Aval avé awu, nsiñe wongan, da ye vas?
AKUSA bo na bebiaé bangan Adam ba Ève be nga bo melo, a na, jam ete e nga so bone be bôt bese abé a awu, nsôñane Zambe ô nji tyendé. A zene ya Mejô mé, Zambe a ba’alane bia abui biyoñ na, nsôñane wé ô nji tyendé.
-
“Bôt be ne zôsô b’aye nyoñe si, a tabe été nnôm éto.”—Besam 37:29.
-
‘A ye min awu nnôm éto; a Tate Yéhôva a ye fimi mesu mese milik.’—Ésaïe 25:8.
-
“Nsiñ a ye su’ulan vas a ne awu.” —1 Becorinthien 15:26.
-
“Awu de aye fe bo; nalé fe ôlun vi aye fe bo, nge ñyôn, nge mintaé.” —Nlitan 21:4.
Aval avé Zambe a ye ‘min awu’ nge bo na nsiñe wongan ate a vas? Avale bia te yen, Kalate Zambe a liti na, “bôt be ne zôsô b’aye . . . [nyiñe] nnôm éto.” Ve a jô fe na “zôsôa môt a nji bo si nyô, a bo mvaé, te bo abé.” (Écclésiaste 7:20) Ye nalé a tinane ñhe na, Zambe a ye ke beta yange na bone be bôt be tôñe memvinda mé aval émien a jô e Bible été, asu na awu é man? Momo, a vo’o bo avale jam ete môs éziñ, amu “a se ngule ya laa minsos.” (Tite 1:2) Nde, jé Zambe a ye bo asu na a tôé nsôñane wé?
ZAMBE ‘A YE MIN AWU NNÔM ÉTO.’—ÉSAÏE 25:8
E DAÑ AWU A ZENE YA NTAÑ
Amu beta nye’ane wé, Yéhôva Zambe a nga ya’ane ntañ asu na a kôté bone be bôt awu. Ntañ ô ne tañe môt a ya’an asu na a kôm étom éziñ, nge ve tañe ja yian asu na zôsô a litiban. Bone be bôt bese be ne bebo mam abé a ba yian awu, jôm ete nje Kalate Zambe a jô ne sañesañ na: “Te ke wua ya été a ne ngule ya kôté monyañe wé a zen éziñ, nge ve Zambe ngôtô ya kôté nye (amu nkôtane ya ényiñe jap ô ne beta tañ. Ô ne momo nnôm éto).”—Besam 49:7, 8.
Éyoñ mbo mam abé a wu, a maneya ya’ane tañe ya minseme mié; a vo’o kôté môte mfe nge ya’ane tañe ya minseme mi môte mfe. (Beromain 6:7) Asu na be ya’ane ntañ, é mbe e sili’i na môt a mbe teke ayeñ y’abé a ve ényiñe jé asu minseme miangan.—Behébreu 10:1-4.
A ne fo’o fe jame Zambe a nga bo. A nga lôme Mone wé, Yésus, na a zu bialé si va teke nsem. (1 Pierre 2:22) Yésus émien a nga jô na a nga so si va na “a ve ényiñe jé ntañe bôt abui.” (Marc 10:45) Ntañ ô nga kôté bia abé a awu asu na bi bi ényiñ.—Jean 3:16.
AWU DA YE MAN ÉYOÑ ÉVÉ?
Avale nkulan ajô ya Kalate Zambe ô mbe ô liti’i, bi nga nyiñe “mbia biyoñ;” nalé a liti na bi nga nyiñe “melu me asu’ulan” ya mbia nta’ane mame nyi. (2 Timothée 3:1) E memane ya melu y’asu’ulan, bôte be nji bo nkômbane Zambe ba ye ‘tyi’ibane mejô a jañ.’ (2 Pierre 3:3, 7) Ve bôte ba nye’e Zambe ba ye nyiñ a ba ye bi “ényiñe ya melu mese.”—Matthieu 25:46.
Bemillion be bôt befe ba ye bi fane ya nyiñe nnôm éto éyoñe ba ye wômô. Yésus a nga liti jam ete éyoñ a nga ke tisone ya Naïn. Atyi’i mone nkuse minga éziñ é nga wu; ane Yésus a nga “ko nye éngôngo” a wômôlô nye. (Luc 7:11-15) Nde fe, nlômane Paul ô nga jô na: “Me abuni Zambe . . . na bôt be aye wômô mesoñ, ba be ne zôsô a ba be ne bikotekot.” Ndi nlem éte é ne ndeme ya beta nye’ane Zambe a bili asu bone be bôt.—Mam Minlôman 24:15.
Bemillliard be bôte ba ye nyiñe nnôm éto. Kalate Zambe a jô na: “Bôt be ne zôsô b’aye nyoñe si, a tabe été nnôm éto.” (Besam 37:29) Éyoñ éte, môt ase ya be be a ye bo benya meva’a, a yen ane mejô nlômane Paul ô nga tili den a nto mimbu 2 000 ma jaleban: “A awu, ndañane wôé ô ne vé? A awu, nlôbane wôé ô ne vé?” (1 Becorinthien 15:55) Nsiñe wongan, awu, a ye fo’o vas éyoñe jia ya biyoñe bise!