“NDI NLEM É NE . . . NYA MFII ÉNYIÑE JANGAN MFA’A YA NSISIM.” A ne mejô ma so kalate Hope in the Age of Anxiety. Kalate ate a ke ôsu a jô na: “A ne biañ ja dañe mfi asu ya na bi dañe woñ a mam mese me ne bo na bi wô’ôtane ve ane ngul é maneya bia, nge na bi vo’o tyendé jam éziñ.”

Kalate Zambe a liti na, ndi nlem e ne mfi asu môta binam; ve a jô fe na bi sa’ale ndi nlem é nji yian. Kalate Besam 146:3 a jô na: “Te tabane beta be bôt ndi, be ne ve bôt, be ne atek mfa’a ya nyii.” (Mfefé Nkôñelan) Amu Zambe nnye a bili ngule ya tôé bengaka’a bé bese, bia ye bo fek nge bia tabe ndi a Nté wongan a lôte na, bi tabe ndi a ngule bone be bôte ba ve na be nyii bia. A nga ka’ale bia jé? Bi tame yene mam ma tôñe le.

ABÉ DA YE MAN; MVUSE YA VALÉ BEZÔSÔ BE BÔT BA YE TABE MVO’É ÉTÉ NNÔM ÉTO: Bia lañe kalate Besam 37:10, 11 na: “Amu ôbé nté ô ngenan, a mbia môt a ye fe tabe . . . Ve bôt be ne minlem évôvoé b’aye nyoñe si, a b’aye yen mvaé jap amu abui mvo’é.” Éfuse 29 ja beta fe jô na, ‘bôte be ne zôsô . . . b’aye tabe si nnôm éto.’

BITA BIA YE MAN: “Jehova . . . a mane mewosan akekui susu’a ya si nyô; a bu’ élaé, a tyi’ akoñe bitun; a di’i bewagon bita nduan.”​—Besam 46:8, 9.

TEKE FE ÔKON, MINTAÉ, NGE AWU: “Tabernacle ya Zambe a ne be bôt . . . A ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”​—Nlitan 21:3, 4

ABUI BIDI ASU MÔT ASE: “Si ja ye bi abui bidi. Afo’o dé da ye yené abôbône beta minkô.”​—Besam 72:16, Mfefé Nkôñelan.

ÉJÔÉ É NE ZÔSÔ ASU ÉMO ÉSE: ÉJÔÉ KRIST: “Ane a nga veban [Yésus Krist] ngule ya jôô, a étôtok, a ayoñ, ajô te nde bôte bese, a meyoñe mese, a minkobô mise b’ aye bo nye bisaé: njôane wé ô ne njôane ya nnôm éto, ñwô w’aye bo te lôt, a ayoñe dé e ne di d’ aye bo te jañ.”​—Daniel 7:14.

Aval avé bi ne tabe ndi a bengaka’a bete? Eyoñe Yésus a mbe si va, a nga liti nne ngeññ a mam a nga bo na, nnye a ne Njôô be nga top. A nga saé minkôkon, a ve bôte be ne éngôngole bidi, a wômôlô bewu. A miñye’elane mié mi ngenane mfi, amu mi bili melebe me ne volô bôte na be nyiñe nlatane nnôm éto, a mvo’é été. Yésus a nga kate fe mam ma ye bobane melu ma zu, ja’a mam ma ye liti na bi nga nyiñe melu m’asu’ulane ya nta’ane mame wu.

Yésus a nga jô na, melu m’asu’ulan, mvo’é a évôvoé bia ye bo momo! Ndeme ja liti na bi nga nyiñ “asu’ulane ya nta’ane mame” wu é ne fe bita bi ne si se, mfumbale ya zaé, a beta mimfô’ôsane mi si. (Matthieu 24:3, 7; Luc 21:10, 11; Nlitan 6:3-8) Yésus a nga jô fe na: “Nye’an abui bôt wo ye bo avoé amu nnenan abé da ye dañe nen.”​—Matthieu 24:12, Mfefé Nkôñelan.

Njembane nye’an ôte wo yené abui mezen, ntili Kalate Zambe mfe a nga kôme liti fe de. E kalate 2 Timothée 3:1-5, bia lañe na “melu me asu’ulan,” bôte ba ye dañe nye’e bebien, ba ye dañe nye’e akum a mam me ne mvaé. Ba ye wumulu bebien, a ba ye bo ayok. Menda me bôt ma ye bo te nye’e bivuvumane biap, a bongô ba ye bo bebiaé bap melo. Miñyebe mia ye liti ve atane na, mia nye’e Zambe.

Mam me ne ane ôkôs ma liti na émo é nto melu m’asu’ulan. Mam mete ma liti fe na évôvoé é mbeme bo a zene ya Éjôé. A nde fe, Yésus a nga ve nkulan ajô wo ve bia ndi nlem a lat a melu m’asu’ulan: “Mbamba foé ya ayoñe Zambe nyô a ye katebane si se, a ye bo meyoñe mese ndem; wôna asu’ulan de aye bo.”​—Matthieu 24:14.

Mbamba foé ate a bemene bebo mam abé a ve fe bezôsô be bôte ndi nlem na, be mbeme zu yene bengaka’a be nga bo be. Ye wo kômbô yeme mam mefe a lat a bengaka’a bete? Nge nalé, kele’ afebe da su’ulane ya kalate mefoé nyi.