2 Pedro 3:1-18
3 Djabarã, naʉ̃ba cartara ɓarima umé mʉ̃a bãrã itea ɓʉbʉrʉa. Carta umerãne mʉ̃a wãrã beɗeara quĩrãnebabi ɓʉa jipa crĩchaɗamãrẽã.
2 Mʉ̃a quĩrĩã ɓʉa Ãcõrẽneba beɗeabadarãba naẽna jarapeɗaɗara bãrãba quĩrãnebaɗida. Idjaɓa quĩrĩã ɓʉa Jesucrito dadjirã Boro, dadji Ẽdrʉ Edabariba jaraɗada quĩrãnebaɗida. Maʉ̃ra idjia diabueɗarãba bãrãa jaradiasiɗaa.
3 Naʉ̃da bio cawaɗadua: jĩrũarebema ewariɗe Ãcõrẽ ipiɗa biẽ́ jarabadara baraya. Ãdji cacuaba cadjirua o quĩrĩã ɓʉda o ɓeaɗia.
4 Nãwã ipiɗa jaraɗia: “Crito zei jaraɗara ¿sãwãsi? Dadji drõã naẽnabemarãra jũma beusiɗaa. Baribʉrʉ naʉ̃ ẽjũã oɗaɗeba jũma ara mãwã ɓʉa.”
5 Maʉ̃ ẽberãrãba ĩjã quĩrĩãnaẽ́a naẽnaeɗa Ãcõrẽ beɗeabʉrʉba bajãda osida, ẽjũãda pusaɗe odjabisida, idjaɓa baidoɗeba mãwã osida.*
6 Ara maʉ̃ baidoba jũma naʉ̃ ẽjũãne naẽna ɓeaɗara ũpeɗa nãbʉrʉ quinibisia.
7 Ara maʉ̃ quĩrãca Ãcõrẽ beɗeabʉrʉba naʉ̃ ẽjũãda, bajã siɗa waga eroɓʉa idjaɓa idjia cawa oi ewariɗe babueya. Maʉ̃ ewariɗe idji quĩrĩãnacara cawa opeɗa jũma biẽ́ ɓʉya.
8 Baribʉrʉ djabarã, naʉ̃da quĩrãdoarãnadua: dadjirã Boromaarã ewari aɓara mil poa quĩrãca ɓʉa idjaɓa mil poara ewari aɓa quĩrãca ɓʉa.
9 Dadjirã Boro zeyaɗa aɗara dãrãbʉrʉ bẽrã ʉ̃cʉrʉba crĩcha panʉa zeẽ́da. Baribʉrʉ mãwãẽ́a. Ãtebʉrʉ bãrã carea jũma droa ɓʉ bẽrã dãrãbʉrʉa. Idjia quĩrĩãẽ́ ɓʉa ni aɓaʉda aduaida. Quĩrĩã ɓʉa jũmarãba cadjiruada igaraɗapeɗa idjimaa zeɗida.
10 Dadjirã Boroba cawa oi ewarira cawaẽ́ne zeya ne drʉabari zebari quĩrãca.* Maʉ̃ ewariɗe minijĩchia jururuapeɗa bajãra nẽbaya. Ne jũma dadjia bajãne unubadara bá wãya. Idjaɓa naʉ̃ ẽjũãra, ne jũma naʉ̃ ẽjũãne ɓea siɗa bá wãya.*
11 Ne jũmada jõi bẽrã bãrãra Ãcõrẽba quĩrĩã ɓʉ quĩrãca jipa, cadjirua neẽ́ nĩbaɗida panʉa.
12 Ãcõrẽba cawa oi ewarira jʉ̃ã pananida panʉa. Maʉ̃misa Ãcõrẽba quĩrĩã ɓʉra o pananadua maʉ̃ ewarira isabeara zemãrẽã.* Maʉ̃ ewariɗe Ãcõrẽba bajãra babueya. Maʉ̃ne ne jũma dadjia bajãne unubadara, naʉ̃ ẽjũãne unubada siɗa jʉ̃wʉ̃rʉ̃ãba dorraɓariya.
13 Baribʉrʉ Ãcõrẽba bajã djiwiɗida, ẽjũã djiwiɗi siɗa oyaɗa asia. Maʉ̃da dadjirãba jʉ̃ã panʉa. Mama jũmarãba jipa o ɓeaɗia.
14 Djabarã, bãrãba jũma maʉ̃ra jʉ̃ã panʉ bẽrã ne jũmane quĩrãipa nĩbaɗadua Ãcõrẽba bãrã biya, cadjirua neẽ́, idji ume necai panʉda unumãrẽã.
15 Quĩrãnebaɗadua dadjirã Boroba ẽberãrã ẽdrʉ edai carea jũma droa ɓʉda. Dadji djaba Paulo biɗa aɓarida cartaɗe bãrãa ɓʉ́ diabuesia Ãcõrẽba idjía diaɗa necawaaɗeba.
16 Cartaza maʉ̃gʉɗebemada ɓʉsia. Ʉ̃cʉrʉ crĩcha idjia ɓʉɗara cawaɗi carea zarea ɓʉa. Wãrã beɗea cawaɗacaba, bio ĩjãẽ́ ɓeaba idjia ɓʉɗara ãĩ jaradiabadaa jũma Ãcõrẽ Beɗea ãĩ jaradiabada quĩrãca. Maʉ̃ carea Ãcõrẽba ãdjirãra biẽ́ ɓʉya.
17 Djabarã, bãrãba maʉ̃da cawa panʉ bẽrã quĩrãcuita ɓeaɗadua ẽberã cadjiruarãba ãĩ jaradia panʉneba cũrũgarãnamãrẽã. Mãwã bãrãba bio ĩjã panʉra igaraɗaẽ́a.
18 Jesucrito dadjirã Boro, dadji Ẽdrʉ Edabarira biara cawa wãnadua. Idji biaɗeba wariɗadua. Iɗi idjaɓa ewariza idjía bia beɗeaɗida panʉa. Bia ɓʉa mãwã ɓaida.
Beɗea eɗaare
^ 3:5. Baidoɗeba mãwã osida. Griego beɗeaɗe maʉ̃ra ebuɗa ɓʉẽ́a.
^ 3:10. Zebari quĩrãca. Griego beɗeaɗe ʉ̃cʉrʉ cartaɗe “diamasi zebari quĩrãca” ɓʉ́ ɓʉa.
^ 3:10. Ne jũma naʉ̃ ẽjũãne ɓʉ siɗa bá wãya. Griego beɗeaɗe maʉ̃ra ebuɗa ɓʉẽ́a. Ʉ̃cʉrʉmaarã nãwã jara ɓʉa: “Idjaɓa Ãcõrẽba cawa obʉrʉɗe ne jũma ẽberãrãba naʉ̃ ẽjũãne opeɗaɗara unubiya.”
^ 3:12. Ãcõrẽba quĩrĩã ɓʉra o pananadua maʉ̃ ewarira isabeara zemãrẽã. Maʉ̃ beɗeara idjaɓa nãwã traducida ɓʉa: “Maʉ̃ ewarira isabe zeida quĩrĩãnida panʉa.”
