1, 2. (a) Jé ja dañe dia mise mangan? (b) Bia nye’e benya mejôô mevé, a amu jé? (Fombô’ô befôtô ya atata’a.)

BIÔM bise ô bili, évé ja dañ édima mise môé? Ye ô ne fole je a jôm é nji dañe mfi nga? Biyalane ya minsili mite bi ne tyi’ibi asu bebo bisaé be Yéhôva. Élate jangan a Yéhôva nje ja dañe mfi mise mangan, bi vo’o fole je a jôm éfe. Bia nye’e fe benya mejôô ya Bible amu mme ma volô bia na bi bi élat éte a Ésaa wongan a ne yôp.​—Beco. 1:9, 10.

² Tame ve’ele simesane mam mese Beta ñye’ele wongan a ye’eleya bia! Bible a kate bia jôé dé a mbamba mefulu mé. A liti bia mfi ya ntañ, ñwô ôte Zambe a nga ve bia a zene ya Mone wé, Yésus Krist. Yéhôva a kate bia jé é ne Éjôé Messie, a ye’ele bia na miñwo’ane mi bili ndi nleme ya ke nyiñe yôp, a na “mintômba mife” mia ye nyiñe Paradis si va. (Jean 10:16) A kate bia fatane ntaban bia yiane bi. Bia nye’e benya mejôô mete amu ma bo na bi subu Nté wongane bebé, a na bi wô’ô ényiñe mvaé.

3. E kus benya mejôô a nji tinan aya?

 ³ Yéhôva a ne akap. A vo’o nyume môt a jeñe benya mejôô mvaé éziñ. A nga kañese na édiñe Mone jé é wu é butane bia. Nde, a vo’o sili bia moné asu benya mejôô mé. Môs éziñ, môt a nga kômbô ve nlômane Pierre moné, môt ate a mbe jôé na Simon, éyoñ éziñ a mbe a yi na a kuse mveane ya nsisim, ve Pierre a nga jô nye na: “Argent wôé [a jañe’ a] womien, amu wo ate si’a ko na wo aye kuse jôm Zambe a ve, a moné.” (Mam. 8:18-20) Nde éyoñ Bible a jô na “kuse’e benya mejôô,” nalé a tinane ñhe aya?

4. Jé bia zu yen a lat a benya mejôô ayé’é di?

⁴ Lañe’e Minkana 23:23. Môt a ne éles a vo’o yem benya mejôô me ne Bible été. Bia yiane bo mam mese ma sili mfa’a ya yeme me. Avale mfefe’e ntili kalate Minkana a jô, éyoñ bi ‘kuseya’, nge ke éyoñ bi biya “benya mejôô,” bi nji yiane beta “kuane” me, nge ke suu me. Bi tame zu yen jôm bifia “kuse’e benya mejôô” bia tinan, a tañ bia yiane ya’an asu na bi bi me, nge bi ne kobô ajô tañ. Nalé a ye bo na bi tu’a nye’e benya mejôô, a na bi ve ngul ése na bi bo te “kuane” me môs éziñ. Avale bia zu yen, e kuse benya mejôô a ne fo’o jam môt ase a yiane bo.

5, 6. (a) Aval avé bi ne kuse benya mejôô zezé? Va’a éve’an. (b) Bibotan bivé benya mejôô ma soo bia?

⁵ Aval avé jôm é ne bo fili ve é sili’i ngume tañ? Éfia ya nkobô Hébreu be nga kôñelane na ‘e kus’ e kalate Minkana 23:23 ja tinane fe na, “e bi.” Nalé a tinane na bia yiane ve mengul asu na bi bi jôm é ne édima. Bi tame nyoñ éve’an: Bi tame jô na wo wô’ô be yôta’ane na ba kabe nya’a makit. Ye nya’a éte ja ye zu koone wo nda nga? Momo. Wo yiane kôlô si a ke makit asu na ô bi je. Nyak é ne fo’o fili, ve wo yiane wulu a ke nyoñe je makit. Aval ete fe, bia kuse ke benya mejôô a moné. Ve bia yiane ve mengul asu na bi bi me.

⁶ Lañe’ Ésaïe 55:1-3. Mejô me Yéhôva mete ma tu’a faé bia éfufup. Yéhôva a jô na mejô mé me ne ane mendim, menyañ, a vin. Mejô me Zambe ma volô bia minlem aval ane mbamba mendim ma tyi’i bia évé. Ma wônô fe bia a volô bia na bi yaé nsisim, fo’o ve aval ane menyañ ma ve môte ngule nyul a bo na bongô be yaé. Ve mejô me Yéhôva me ne fe ane vin. Aval avé? Bible a jô na vin a ve môt ava’a nlem. (Bs. 104:15) Nde éyoñ Yéhôva a jô bebo bisaé bé na be “kuse vin,” a ne ane a jô bia na, nge bia tôñ mejô mé, bia ye bi abui meva’a ényiñ. (Bs. 19:8) Nga éve’an éte ja kôme liti bibotane môt a yé’é Mejô me Zambe a bi éyoñ a tôñe me ényiñe jé? Aval ete fe, bia kuse benya mejôô a mengule bia ve na bi bi me. Bi tame ñhe zu yen biôm bitan bi ne kuse bie benya mejôô.

7, 8. (a) Amu jé da sili éyoñ asu na bi kuse benya mejôô? (b) Aval avé mongô sikôlô éziñ a nga kuse benya mejôô, a bibotan bivé a nga bi?

⁷ Éyoñ jôé. Môt ase a kômbô kuse benya mejôô a yiane ve éyoñe jé. Da  sili éyoñ na môt a vô’ôlô foé ya Éjôé, na a lañe Bible a bekalate bangan, na a bi ayé’é étam, na a kômesan bisulan, a na a tabe bisulan. Bia yiane “yeme belan éyoñ” jangan, nalé a tinane na, bia yiane sé’é éyoñe bia bo je mam me nji dañe mfi. (Lañe’e Beéphésien 5:15, 16, Mfefé Nkôñelan.) Da sili abim éyoñ avé na bi yé’é mbôka’a ya miñye’elane ya Bible, a yeme wô? Môt émien nnye a ne yalan nsili ôte. Bia ye ke mane yé’é mam mese me tii a fe’e Yéhôva, mezene mé, a mimboane mi mam mié môs éziñ. (Bero. 11:33) Nkume mmombô a bete a nga taté kui a nga jô na, benya mejôô me ne ane “mone sam;” a nga ba’a na: “Te koé ve same jijia. Nge é mbe é sili’ ve same jia, Zambe a nji ye té abim abui mesame di. Kele’ ôsu a kôane benya mejôô mefe, jeñek abui.” Sili’i womiene na: ‘Mesame ya benya mejôô tañ aya me ne élaé same jam?’ To’o éyoñ bia ye nyiñe nnôm éto, bia ye ke ôsu a yé’é yeme Yéhôva. Den, jam é ne mfi é ne na, bi belan éyoñe jangan a fek, mfa’a ya kus abim benya mejôô ese bi ne ngule ya kus. Bi tame zu kobô ajô môt éziñ a nga kuse benya mejôô nalé.

⁸ Mariko * a ne ngone Japonaise, a nga zu bo sikôlô New York, États-Unis. A nga taté be ñyebe éziñ, ñyebe ôte ô nga kaa Japon amane mbu 1959. Nkpwa’a mefan éziñ nnye a nga kute mbé wé. Éyoñ Mariko a nga wô’ô benya mejôô sita ate a nga kañete nye, a nga bi abui avak, ane a nga sili ayé’é Bible biyoñ bibaé sondô. Akusa bo mon ésaé wé, a sikôlô bi mbe bi nyoñe’ nye abui éyoñ, Mariko a nga taté fe na a tabe bisulan. A kandane fe a bikôane biziñ mfa’a ya kus éyoñ asu na a yé’é benya mejôô. Ane a nga ji’a taté na a yaé nsisim. A nga duban mvuse mbu wua. Mvuse ngon ésaman, a nyoñ ésaé nkpwa’a mefan, a ngenane nkpwa’a mefan azukui den.

9, 10. (a) Benya mejôô ma bo na bi yen akum aya? (b) Jé mona minga éziñ a nga bo éyoñ a kuseya benya mejôô, ye a jôban?

⁹ Akum. Éyoñ bia kuse benya mejôô, e ne sili na, bi jô’é asu ésaé dangan, nge ke na bi lume minsôñane miangan miziñe mvus. Éyoñ Yésus a nga jô Pierre ba André na, be bo “beyobe bôt,” “be nga li’i mevot” map a tôñe nye. (Mt. 4:18-20 Mfefé Nkôñelan) Bi nji jô na môt ase a yé’é benya mejôô den a yiane jô’é ésaé jé. Kalate Zambe a jô na môt a yiane toñe nda bôte jé. (1 Tim. 5:8) Ve e wô’ô kui na, môt a sôan ôsimesane wé a lat a biôm bi mo, éyoñ a tatéya na a yé’é Mejô me Zambe. Yésus émien a nga kobô de, a nga jô na: “Te kôan akume si nyô . . .  Ve mi kôan akum [denane] yôp.” (Mt. 6:19, 20) Bi tame zu kobô ajô ngone minga éziñ.

¹⁰ Maria a nga taté na a yé’é golf a too mongô, valé a ngenane te bi ôkala ya ke sikôlô. A nga ke ôsu a lé golf e lycée a université. A mbe a nye’e golf, asu ésaé a mbe a kômbô’ô bo ényiñ jé le. Ve Maria a nga taté na a yé’é Bible, ane benya mejôô me nga nambe nye nlem. A mbe a nye’e mintyéndan a nga bo ényiñe jé. A nga jô na: “Éyoñ ése me mbe me bo’o aval  Bible a jô, ava’a dam é mbe ve nenenen.” Maria ve yemelane na, a nji bo ngule ya tôñe Zambe ba akum. (Mt. 6:24) Ane a nga vuane nsôñane wé ya bo beta nlé golf, a biasé fe duma ésaé éte é nga ye soo nye. Den a ne nkpwa’a mefan, a jô na teke ényiñ éfe é ne mvaé ane jili.

11. Jé é ne kui zañe bia be bôte bangan éyoñ bia kuse benya mejôô?

¹¹ Bilate biangan. Éyoñ môt a tyi’i na a tôñe miñye’elane ya Bible ényiñe jé, bemvôé bé a bivuvumane bié bi ne taté na bia tyetebe nye. Amu jé? Yésus a nga ye’elan Ésaa ajô ya beyé’é bé a jô’ô na: “Tune be a benya mejôô. Mejô môé me ne [benya mejôô].” (Jean 17:17; Mfefé nkôñelan.) Bifia “tune be” bi ne fe tinane na “kandé be.” Éyoñ bia yebe benya mejôô, bia kandan émo amu bia sa’ale mimboone mi mame ya été. Bôte ba yene bia aval étam amu bi nji beta yene mam ane be. Bia tôñe miñye’elane ya Kalate Zambe ényiñe jangan. To’o bi nji yi, bemvôé bangan a bôte ya nda bôte jangan be ne taté na ba sa’ale bia, nge ke wosane mbunane wongan. Bi nji ye’ane jam ete. Yésus émien a nga jô na : “Bôt be asiñe môt be aye bo bôt ya nda jé.” (Mt. 10:36) Ve a nga ka’ale fe bia na, ma’ane mangan ma ye bo anen a dañe jôm ése bi ne jañele éyoñ bia kuse benya mejôô.​—Lañe’e Marc 10:28-30.

12. Mone Bejuif éziñ a nga kuse benya mejôô aya?

¹² Aso mongô, be nga ye’ele Aaron, mone Bejuif a beta mbo makite na, môt a nji yiane tot éyôlé Zambe. Ve, a mbe a wô’ô évé ya yem benya mejôô. A nga kam éyoñ mone Bengaa éziñ a nga kate nye na, nge be somesan bevoyelle béziñe bikanga binyine ya jôé Zambe nkobô Hébreu, be ne lañe je na “Yéhôva.” Nné ane a nga wô’ô de, a nga valé mbil, a ke kate de berabbin synagogue. Ve a nga viane vembe na, be li’i wô’ô mvaé, be nga viane yaa nye a daa nye atan. A nga tôbane fe mewosane nda bôte jé. Ve a nga ke ôsu a kuse benya mejôô teke mate, a nga wu a to éwôlô Ngaa Yéhôva. Ane Aaron, bia fe bia wô’ô mvaé ya kuse benya mejôô, to’o nalé a bo na bemvôé bangan a nda bôte jangan be wosane bia.

13, 14. Asu na bi kuse benya mejôô bia yiane tyendé mimboone mivé a asimesan avé? Va’a éve’an.

¹³ Mbia b’asimesan a mbia ntaban. Asu na bi kuse benya mejôô a tôñe miñye’elane ya Bible, bia yiane tyendé asimesan dangan a ntabane wongan. Tame lañe mejô me Pierre ma: “Aval ane bon be abo mewôk, te boane miabebien aval ane mbia minkômbane ya melu mvus éyoñ mi nga dimi . . . Bo’an mfuban mfa’a ya avale ntaban ese.” (1 P. 1:14, 15) Bôte ya Corinthe be mbe be bo’o angôndô ya mbia be mam, nde asu na be kuse benya mejôô, e mbe e sili’ na be tyendé. (1 Bec. 6:9-11) Dene fe abui bôte da yiane jô’é mbia mimboon asu na be kuse benya mejôô. Pierre a nga ba’alane Bekristene ya ntete mimbu ôsu na: “Biyoñ bi lôteya bi yianeya mfa’a ya mane bo nkômbane ya Begentil, a mane wulu bisôk été, mbia minkômban, minso’an mi vin,  njeman mbia mebôk, mbia bisulane ya di a nyu, a ébiasé nkañane bezambe befe.”​—1 P. 4:3.

¹⁴ Devinn ba ébone jé Jasmine be mbe beso’o meyok. Devinn a mbe ntyetyeñ comptable, ve mbia nyuane meyok a nga bo na a kate ba’ale ngum asu ésaé. Jasmine a mbe njet a ôngase. Môs éziñ, a kele a so’o meyo’o njoñ njoñ, Jasmine a nga tôbane bemissionnaire bebaé. Ane ba be nye be nga kui tyiñ na ba ye bo be yé’é Bible, ve éyoñ be nga ke jome nye, be nga koone Jasmine ba Devinn be bili’i meyok. Be nji be be buni’i na, bemissionnaire be ne vañe jañele éyoñ na ba zu jome be. Éyoñ be nga beta ke jome be, be nga koone be be to teke nyuan, ane be nga taté ayé’é. Ataté môs ôte, Jasmine ba Devinn be nji beta bo fianga a ayé’é dap, be nga taté fe na ba tôñe miñye’elane ya Kalate Zambe ényiñe jap. Mvuse ngon élal, be nga tyi’i na ba tyi meyok, be su’ulane fe lat alu’u dap. Bôte bese ya nlame wop be nga kam avale ntyéndan ete, ane abui ya be be e nga taté fe na da yé’é Kalate Zambe.

15. Jé é ne bo na môt a kate kuse benya mejôô, amu jé?

¹⁵ Metum a mefulu Zambe a vini. E ne bo ayaé na môt a kus benya mejôô nge da sili na a jô’é metum méziñ. Bôte béziñ ba bo fo’o de, ve ba bevok ba koo nda bôte jap, bôt ba be be ba saé, a bemvôé bap woñ. Bôte bevo’o ki ba yen ayaé ya bo teke tôñe metum éyoñ ba te jañele môte ba nye’e. (Dt. 14:1) Ve bi ne vu bôt be nga liti fulu ayo’o nlem a kandane mbia metum. Bi tame zu yen aval bôte béziñ ya Éphèse be nga bo ntete mimbu ôsu.

16. Jé Bekristen béziñ ya Éphèse be nga bo asu na be kuse benya mejôô?

¹⁶ Bôte ya Éphèse be mbe be nye’e magik angôndô. Jé mimfefé Bekristen bete be nga bo asu na be jô’é mbia fulu ate? Bible a jô na: “Bôt abui, be nga bo [magik], be nga kôan bekalate bap, a di’i be nduan, bôt bese be too; ane be nga lañ tañe moné ya bekalate bete, a yeme je bifase bi [argent] betoyini mewôm metan. Ane mejô me [Yéhôva] me nga dañe yaé a bo ngul.” (Mam. 19:19, 20) Bekristen bete be nga jañele fo’o abui moné na ba kuse benya mejôô, ve be nga bi bibotan a lôte nné.

17. (a) Mam mevé bi ne ve asu na bi kuse benya mejôô? (b) Bia ye bi biyalane ya minsili mivé ayé’é da zu?

¹⁷ Wo ki, ô nga ve jé asu na ô kuse benya mejôô? Bia bese bia ve éyoñ na bi kôane mesame ya benya mejôô. Bôte béziñ ba lum akum dabe mvus, ba bevo’o ba yiane kandan a mewoso méziñ. Bevo’o ki ba yiane tyendé ôsimesane wop a ntabane wop, nge ke jô’é metum a mefulu Zambe a vini. Bia yeme na, bi vo’o ve’e bibotan bia bi éyoñ bia kuse benya mejôô a jôm éziñe ya bi bia te lañe le. Benya mejôô ma dañe mam mete mese, amu ma bo na bi bi ngul élat a Yéhôva. Éyoñ môt a kômeya yeme mfi ya benya mejôô, a yene môt a bele kômbô kuane me ane akut da bôm ôsôé. Jé é ne bo na môt a kuane benya mejôô, a aval avé bi ne sa’ale bo de? Bia ye yene biyalan ya minsili mite ayé’é da zu.