1-3. Euodia le Sintekhe karlak ah zeithil dah a rak cang kho men? Cu bantuk buaibainak hna kha zeitindah kan hrial khawh? (A hramthawknak hmanthlak zoh.)

BAIBAL cu Pathian sinin a rami Cauk a si caah kan sunsak tuk. Baibal ah buaibainak hrial khawh awkah a kan bawmmi ruahnak cheuhnak hna aa tel i mah nih palhnak kan tuah tik zongah a kan remh khawh. Mah ruahnak cheuhnak hna kha zeitindah kan lehrulh? Kumzabu pakhatnak i chiti thuh a simi unaunu Euodia le Sintekhe kong hi ruathmanh. Baibal nih annih cu bia an i al tiah a ti nain a ruang cu a chim lo. Asinain a cang khomi kong kha i ruah hna u sih.

² Euodia nih unau cheukhat kha rawl-ei a sawm hna hei ti u sih. Asinain Sintekhe kha cu a sawm lo. A hnuah, unau pawl nih an i nuamhnak kong an chimmi kha Sintekhe nih a theih tikah a ngaih a chia tuk. Hitin a ruah khawh men: ‘Euodia nih a ka sawm ve lomi cu ka khuaruah a har tuk. Kannih cu aa kom tukmi kan si tiah ka ruah nain.’ Euodia nih a  ka kom taktak lo i a ka hrial tiah Sintekhe nih a ruah. Cucaah Euodia nih rawl-ei a kawhmi unau pawl kha Sintekhe nih a kawh ve hna i Euodia kha cu a sawm ve lo. Mah thil sining nih Khrihfabu daihnak kha a hrawh khawh. Cucaah Paul nih mah unaunu pahnih kha a cawnpiak hna i remnak ser awkah a forh hna tiah Baibal nih a ti. Annih nih Paul ruahnak cheuhnak kha an zulh lai i lunglawm tein Jehovah an bia ko lai.—Fil. 4:2, 3.

³ Tuchan zongah unau pawl karlak ah a caan ah buaibainak a um kho men. Asinain Baibal ruahnak cheuhnak kan zulh ahcun cu bantuk buaibainak hna kha kan tawnghtham khawh i a hrial hmanh kan hrial khawh. Cun Baibal lamhruainak kan zulh tikah Jehovah Bia, Baibal kan sunsak kha kan langhter khawh.—Salm 27:11.

4, 5. Intuarnak i uk khawhnak he aa tlaiin Baibal nih zei ruahnak cheuhnak dah a kan pek?

⁴ Intuarnak i uk khawh awkah a zungzal in cun a fawi lai lo. Kan nunphung, kan tak rong le a dangdang ruangah serhsat kan si asiloah a ding loin pehtlaih kan si tikah kan thin a hung tuk men lai asiloah kan ngaih a chia tuk men lai. Cutin a kan serhsattu le a kan pehtlaihtu cu unau an si ahcun kan lung a fak chinchin men lai. Baibal ruahnak cheuhnak nih zeitindah a kan bawmh khawh?

⁵ Minung nih an intuarnak an i uk khawh lo tikah zeidah a cang kho ti kha Jehovah nih a hngalh. Kan thin a hun tikah a hnuah a kan ngaihchihter hngami bia kan chim men lai asiloah kan tuah men lai. Kan lungthin i uk khawh awkah Jehovah nih Baibal hmangin lamhruainak a kan pek. Hitin a ti: “Na thin sum khawh kha i zuam.” Mah ruahnak cheuhnak kan zulh tikah buaibainak hna kan hrial khawh i fawi tein kan thin a hung lo. (Phungchimtu 7:9; Phungthlukbia 16:32 rel.) Midang ngaihthiam awk zongah Baibal nih a kan cawnpiak. Midang nan ngaihthiam hna lo ahcun Jehovah nih aan ngaithiam ve hna lai lo tiah Jesuh nih a ti. (Matt. 6:14, 15) Lungsaunak le midang ngaihthiam duhnak tam deuh in ngeih na herh maw?

6. Kan intuarnak kan i uk lo ahcun zeidah a cang kho?

⁶ Kan intuarnnak kan i uk lo ahcun kan thin a hung peng lai i mi pakhat kha a huat hmanh kan hun huat khawh. Mah tikah unau cheukhat nih amah he komh an duh ti men lai lo. Cuticun Khrihfabu ah a ṭhalomi huham kan ngei kho. Kan thinhunnak le kan huatnak kha kan langhter lo hmanhah kan intuarnak kha a hnuah midang nih an hngalh ko lai. (Ptb. 26:24-26) Thinhunnak le huatnak lungput kan ngeihmi kha hloh awk le midang ngaihthiam awkah Khrihfa upa nih Baibal hmangin an kan bawmh khawh. (Lev. 19:17, 18; Rom 3:11-18) Cutin an kan bawmh tikah Jehovah Bia, Baibal lamhruainak kha kan zul lai maw?

7, 8. (a) Jehovah nih a miphun kha zeitindah lam a hruai hna? (b) Baibal ah kan hmuhmi lamhruainak cheukhat cu zeidah an si i zeicah kan zulh awk an si?

⁷ Jehovah nih tuchan vawlei lei a bupi kha lam a hruai i a cawnpiak. Zeitin in dah? Khrih kha ‘Khrihfabu cungah nawlngeihnak’ a pek i Khrih nih Pathian miphun  cawnpiak awk le lamhruai awkah “zumh awk a tlakmi le a fimmi sal” kha rian a pek. (Efe. 5:23; Matt. 24:45-47) Kumzabu pakhatnak i uktu bu hna bantukin mah sal nih Baibal cu Pathian Bia a si caah a sunsak tuk. (1 Thesalon 2:13 rel.) Baibal ah kan hmuhmi lamhruainak cheukhat cu zei hna dah an si?

⁸ Baibal nih hmaan tein i pumh awkah a kan cawnpiak. (Heb. 10:24, 25) Pumhnak nih aa khatmi Baibal cawnpiaknak hna kha zumh awkah kan dihlak in a kan forh. (1 Kor. 1:10) Cun “Pennak kha hmasa bik ah chiah” ding zongin a kan cawnpiak. (Matt. 6:33, NW) Innkhat hnu innkhat ah, zapi hmaiah le mi an umnak hmun paohah phungchim dingin Baibal nih a kan cawnpiak. (Matt. 28:19, 20; Lam. 5:42; 17:17; 20:20) Khrihfabu thianter zungzal awkah Khrihfa upa pawl kha Baibal nih a cawnpiak hna. (1 Kor. 5:1-5, 13; 1 Tim. 5:19-21) Cun kan pum thianter awk le Jehovah nih a huatmi ruahnak le ziaza hna hrial awkah a kan cawnpiak.—2 Kor. 7:1.

9. Baibal kan hngalhthiam khawh nakhnga bawmh awkah Jesuh nih ahote dah a hman hna?

⁹ Mi cheukhat nih Baibal cu kanmah tein a sullam hngalh khawh a si ko tiah an ruah men lai. Asinain 1919 thawkin Pathian miphun nih Baibal cawnpiaknak an hngalhthiam khawh nakhnga le an zulh nakhnga bawmh awkah Jesuh nih “zumh awk a tlakmi le a fimmi sal” kha a hman hna. Baibal cawnpiaknak kan zulhnak thawngin Khrihfabu ah thiannak, daihnak le lungrualnak a um nakhnga kan bawmh. Hitin i hal: ‘Jesuh nih a hmanmi lam kha zumhawktlak tein ka zul maw?’

10. Ezekiel nih vancung i Jehovah bupi kong kha zeitindah a langhter?

¹⁰ Vancung i Jehovah salle zong ningcang tein dirh an si ti kha Pathian Bia, Baibal in kan hngalh khawh. Tahchunhnak ah, Jehovah nih kal a duhnak lei paohah khulrang in a kal khomi leng kekual aa citmi kha Ezekiel nih langhnak ah a hmuh. (Ezek. 1:4-28) Mah leng kekual nih Jehovah lamhruainak khulrang in a zulmi, vancung i Pathian bupi kha a aiawh. Mah cu vawlei lei a bupi cung zongah huham a ngei. A luancia kumhra chungah Pathian bupi he aa tlaimi thlennak tampi kong kha ruathmanh. Mah thlennak hna cu Jehovah nih lam a hruai ti kha i cinken. A rauhhlan ah Khrih le vancungmi hna nih hi vawlei ṭhalo hi an hrawh dih cang lai. Jehovah le a min a thangchiatmi asiloah a uk ning a soiselmi ahohmanh an um ti lai lo.

11, 12. Hi donghnak caan ah Jehovah bupi nih zei hna dah an lim?

¹¹ Hi donghnak caan ah Jehovah bupi nih a limmi hna kha ruathmanh. Innsaknak. U.S.A, New York, Warwick ah Jehovah Tehte Hna i zungpi thar saknak ah unau thong tampi cu rian an ṭuan. Vawleicung pumpi ah mah lungtho tein aa pemi a dang unau thong tampi cu Vawleicung  Pumpi Design/Innsaknak Department nih a tlangtlak hna i Biakinn le zung ṭengnge saknak ah rian an ṭuan. Cu bantuk innsaknak ah teima tein rian a ṭuanmi unau tampi cungah kan i lawm tuk. Mah innsaknak caah a dihmi tangka kha toidor tein le zumhawktlak tein a bawmmi a salle kha Jehovah nih thluachuah a pek hna.—Luka 21:1-4.

¹² Cawnpiaknak: Jehovah nih a miphun pawl cawnpiak kha a duh. (Isa. 2:2, 3) Kan hmuhmi tinṭan a phunphun kha ruathmanh. Mah cu Hmaikal Tinṭan, Pennak Kong Chimtu hna caah Tinṭan, Gilead Tinṭan, Bethel A Lutmi Hna Caah Tinṭan, Khualtlawng Rianṭuantu le An Nupile caah Tinṭan, Khrihfa Upa ca Tinṭan, Pennak Rianṭuannak Tinṭan le Zung Ṭengnge Kawmiṭi ah aa Telmi le An Nupile caah Tinṭan hna an si. Cun jw.org i kan website ah holh phun tampi in Baibal le a dang cauk hna kan hmuh khawh. Mah website ah ngakchia, chungkhar le thawngpang hna caah a hleiin timhpiakmi kong hna zong a um. Phungchimnak le chungkhar pumhnak ah jw.org kha na hmang maw?

13. Jehovah miphun nih zei rian dah kan ngeih?

¹³ Jehovah bupi ah kan i telmi cu tinvo sung taktak a si. Jehovah nih a kan halmi le a duhmi kan hngalh caah amah nawlngaih awk le a hmaanmi thil tuah awkah rian kan ngei. Mi tampi nih thil ṭhalo tuah kha an duh ko nain kannih cu Jehovah bantukin “ṭhatlonak a huami” kan si a hau. (Salm 97:10) ‘Thilṭha kha thil ṭhalo an ti i thil ṭhalo kha thilṭha’ tiah a timi hna he kan i kom lo. (Isa. 5:20) Jehovah lung lawmhter kan duh caah pumsalei, tuahsernaklei le thlaraulei thian awkah kan i zuam. (1 Kor. 6:9-11) Jehovah kha kan dawt tuk. Cucaah Baibal ah fiang tein langhtermi a phunglam ningin kan nunnak thawngin Jehovah cungah zumhawktlak tein kan um. Inn ah, Khrihfabu ah, rianṭuannak ah, sianginn ah asiloah khoika hmun paohah a phunglam kha kan zulh. (Ptb. 15:3) Pathian cungah zumhawktlak tein kan um langhter khawhnak thil sining cheukhat kha ruathmanh.

14. Nulepa cu Jehovah cungah zeitindah zumhawktlak tein an um khawh?

¹⁴ Fale cawnpiak ning. Nulepa nih fale kha Baibal hmangin an cawnpiak hnanak thawngin Jehovah cungah zumhawktlak tein an um kha an langhter. Fale cawnpiaknak ah aa tlak lomi nunphung kha an i iapter lo i hi vawlei ruahnak zong an cohlang lo. (Efe. 2:2) Tahchunhnak ah, hmun cheukhat ahcun pale nih ‘fale cawnpiak cu nule rian a si’ tiah an ruah men lai. Asinain Baibal nih “pale hna, nan fale kha . . . Khrihfa ziaza le cawnpiaknak he tu ṭhanter hna u” tiah fiang tein nawl a pek hna. (Efe. 6:4, NW) Jehovah a dawmi nulepa nih cun an fale kha Samuel bantukin an ngakchiat lio tein Jehovah he pehtlaihnak ṭha ngeihter an duh hna.—1 Sam. 3:19.

15. A biapimi biakhiahnak kan tuah tikah Jehovah cungah zumhawktlak tein kan um kha zeitindah kan langhter khawh?

¹⁵ Biakhiahnak tuah ning. Kan nunnak ah a biapimi biakhiahnak hna kan tuah tikah Jehovah cungah zumhawktlak tein kan um langhter khawhnak lamkhat cu Baibal le a bupi ah bawmhnak kan kawlnak thawngin a si. Tahchunhnak ah, ramdang ah a kalmi nulepa cheukhat nih fa an ngeih tikah an fale kha an ram i a ummi an chungkhat pawl sin kuat awkah bia an khiah tawn. Cuticun an pahnih in rian an ṭuan kho lai i tangka an kawl kho lai. Mah cu pumpak biakhiahnak a si ko nain ‘kan biakhiahnak hi Jehovah nih zeitindah a hmuh lai?’ tiah an i hal awk a si. (Rom 14:12 rel.) Kan innchungkhar le kan rian kong he aa tlaiin a biapimi biakhiahnak kan tuah hlanah Baibal lamhruainak kawl hmasa cu fim a si. Kan kehlan kha kanmah tein kan i uk kho lo caah Jehovah bawmhnak kan herh.—Jer. 10:23.

16. Nu pakhat nih fa a ngeih tikah zei thimnak dah a tuah? A hmaanmi biakhiahnak tuah awkah zeinihdah a bawmh?

 ¹⁶ Nuva tuahkhat cu ramdang i an i ṭhial hnuah fa an ngei i mah an fate kha an ram i a ummi an nu le an pa sin kuat awkah an i tim. Asinain mah lio caan ah a nupi cu Jehovah Tehte Hna he Baibal a cawng. A fapate Jehovah kong cawnpiak dingah rian ka ngei ti kha a hngalh. (Salm 127:3; Ptb. 22:6) Mah tikah Baibal cawnpiak ningin le a hmaanmi thil tuah awkah ka bawm tiah Jehovah sinah thla a cam. (Salm 62:7, 8) Cun mah kong kha amah Baibal a cawnpiaktu unaunu le Khrihfabu i unau dang kha a chimh hna. A chungkhat le a hawile nih a fapate kha a pi le a pu sin kuat awkah an fial lengmang ko nain cutin tuah lo awkah bia a khiah. A nupi le a fapate cu unau pawl nih zeitluk in dah an bawmh hna ti kha a vapa nih a hun hngalh. Mah nih a lung a suk tuk caah Baibal a hun cawng ve i a chungkhar sinah aa pum ve. Mah nu nih a thlacamnak Jehovah nih a lehmi kha a hmuh tikah zeitluk in dah aa nuamh lai khi ruathmanh.

17. Mi pakhatkhat kha Baibal kan cawnpiak tikah zei lamhruainak dah kan zulh awk a si?

¹⁷ Lamhruainak zulh ning. Pathian cungah zumhawktlak tein kan um kan langhter khawhnak a biapimi lamkhat cu a bupi sinin kan hmuhmi lamhruainak hna kan zulhnak thawngin a si. Tahchunhnak ah, mi pakhatkhat he Baibal Cawnpiakmi Taktak Cu Zeidah A Si? timi cauk kan cawn tlawmpal ah zeidah kan tuah a herh ti kha ruathmanh. Baibal cawnpiaknak a dih fatin minit tlawmpal chung Jehovah bupi kong kha chim. Biakinn ah Zei Hna Dah An Tuah? timi video le Tuchan ah Ahote nih dah Jehovah Duhnak an Tuah? timi brochure kha kan hman khawh. Baibal Cawnpiakmi cauk a dih hnuah tipil a in cang hmanhah “Pathian Dawtnak Chungah Hmun U” timi cauk kha cawnchap awkah ruahnak cheuh kan si. Zultu tar pawl ‘zumhnak ah an ṭhawn chin’ nakhnga Bupi nih mah lamhruainak kha a kan pekmi a si. (Kol. 2:7) Jehovah bupi sinin kan hmuhmi mah lamhruainak kha na zul maw?

18, 19. Jehovah cungah kan i lawmh awk a sinak a ruang cheukhat cu zeidah an si?

¹⁸ Jehovah cungah kan i lawmh awk a sinak a ruang tampi a um. Pakhat cu ‘amah chungah kan nung, kan cawl kan cang i khua kan sak’ caah a si. (Lam. 17:27, 28) Cun Pathian Bia, Baibal zong a kan pek. Baibal cu amah sinin a rami bia a si caah Thesalon khua i Khrihfa hna bantukin mah laksawng kha kan sunsak tuk.—1 Thes. 2:13.

¹⁹ Baibal thawngin Jehovah kha kan naih khawh i amah zong nih a kan naih khawh. (Jeim 4:8) Vancung kan Pa nih a bupi chung i, i tel ve awkah a kan sawm caah kan i lawm tuk. Hitin a ṭialmi Salm caṭialtu bantukin kan intuar ve: “Bawipa cu a ṭhat caah lawm tuah u, a dawtnak cu zungzal in a hmun.” (Salm 136:1) Mah dal chung i cacaang kip ah salm caṭialtu nih “a dawtnak cu zungzal in a hmun” timi bia kha a nolh lengmang. Jehovah cungah zumhawktlak tein kan um i a bupi hmangin a kan pekmi lamhruainak hna kha kan zulh ahcun zungzal nunnak a kan pek lai i kan cungah a zungzal in zumhawktlak tein a um lai.