora chãsia.
15 Idji chãbʉrʉda Ãcõrẽneba beɗeabadarã Jericoɗebemaba acʉ duanasiɗaa. Maʉ̃ bẽrã jarasiɗaa:
–Elíaba eroɓaɗa jaureda Eliseoba edasia.–
Ara maʉ̃da ãdjirãra Eliseomaa wãnapeɗa idji quĩrãpita chĩrãboroɗe ɓarru copanesiɗaa.
16 Maʉ̃be jarasiɗaa:
–Dairãra bʉ nezocarãa. Dairã tãẽna cacua ʉɓʉa ɓeada cincuenta panʉa. Ãdjirãa bʉ boro Elíara jʉrʉɗe wãbidua. Ãĩbẽrã Ãcõrẽ Jaureba idjira ʉ̃taa edepeɗa eyaɗe wa jeweɗaɗe ɓʉsisicada.–
Baribʉrʉ Eliseoba panusia:
–Mãwãẽ́a. Ãdjirãra diabuerãnadua.–
17 Mãwã jaraɗamĩna ãdjirãba ʉ̃cʉrʉ diabueɗi carea mĩã sẽ panesiɗaa. Maʉ̃ carea Eliseora perapeɗa ãdjirãa jarasia ʉ̃cʉrʉ diabueɗamãrẽã. Ara maʉ̃da ãdjirãba cincuenta diabuesiɗaa. Maʉ̃ ẽberãrãba Elíara ewari ũbea jʉrʉsiɗaa. Mãwãmĩna ununaẽ́ basía.
18 Maʉ̃be Jericoɗaa Eliseo ɓʉmaa jẽda zesiɗaa. Eliseoba ãdjirãa jarasia:
–¿Mʉ̃a jarasiẽ́ca bãdji quĩrĩãbe jʉrʉɗe wãnida?–
Eliseoba baido biẽ́ ɓaɗa bia ɓʉɗa
19 Jericoɗebemarãba Eliseoa nãwã jarasiɗaa:
–Dairã boro, bʉa cawa ɓʉa naʉ̃ purura bio bia ɓʉda. Baribʉrʉ baidoda biẽ́ ɓʉ bẽrã dai ẽjũã siɗa biẽ́ ɓʉa.–
20 Maʉ̃ carea Eliseoba jarasia:
–Epeɗeco djiwiɗiɗe tãda mʉ̃maa enenadua.–
Ara maʉ̃da edesiɗaa.
21 Maʉ̃gʉra idjia baido ʉ̃taa bogadrʉ ɓʉmaa edepeɗa maʉ̃ baidoɗe eɗa peatasia. Maʉ̃ne jarasia:
–Ãcõrẽba nãwã jara ɓʉa: mʉ̃a naʉ̃ baidora bia ɓʉbʉrʉ bẽrã naʉ̃ baidoba ni aɓaʉda waa beuɗaẽ́a. Bãrã ẽjũã siɗa bia zau ɓaya.–
22 Maʉ̃ ewariɗeba ʉ̃taa maʉ̃ baidora bia ɓesia Eliseoba jaraɗa quĩrãca.
Eliseo ipiɗa jarapeɗaɗa
23 Jericoɗeba Eliseora Betel puruɗaa wãsia. Oɗe nĩne ʉ̃cʉrʉ cũdrarãda Betel puruɗeba idjimaa wãnapeɗa nãwã ipiɗa jara duanesiɗaa:
–Boro uru, ãyã wãdua. Boro uru, ãyã wãdua.–
24 Maʉ̃ carea Eliseoba ãdjirãmaa acʉpeɗa Ãcõrẽ trʉ̃neba biẽ́ jara ɓʉsia. Ara maʉ̃da wi umé panʉba cũdrarãra orraɗapeɗa 42 beasiɗaa.
25 Maʉ̃be Eliseora Carmelo eyaɗaa wãpeɗa jẽda Samaria puruɗaa wãsia.
