1 Tesalonica 2:1-20
2 Djabarã, bãrãba cawa panʉa dai bãrãma panasiɗaɗe dadji quĩrĩãbe pananaẽ́ basida.
2 Cawa panʉa bãrãmaa wãni naẽna Pilipoɗebemarãba daira biẽ́ jarasiɗada idjaɓa biẽ́ osiɗada.* Maʉ̃ awara bãrãma jũẽsiɗaɗe zocãrãba quĩrĩãnaẽ́ basía daiba jaradiaɗida. Baribʉrʉ Ãcõrẽba carebasia idji beɗea biada bãrãa ne wayaa neẽ́ jaradiaɗamãrẽã.
3 Daiba crĩcha biaẽ́neba wa sewaɗeba bãrãa jaradiaɗaẽ́ basía. Idjaɓa bãrãra cũrũgaɗida crĩchaɗaẽ́ basía.
4 Ãtebʉrʉ Ãcõrẽba bia ununa bẽrã daira ɓʉsia idji beɗea bia Critoɗebemada jaradiaɗamãrẽã. Maʉ̃ bẽrã daiba jaradia panʉa. Daiba jʉrʉɗaẽ́ panʉa ẽberãrãba bia ununamãrẽã ãtebʉrʉ quĩrĩã panʉa dadji so acʉ ɓʉ Ãcõrẽba bia unumãrẽã.
5 Bãrãba cawa panʉa daiba beɗea bia quiruɗeba jaradiaɗaẽ́ panasiɗada. Idjaɓa parata edaɗi carea sewaɗeba jaradiaɗaẽ́ basía. Maʉ̃ra Ãcõrẽba cawa ɓʉa.
6 2:6-7 Daiba jʉrʉɗaẽ́ panasiɗaa bãrãba, dewararã biɗa daida bia jaraɗamãrẽã. Maʉ̃ awara daira Critoba diabueɗarã bẽrã iwiɗiɗida panasiɗaa bãrãba ne diaɗamãrẽã. Baribʉrʉ iwiɗiɗaẽ́ basía. Ãtebʉrʉ quĩrĩãneba daiba bãrãra careba panasiɗaa dji papaba warra zaquerã wagabari quĩrãca.
7 –
8 Daiba bãrãra bio quĩrĩã panʉ bẽrã aɓabe beɗea bia Ãcõrẽnebemada bãrãa jaradiaɗaẽ́ basía, ãtebʉrʉ ne jũmaneba carebaɗi carea panasiɗaa.
9 Djabarã, bãrãba cawa panʉa daiba beɗea bia Ãcõrẽnebemada bãrãa jaradia panasiɗaɗe ãsa diamasi biɗa ʉ̃nãũnaẽ́ dewara traju siɗa obadjiɗada parata edaɗi carea. Quĩrĩãnaẽ́ basía bãrãba daia õgo ne dia panʉneba bia mĩgaɗida.
10 Bãrãba cawa panʉa, Ãcõrẽ biɗa cawa ɓʉa daira bãrã dji Crito ĩjã ɓea tãẽna biya, jipa, biẽ́ jaraɗi neẽ́ nĩbasiɗada.
11 Maʉ̃ awara cawa panʉa zezaba idji warrarã ume obari quĩrãca daiba bãdjiza sobiabisiɗada idjaɓa jipa nĩbaɗamãrẽã jara panasiɗada.
12 Daiba jarasiɗaa bãrãra Ãcõrẽba quĩrĩã ɓʉ quĩrãca nĩbaɗamãrẽã. Idjia bãrãra trʉ̃sia pe eroɓai carea idjaɓa idji biya quiruɗebemada eroɓeaɗamãrẽã.
13 Daiba ewariza bãrã carea Ãcõrẽa bia ɓʉaɗa abadaa. Bãrãba Ãcõrẽ beɗeada daiɗeba ũrĩsiɗaɗe ẽberã crĩcha quĩrãca ĩjãnaẽ́ basía. Ãtebʉrʉ maʉ̃ beɗeara wãrãda Ãcõrẽ beɗeada cawapeɗaɗa bẽrã ĩjãsiɗaa. Ara maʉ̃ beɗeaba bãrã dji Crito ĩjã ɓea crĩchara biara o wãa.
14 Djabarã, bãrãba ĩjã panʉ carea ara bãdji druaɗebemarãba biẽ́ o panasiɗaa Ãcõrẽ ẽberãrã judiorã druaɗe mãwãna quĩrãca. Mama Jesucrito ĩjã ɓea judiorãra dji ĩjãẽ́ ɓeaba biẽ́ o panasiɗaa.
15 Dadjirã Boro Jesura, Ãcõrẽneba beɗeabadarã siɗa beasiɗaa. Maʉ̃ awara daira ãyã jʉretasiɗaa. Ãdjirãra Ãcõrẽba bia unucaa. Ãdjira jũmarã ume dji quĩrũa.
16 Ãcõrẽba ẽdrʉ edamãrẽã daiba judiorãẽ́a jaradia quĩrĩã panʉne ãdjirãba iduaribiɗacaa. Mãwã cadjiruara waiɓʉada o panʉa. Maʉ̃ carea Ãcõrẽba idji quĩrũbiɗeba ãdjirãra cawa oya.
Paulo Tesalonicaɗebema djabarã acʉɗe wã quĩrĩã ɓaɗa
17 2:17-18 Djabarã, dãrãẽ́ ɓʉa daira bãrã ume pananada ãyã wãpeɗaɗada. Ara nawena daiba bãrãra ununaẽ́ panʉmĩna crĩchaɗeba bãrã ume panʉa. Daiba wãrãda bãrã acʉɗe wã quĩrĩã panasiɗaa baribʉrʉ diauruba mĩã sẽ ɓasia wãrãnamãrẽã. Mʉ̃ra wãrãda ɓarima zocãrã bãrãmaa wãi carea ɓasia.
19 Bãrã carea ɓʉsriɗa panʉ bẽrã mãwã panʉa. Maʉ̃ awara cawa panʉa dadjirã Boro Jesucrito zebʉrʉɗe daiba bãrãra jipa panʉda idjía unubiɗida. Maʉ̃ne idji quĩrãpita bãrãda dai ɓʉsriɗaa baya.*
20 Wãrãda bãrã carea ɓʉsriɗa panʉa. Bãrãra dai ɓʉsriɗaa.
