Kele vôm ô ne lañe de

Kele sous-menu

Bengaa be Yéhôva

Bulu

Miñye’elane mivé Bengaa be Yéhôva ba buni?

Miñye’elane mivé Bengaa be Yéhôva ba buni?

Mbôle bi ne Bengaa be Yéhôva, bia yiane jeñ a ngul ése na, bi tôñe miñye’elane mi Yésus, mmie mite minlômane mie fe mi nga tôñ. Nlô ajô wu wo zu kobô ajô ya mbôka’a ya miñye’elane miangan.

  1. Zambe. Zambe bia kañ a ne Nya Zambe a Zambe ya Ngul Ése, Nté biôm bise, nyô éyôlé é ne na, Yéhôva. (Besam 83:18; Nlitan 4:​11) A ne Zambe Abraham, Môze a Yésus.​—Nkolan 3:6; 32:11; Jean 20:17.

  2. Kalate Zambe. Bia yeme na mejô me ne Bible ma so bia be Zambe. (Jean 17:17; 2 Timothée 3:​16) Mbôka’a ya miñye’elane miangan wo lu’an a mame me ne bekalate 66 ya Kalate Zambe. Beta ñyeme mam éziñ, be loone nye na Jason D. BeDuhn, a nga kobô ajô te éyoñ a nga tili na, Bengaa be Yéhôva “ba nyoñe miñye’elane miap mise e Kalate Zambe été, be ne étyi te yemete Kalate Zambe na a lu’an a mam ba buni.” *

    É ne fo’o été na bia yebe mejô mese me ne Kalate Zambe, ve nalé a nji tinane na, bia nyoñe mejô ya Kalate Zambe mese ve avale me ne ntilan. Bia yeme na, bifuse biziñe ya Kalate Zambe bi ne ane minkana, a na bi nji yiane wô’ô bie avale bi ne ntilan.​—Nlitan 1:1.

  3. Yésus. Bia tôñe miñye’elane mi Yésus Krist a bibô’a mebo bié; bia semé fe nye amu bia yeme na, a ne Nkôté wongan a na, a ne Mona Zambe. (Matthieu 20:28; Mam Minlôman 5:​31) Bi ne ñhe jô na, bi ne Bekristen. (Mam Minlôman 11:26) Ve bi nga yé’é Kalate Zambe na, Yésus a nji bo Zambe ya Ngul Ése, a teke éfus éziñe ya Mintilan ja liti dô’ôtene ya Zambe wua bôte belal.​—Jean 14:28.

  4. Éjôé Zambe. É ne nya éjôé é ne yôp été; é nji bo jôm é ne nlem Bekristen. Ja ye zu mane vaa bijôé ya si nyô a bo na, nkômbane Zambe ô bobane si va. (Daniel 2:​44; Matthieu 6:​9, 10) Jame te da zu boban ana’ana, amu Kalate Zambe a jô na, bia nyiñe “melu me asu’ulan.”​—2 Timothée 3:​1-5; Matthieu 24:​3-​14.

    Yésus a ne Njôô ya Éjôé Zambe é ne yôp été. A nga nyoñ éto njôé mbu 1914.​—Nlitan 11:15.

  5. Nkôtan. Ntañe Yésus a nga ve ñwô ô nga kôté bia abé a awu. (Matthieu 20:28; Mam Minlôman 4:​12) Asu na, bi bi mfi ya ntañ ôte, bia yiane liti na bi bili mbunan, bia yiane fe tyendé abo dulu dangan a duban. (Matthieu 28:19, 20; Jean 3:​16; Mam Minlôman 3:​19, 20) Mimboane mi môt mmie mia liti na a bili mbunan. (Jacques 2:​24, 26) Ve jame bia yiane yem é ne na, nge bia ye bi ényiñ ya melu mese, a nji bo amu mimboone mi mam miangan, ve amu “mvame Zambe.”​—Begalate 2:​16, 21.

  6. Yôp. Yéhôva Zambe, ba Yésus, a beéngele be ne mewôk, ba nyiñe vôme môta binam a se ngule ya yen a mise mé. * (Besam 103:19-​21; Mam Minlôman 7:​55) Abime bôt éziñ (144 000) da ye wômô asu ényiñe ya yôp; bé ke jôé a Yésus.​—Daniel 7:​27; 2 Timothée 2:​12; Nlitan 5:​9, 10; 14:​1, 3.

  7. Si. Zambe a nga té si asu na môt a binam a nyiñ été nnôm éto. (Besam 104:5; 115:16; Ecclésiaste 1:4) Zambe a ye botane bôt ba bo nye mewôk,a ye ve be nya mvo’é ya minsôn, a ye fe ve be ényiñe ya melu mese e paradis e si va.​—Besam 37:11, 34.

  8. Abé a minjuk. Minju’u mi nga taté éyoñ éngele wua a nga bo Zambe melo. (Jean 8:​44) Be nga su’ulane loon éngele ate na “Satan” a “Diable”. A nga tindi fe môta binam ôsu ba minga wé, na be bo Zambe melo, jam ete ve zu tele mvoñe bôte jap ése minju’u été. (Metata’a 3:​1-6; Beromain 5:​12) Zambe a nga kañese na, mbia be mam a minjuk mi kui asu na, a liti na Satan a ne nlaa minsos; ve aye jô’é na mbia be mam a minju’u mite mi tabe’e nnôm éto.

  9. Awu. Ényiñe ja man éyoñe môt a wuya. (Besam 146:4; Ecclésiaste 9:​5, 10) Bewu be nji di’i nduane kom.

    Yéhôva a ye wômôlô bizu’u bi bôt bi ne mesoñ. (Mam Minlôman 24:15) Ve, nge môt éziñ a kele ôsu a bo melo éyoñ a wômôya miñwuan, Zambe a ye wôé nye éyoñe jia ya biyoñe bise.​—Nlitan 20:14, 15.

  10. Nda bôt. Bia tôñ atiñe Zambe a nga ve éyoñ a nga lat aluk afube ya Éden; a nga jô na fam ja yiane bi ve minga wua. Mejian mme étam me ne bo na, bôte be ne nlu’an be tyam aluk. (Matthieu 19:​4-9) Bia yeme na, fe’e bia koone je e Kalate Zambe été, ja volô abui menda me bôt.​—Beéphésien 5:⁠22–​6:1.

  11. Ékaña’a jangan. Bi nji kañe kôlôs nge ke bive’ela a bengunemelan. (Deutéronome 4:​15-​19; 1 Jean 5:​21) Mam me ne mfi ékaña’a jangan me ne:

    • Bia ye’elane Zambe.​—Bephilippien 4:6.

    • Bia lañ a yé’é Kalate Zambe.​—Besam 1:​1-3.

    • Bia bindi mam bia yé’é Kalate Zambe été.​—Besam 77:12.

    • Bia ke bisulan asu na bi ye’elan, bi yé’é Bible, bi yia Yéhôva bia, bi liti nye mbunane wongan, a na, bi vebane ngule nyul.​—Becolossien 3:​16; Behébreu 10:23-​25.

    • Bia ‘kañete mbamba foé ya Éjôé Zambe.’​—Matthieu 24:14.

    • Bia volô ba ba tôbane minjuk.​—Jacques 2:​14-​17.

    • Bia lôñ a ba’ale Meba m’Éjôé, a menda bisaé mese ma su’u ésaé nkañete bia bo si se.​—Besam 127:1.

    • Bia su’u bôt éyoñ ébubua éziñe ja kui vôm be too atemetem.​—Mam Minlôman 11:27-​30.

  12. Ékôane jangan. Ékôane jangan é bili mekônda. Akônda ése é bili nsamba bemvendé wo tebele de. Bemvendé bete be nji bo bivete Bengaa be Yéhôva, be nji saé asu moné. (Matthieu 10:8; 23:8) Bi nji nyoñe ngab awômô, nge ke bo ntolé e bisulane biangan. (2 Becorinthien 9:7) Mimvean mmie mia su’u ésaé jangan, bi nji jeñe na bi yem za a te ve.

    Mone nsamba Bekristen ba loone na Tin ékôan, nnye a tebele ésaé Bengaa be Yéhôva ya si ése.​—Matthieu 24:45.

  13. Élate jangan. Bia bese bia buni jôme jia. (1 Becorinthien 1:​10) Bia jeñ a ngul ése na, biôm ane minkôñ, nkobô, nyul ékôp, nge ke metum, me bo te bo na, bi kandane mengam. (Mam Minlôman 10:34, 35; Jacques 2:4) Bi nji yemete bobejañe na be simesan ane bia. Ngaa Yéhôva ése ja nyoñe mintyi’an mia lu’an a mam a yé’é Kalate Zambe.​—Beromain 14:​1-4; Behébreu 5:​14.

  14. Ntabane wongan. Bia jeñe na bi liti nye’an mimfa’a mise ya ényiñe jangan. (Jean 13:34, 35) Bia sa’ale mam mese Zambe a vini, aval ane e nyoñe metyi ndômdo nkum. (Mam Minlôman 15:28, 29; Begalate 5:​19-​21) Bi ne bivôvoé bi bôt, bi nji bo bita. (Matthieu 5:9; Ésaïe 2:4) Bia semé metiñe ya nlame bia nyiñ, nté bijôé bi nji jô bia na bi tyam atiñe Zambe.​—Matthieu 22:21; Mam Minlôman 5:​29.

  15. Avale bia nyiñ a bôte bevok. Yésus a nga jô na: “Nyeke’e bôte befe ane wo anye’e womien.” A nga jô fe na Bekristen ‘be nji bo bôte ya émo ji.’ (Matthieu 22:39; Jean 17:16) Bia jeñe fo’o na, bi bo “mame me ne mvaé mfa’a ya bôte bese,” ve bi ne te nyoñe ngab a mame me pôlitik, nge ke fulane ékaña’a jangan a miñyebe mife. (Begalate 6:​10; 2 Becorinthien 6:​14) Nalé a nji tinane na bia yemete bôte bevok na be yene mam ane bia. Môt ase nnye a nyoñe mintyi’ane mié mfa’a ôte.​—Beromain 14:12.

Nge ô bili minsili mife, a lat a mame Bengaa be Yéhôva ba buni, ô ne fe lañe mame me ne anjeñe mefoé dangan, ô ne ke jome menda bisaé mangan, ô ne tabe bisulane biangan, nge ke laan a mone Bengaa ya vôm ô too.

^ É.N. 4 Lañe fe kalate ba loene na Vérité dans la traduction afebe 165.

^ É.N. 10 Zambe a nga titane mimbia minsim e yôp, ve a nji wôé mie.​—Nlitan 12:​7-9.

NGE WO KOMBÔ YEM ABUI MAM

MINSILI BÔTE BA DAÑE SILI

Za a nga té Bengaa be Yéhôva?

Lañ amu jé Charles Russell a nji be nlô ya mfefé ñyebe.

MINSILI BÔTE BA DAÑE SILI

Ye Bengaa be Yéhôva be bili Kalate Zambe wop?

E belan abui minkôñelane ya Kalate Zambe a ne bo mfi asu ayé’é dôé ya Kalate Zambe. Beta beamu bela ba yiane tindi wo na ô belane Traduction du monde nouveau éyoñe wo yé’é.

MINSILI BÔTE BA DAÑE SILI

Amu jé Bengaa be Yéhôva be nji bo mebô’ô ya abialé?

Yenek mame menyin ma liti na Zambe a nji nye’e mebô’ô ya abialé.

MINSILI BÔTE BA DAÑE SILI

Ye Bengaa beYéhôva ba buni Yésus?

Fasek amu jé mbunan Yésus ô ne mfi abui asu bekristen.

BEZA BA BO NKÔMBANE YÉHÔVA DEN?

Bengaa be Yéhôva be ne avale bôt avé?

Abime Bengaa be Yéhôva avé wo yem? Ye wo tu’a fo’o bia yem?