1 Timothée 1:1-20
1 Ma Paul, nlômane Krist Yésus a zene ya atiñe Zambe Nyii wongan, a Krist Yésus, ndi nleme jangan,
2 ma tili Timothée,* mone wome ya mbunan:
Beta mvame Zambe, mvam a mvo’é bia so be Zambe Ésa wongan a be Krist Yésus Tate wongane bi tabe’e be wo.
3 Avale me nga jô wo na ô li’i Éphèse éyoñ éte me too bebé ya ke Macédoine, nde fe ma jô wo éyoñe ji na, ô ve bôte béziñe metiñe na be bo te ye’ele avale ñye’elan afe,
4 nge vô’ôlô zezé minlañ a bindan. Avale mam éte da ke ki môte vôm éziñ a é nji bo mfi, ve da bo na bôte be ve’e befe’e a be nji bi jôm éziñe ja funane ji Zambe a ve a lat a mbunan.
5 E nya ajôô, nsôñane ya ñye’elane wu* ô ne nye’ane wo so nlem ô ne mfuban a mbamba mone môte ya nlem a mbunan ô ne te medu’an.
6 Amu be nga lume mame mete mvus, bôte béziñe be nga bulane mejô me ne teke mfi.
7 Ba kômbô bo beye’ele metiñ, ve be nji yeme mame bebiene ba jô nge ma ba yemete a ngul ése.
8 A bia yeme na, Metiñe me Moïse me ne mvaé nge môt a tôñe me avale da yian,*
9 a yeme’e na atiñ é nga teléban, sa ke asu môt a ne zôsô, ve asu ba be nji bi metiñ a ba be ne éngana’a, ba ba bene kañe Zambe a bebo minsem, bôte ba ba’ale ki élat* a ndamane jôm é ne étyi, ba ba wôé beésa a benyia a bewôé bôte bevok,
10 bôte ba bo mvite mame ya bisôk,* befame ba jô’ôbô a befame bevok,* bôte ba bi ba bevok a ngul a tup a be, belaa minsos, bôte be ne te tôé bengaka’a bap* a mame mese ma wosane mbamba ñye’elan*
11 a wô’an a étôto’o mbamba foé Zambe ya mevak, be nga telé ma na me kañete.
12 Ma ve Krist Yésus Tate wongan akiba, nnye ate a nga ve ma ngul, amu a nga tabe ma ndi a ve ma ésaé é ne étyi,
13 akusa bo na ôsusua me mbe môt a biasé Zambe, ntibili bekristen a môt a ne ésas. Ve, me nga koban éngôngol amu me mbe me bo’o de ndiman été a njembane mbunan été.
14 Ve beta mvame Tate wongan a nga yené abui a mbunan a nye’an ô ne be Krist Yésus.
15 Njôane wu ô ne été, a wo yiane kañeseban a nlem ôse: Krist Yésus a nga zu be bôte ya si na a zu kôté bebo minsem. E bebo minseme bete, ma ma dañ.
16 Ve me nga koban éngôngol, ndemben a zene jam, nyu a dañe mbo minsem, Krist Yésus a ye liti ôjibi wé ôse a bo na me bo éve’ela asu ba bese ba ye futi mbunane wop be nye asu ényiñe ya nnôm éto.
17 Éyoñe ji, be Njôô ya nnôm éto, Nyu nyule ja ye ke ndaman, Nyu a ne te yené, susu’a Zambe, duma a étôto’o bi bo’o be nye nnôm éto a nnôm éto. Amen.
18 A Timothée mone wom, ma ve wo ñye’elane wu,* ñwô ôte wo wô’an a minkulane mejô, mmie mite mi nga jôban ajô dôé, ndemben ô ne ngule ya wosane mbamba mewosan.
19 Ba’ale’e mbunan a mbamba mone môte ya nlem, nnye ate abui bôt é nga wua fé a nalé a nga bo na mbunane wop ô nyoñe mendime si.
20 Hyménée a Alexandre be ne nsamba ôte, a me nga ve be Satan, ndembene be ne nyoñe melep a zene ya fonose na be bo te biasé Zambe.
Notes
^ A tinane na, “Nyu a ve Zambe duma.”
^ Nge ke, “atiñe di; abendé di.”
^ Nkobô Grec, “aval atiñe da jô.”
^ Nge ke, “bôte be nji bi nye’ane wo ba’ale élat.”
^ Lañe’e Atinane bifia, “Mvite mame ya bisôk.”
^ Vôme nyi ba belane bifia bi Grec bibaé; bifia bite bia kobô ajô fame ja kañese na, be jô’ôbô nye a nyi ja jô’ôbô a fame fok.
^ Nge ke, “bôte ba bo ngaka’a ya minsos.”
^ Nge ke, “ñye’elan ô ne mfi; ñye’elane wo volô.”
^ Nge ke, “atiñe di; abendé di.”
