BAIBAL ṭial rak thawknak holh Hebru biafang sheʼohlʹ le cu he a sullam aa khatmi Grik biafang haiʹdes kha Baibal nih voi 70 leng a rak hman. Cu biafang pahnih cu thihnak he aa pehtlai. Cheukhat Baibal lehnak nih “thlan,” “hell,” “mithi khua,” asiloah “khor thuk” tiah an leh. Asinain mah Hebru le Grik biafang hna he a sullam aa khatmi biafang kha holh a tamdeuh nih an ngei lo. Curuangah New World Translation Baibal nih “Sheol” le “Hades” timi biafang kha a hman. Mah biafang hna nih hin zeidah an chim duh taktakmi a si? Baibal cang dangdang ah zeitindah hman an si kha zoh u sih.

Phungchimtu 9:10 nih hitin a ti: “Na tuahmi cu a ṭhat khawh chungin tuah, zeicahtiah Sheol ahcun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si.” Sheol nih hin dawtmi pakhat vui a sinak ka hmun te asilole thlan pakhat kha a sawhmi a si maw? A si lo. Baibal nih cu ka hmun te asiloah thlan pakhat caah Hebru le Grik biafang sheʼohlʹ le haiʹdes kha hmang loin biafang dang kha a hman. (Genesis 23:7-9; Matthai 28:1) Culengah Baibal nih innchungkhar pakhat asilole mi tampi hmun khat i vuinak hmun caah “Sheol” timi biafang kha a hmang lo.—Genesis 49:30, 31.

Cu a si ahcun “Sheol” nih zei bantuk hmun dah a sawh kun? Pathian Bia nih “Sheol” le “Hades” nih hin thlan hmun nganpi lawng a sawh lo kha a langhter. Tahchunhnak ah, Isaiah 5:14 ah Sheol cu “a kaa kaupi in aa aan ko” tiah ti a si kha i chingchiah. Sheol nih rel cawk lo minung a dolh cang hna nain a za cang ti dawh a lo lo. (Phungthlukbia 30:15, 16) Mithi cu zat kha zat lawng vui khawhnak hmun he i lo loin “Sheol le Abanddon cu zeitikhmanh ah an vuai bal lo.” (Phungthlukbia 27:20) Sheol cu a khim cang ti a um bal lo. Cu zat kha zat timi ri zong a ngei lo. Cucaah Sheol asilole Hades cu cuka theng timi hmun taktak kha a si lo. Mahnak cha cun mithi vialte hna i zapi thlan kha a sawhmi a si, mi tamdeuh thihnak ah an i hngilh timi langhternak hmun pakhat a si.

 Thawhṭhannak he aa tlaiin Baibal cawnpiakmi nih “Sheol” le “Hades” sullam hngalhthiam deuh awkah a kan bawmh. Pathian Bia nih Sheol le Hades kha a thoṭhan hngami hna i thihnak he a pehtlaihter. * (Job 14:13; Lamkaltu 2:31; Biathlam 20:13) Sheol asilole Hades i a ummi ah Jehovah a biami lawng si loin a bia lomi zong an i tel tiah Pathian Bia nih a ti. (Genesis 37:35; Salm 55:15) Cucaah, Baibal nih “miṭha he miṭhalo he thihnak in kan thoṭhan dih lai” tiah a kan cawnpiaknak a si.—Lamkaltu 24:15.