Yela ja Yehova keshi kulinga yiwanyino ya matangwa a kusemuka, mumu kananyingika ngwo Zambi keshi kutayiza yiwanyino yacho. Kwamba umwenemwene, Mbimbiliya kuyishi kuhanjika pundu nyi atu katamba kulinga yiwanyino yacho nyi ka. Alioze yakutukwasa kunyonga ha yikuma yimwe yize yakulingiwa muze atu analingi yiwanyino ya matangwa a kusemuka ni kunyingika nyonga lia Zambi ha yikuma yacho. Tala yikuma yiwana ya yiwanyino ya matangwa a kusemuka ni shimbi ja mu Mbimbiliya jize jinatale ha yikuma yacho.

1.   Yiwanyino ya matangwa a kusemuka yinakatuka mu uwayilo wa mahuza. Kulita ni umwe mukanda (Funk & Wagnalls Standard Dictionary of Folklore, Mythology, ni Legend) yiwanyino yino, yaputukile mumu atu kapwile ni kutayiza ngwo, muze mutu akutakanyisa mwaka, “andemoniu kakupwa ni uhashi wakumulinga yuma yipi,” nawa ngwo, “kupwa hamuwika ni masepa ni kumuchichimieka yakufunga mutu wacho.” Mukanda ukwo (The Lore of Birthdays ) unambe ngwo, ku mashimbu akunyima, kusoneka tangwa lize mutu asemukine “chapwile chilemu chinji kuli atu waze te akulilongesa tutongonoshi.” Mukanda uno unambe nawa ngwo, “kulita ni yize atu akufuliela, vela yize akuzachisa ha tangwa lize mutu akutakanyisa mwaka yili ni ndundo jakulinga yize mutu wacho mazanga.”

    Alioze, Mbimbiliya yakukanjisa tufutafuta, kutaha, kupanda “ni yuma yeswe ya kulifwa ni yino.” (Shimbi Yamuchiali 18:14; A-Ngalashia 5:19-21) Zambi kanongesele mbonge ya Babilonia mumu anji a kuli atu jamo kapwile ni kulilongesa kuhengwola tutongonoshi, chuma chize chinatale ha kutaha. (Izaia 47:11-15) Yela ja Yehova keshi kuhengwola-hengwola chishina cha hita mianda yino, alioze muze Mbimbiliya yakuhana usongwelo wa pundu yuma yino, ngwe hakutwala ku yipanda-yipanda, yetu twakukaula yize Mbimbiliya yakwamba.

2.   Akwa-Kristu a ku sekulu yitangu te keshi kulinga yiwanyino ya matangwa a kusemuka. Mukanda (Enciclopédia Delta Universal) unambe ngwo, Akwa-Kristu a ku sekulu yitangu “kanyingikine ngwo yiwanyino ya matangwa a kusemuka yinakatuka mu uwayilo wa mahuza.” Mbimbiliya yakwamba ngwo, apostolo ni atu akwo waze Yesu alongesele kahichikile chilweza chize Akwa-Kristu atamba kukaula.—2 A-Tesalonika 3:6.

3.   Chiwanyino chize Mbimbiliya yakwamba hanga Akwa-Kristu alinge kuchishi kutala ha tangwa lia kusemuka, alioze ha tangwa lia kufwa; cha Yesu. (Luka 22:17-20) Chino kuchishi kutukomwesa mumu Mbimbiliya yakwamba ngwo “tangwa lia kufwa liahiana tangwa lia kusemuka.“ (Chilumbununyi 7:1) Ku songo lia mwono wenyi hano hashi, Yesu kapwile ni jina lipema kumeso ja Zambi. Kashika, tangwa lia kufwa chenyi liapwile lilemu kuhiana tangwa lize asemukinyine.—A-Hepreu 1:4.

4.   Mbimbiliya kuyishi kwamba ngwo umwe kavumbi ka Zambi kalingile chiwanyino cha tangwa lia kusemuka. Mbimbiliya yakuhanjika wika hali atu aali waze alingile yiwanyino ya tangwa lia kusemuka, alioze atu jacho te keshi kuwayila Zambi. Chikwo nawa, ha yiwanyino yacho halingiwile yuma yipi.—Uputukilo 40:20-22; Marku 6:21-29.

 Chizechene ngwe yisemi akwo apema, Yela ja Yehova kakusolola zango hali ana jo matangwa eswe hi wika ko kamuwika ha mwaka. Yisemi wano kakukaula chilweza chipema cha Zambi yoze wakuhana ni mbunge yeswe yuma yipema kuli ana jenyi. (Mateu 7:11) Kashika, ana ja Yela ja Yehova keshi kunyonga ngwe kanatokesa yimwe ha kuhona kulinga yiwanyino yacho. Tala yize amwe ambile:

•   “Chili chipema kutambula yawana muze kutushi kuyishimbwila.”—Tammy, miaka 12.

•   “Chipwe ngwe keshi kungwaha yawana ya ha tangwa lize nasamukine, nihindu yisemi jami kakungwaha yawana ha yisuho yeka. Nakuwahilila chinji, mumu nakutambula yawana yize chishi kushimbwila!”—Gregory, miaka 11.

•   “Shina wakunyonga ngwe minutu 10, kwimba mwaso ni bolo chili chiwanyino? Yena te watamba kuya ku zuwo lietu hanga umone yize chiwanyino chinalumbunuka!”—Eric, miaka 6.