Bia ve ngule jangan ése na bi liti bôte bese na bia nye’e be, a semé be, a mvamane be. Nge Ngaa Yéhôva éziñe ja beta ki kañe Yéhôva a nleme wé ôse, nge tyi’i na ja lume Yéhôva mvus, a bia jeñe na bi ke laan a je a liti je na bia nye’e nye a na bia yi na a beta bi mbamba élat a Yéhôva.—Luc 15:4-7.

 Ve mame méziñe môt a bo me bo na be vaa nye ékôane bekristen. (1 Becorinthien 5:13) Ve amu bia nye’e bobejañ, bia jeñ a ngul ése na bi taté volô môt ate ôsusua na avale jam éte da kui. A nge da kui na be vaa môt ate ékôane bekristen, bia ke ôsu a liti môt ate nye’an a ésemé avale Kalate Zambe a jô bia na bi bo.—Marc 12:31; 1 Pierre 2:17.

Jé é ne bo na be vaa môt éziñ ékôane bekristen?

 Kalate Zambe a kôme jô na nge kristene ja bo beta nsem a bene jôban abé dé, ba yiane nye vaa ékôane bekristen. b (1 Becorinthien 5:11-13) Kalate Zambe a kôme kate beta minseme mi ne bo na be vaa môt ékôane bekristen. Aval ane mejian, nso’one meyok, ñwônane môt, môt a tibili ébu’a ya nda bôte jé, a wup.—1 Becorinthien 6:9, 10; Begalate 5:19-21; 1 Timothée 1:9, 10.

 Ve bia nyoñe ki ntyi’ane ya vaa môt a te bo beta nsem ékôane bekristen été été. Bemvendé ya ékôane bekristene c ba jeñe na be volô môt a te bo beta nseme na a kôñelane nlem. (Beromain 2:4) Ba bo de a mbamba nlem. (Begalate 6:1) Nalé a volô môt ate na a yeme na a te bo jam é ne abé a na a jôbane abé dé. (2 Timothée 2:24-26) Akusa bo ngul ése ba ye ve na be volô nye ve a kele ôsu a tyame metiñe ya Kalate Zambe, teke jeñe na a tyendé abo dulu dé, ba yiane nye vaa ékôane bekristen. A bemvendé ba ye yôtan ékôane bekristene na môte si môte ka a nji beta bo Ngaa Yéhôva.

 Mfi ôvé ékôane bekristene ja bi éyoñe ba vaa môt a tyi’i na a ke ôsu a nyiñe nsem été? Jam ôsu é ne na ékôane bekristene ja liti na ja su’u metiñe me Yéhôva, a na é tabe mfuban, a bo na môt a te bo beta nsem a bo teke dutu bôte bevo’o mbia abo dulu wé. (1 Becorinthien 5:6; 15:33; 1 Pierre 1:16) Jame baa é na, nalé a ne volô môte ba te vaa na a jôbane mbia mboone wé a jeñe na a tyendé.—Behébreu 12:11.

Aval avé Bengaa be Yéhôva ba nyoñe môte be nga vaa ékôane bekristen?

 Kalate Zambe a jô bekristene na be bo “te yeñ” a môte be nga vaa ékôane bekristen, a “bo bo te di a avale môt éte.” (1 Becorinthien 5:11) Ajô te, bi nji yiane fulan a môte be nga vaa ékôane bekristen. Ve nalé a tinane ki na bia bisi ki fe nye. Bia nyoñe nye a ésemé ése. A ne zu tabe bisulan, a Bengaa be Yéhôva béziñe be ne tyi’i na ba tame nye mbamba nsôan. d A ne fe sili bemvendé na be volô nye na a beta bulan ékôane bekristen.

 Jé é ne bobane nge môte ba te vaa ékôane bekristen, minga wé a bone bé ne bongô be ngenane Bengaa be Yéhôva? Akusa bo a nji beta kañe Yéhôva nsamba a nda bôte jé, ve a ngenan ébu’a ya nda bôt. Mbôle ba nyiñe nda jia, élat é ne zañe ba minga wé a bone bé é ngenan é kele ôsu, a ba yiane ke ôsu a liti nye ésemé a nye’an.

 Môte ba te vaa ékôane bekristen a ne sili bemvendé na be ke nye jom, a ba ye nye ve melebe ya Kalate Zambe a mbamba nlem a volô nye na a jôban abé dé a beta bulane be Yéhôva. (Zacharie 1:3) Nge a telé mbia abo dulu wé a liti na a bili nkômbane ya tôñe metiñe ya Kalate Zambe ényiñe jé, a ne beta bo ébu’a ya ékôane bekristen. Bibu’a ya ékôane bekristene bia “yiane nye jamé a nlem ôse a volô nye nlem,” fo’o ve avale bekristene ya Corinthe be nga bo éyoñe mbo nsem éziñ a nga tyendé abo dulu dé.—2 Becorinthien 2:6-8.

Bôte béziñe be nga vaa ékôane bekristen a beta bulane be nga wô’ôtan aya?

 Bi tame zu yen avale Bengaa be Yéhôva béziñe be nga vaa ékôane bekristene be nga wô’ôtan éyoñe be nga bulane zu kañe Yéhôva.

 “Éyoñe me nga nyoñe ntyi’ane ya beta bulan ékôane bekristen, me mbe me simesa’ane na bemvendé ba ye jeñe na be yeme mone jam ase me nga bo ényiñe jam, mimbu mise me nji be me ngenan ébu’a ya ékôane bekristen. A lôte na be bo nalé, be nga jô ma na, ‘me fombô ve ôsu éyoñe ji.’ Mvuse minlañe mite, nlem ô nga bômbô ma si.”—Maria, États-Unis.

 “Bibu’a ya ékôane bekristene bi mbe angôndô ya mevak éyoñe me nga beta bulan ékôane bekristen. Nalé a nga bo na me yeme na me ngenane mfi. Bitôtôlô bi bobejañ a besita bi nga volô ma na me wô’ôtane na be jaméya ma, a na me fombô ve ôsu. A bemvendé be mbe be volô’ô ma éyoñ ése na me beta yemete élate jam a Yéhôva. Be nga volô ma nlem a bo na me yeme na me mfi mise me Yéhôva a na a ngenan a nye’e ma.”—Malcom, Sierra Leone.

 “Me ne mevak amu ma yeme na Yéhôva a nye’e bebo bisaé bé, a véé fe mise na ékôane jé é tabe mfuban. Akusa bo bôte be nji bo Bengaa be Yéhôva be ne kate wôk amu jé ba vaa môt a te bo beta nsem ékôane bekristen, ve mboon ôte ô ne nya mfii. Me ne mevak amu Ésa wongane ya yôp a ne Zambe nye’e bôt a jamé’é fe be.”—Sandi, États-Unis.