Di ngwés hiki mut, di tinak bôt bobasôna lipém. I ngéda Mbôgi Yéhôva i nkahal tomb, tole i nsomol, di ntiige nye bebee, a di lédés nye, di hôla ki nye i témb i njel Nyambe.​—Lukas 15:4-7.

 Ngim mangéda, maboñok ma mut ma nla boñ le ba pémés nye i ntôñ. (1 Korintô 5:13) Ndi, gwéha di ngwés nye i mboñ le di noode ndugi hôla nye inyu boñ le a pam bañ i ntôñ. To a nsôk a pam i ntôñ, di ngwés nye, di tinak nye lipém kiki bañga i Djob i niiga bés.​—Markô 12:31; 1 Pétrô 2:17.

Kii i yé i boñ le ba pémés mut i ntôñ?

 Bibel i nkal le, ibale ngwélél Djob a mboñ bipôm ndi i tam bé, ba nlama pémés nye i ntôñ. (1 Korintô 5:11-13) Bibel i nyelel bibéba bi bi mboñ le ba pémés mut i ntôñ. Ndôñ bibéba kiki bo ndéñg, lihiua, manola, i tét bôt, ni wip.​—1 Korintô 6:9, 10; Galatia 5:19-21; 1 Timôtéô 1:9, 10.

 Ndi, ngéda mut a mboñ i nya jam i, di ta di pala bé pémés nye i ntôñ. Mimañ b mi nya hôla ndugi nye i héñha. (Rôma 2:4) Ba nkena nye mbeñee inyule hinoo hitombga hion hi héa pos. (Galatia 6:1) Mu minyaô mi, a nla pôp ñem, a yi hihôha hié, a tam. (2 Timôtéô 2:24-26) Ndi ibale ba noode hôla nye ba waa, a nai ndigi le a mboñ béba boñ ni boñ, ba mpémés nye i ntôñ. Ha ni nyen mimañ mi nlegel i base le a ta ha bé Mbôgi Yéhôva.

 Inyuki ba mpémés mboñbéba i ntôñ? Pog, maboñok mé mabe ma yé le ma hoo jôl li Djob mahindi, a yé ki le a tinde bahémle bape i boñ béba. (1 Korintô 5:6; 15:33; 1 Pétrô 1:16) Ndi i ngéda ba mpémés nye i ntôñ, binyuu bi yé le bi nol nye. Jon, a nla tam béba yé, a kahal yéñ manjel i témb i ntôñ.​—Lôk Héber 12:11.

Lelaa Mbôgi Yéhôva i ntehe i bet ba mpémés i ntôñ?

 Bibel i nkal le di “kiha ha bañ” ni mut ba mpémés i ntôñ, di ‘je bañ to lôñni i nya mut i.’ (1 Korintô 5:11) Jon, di nkiha ha bé ni nya mut i. Ndi, hala a nsômbôl bé kal le di nlama yan nye. Di nsôña bé to le a loo i base. I ngéda a nlo, di nla yéga nye. c A nla bat yak mimañ le mi hôla nye i témb i ntôñ.

 I ngéda ba mpémés mut i ntôñ, nwaa ni bon ba bak Mbôgi Yéhôva, ba mboñ laa? Ba nla ha bé bégés Djob ntôñ, ndi hala a nkobla bé le a ta ha bé isañ mbai. Ba yé ntôñ i ndap, jon a nlama niñ ni bo kii isañ mbai a niñ ni nwaa ni bon.

 I mut ba mpémés i ntôñ, a nla naña mimañ i mbai yé. Ha yo ngéda, mimañ mi nti nye maéba inyu hôla nye i tam béba yé ni i témb i ntôñ. (Sakaria 1:3) Ibale a ntam toi béba yé, a héñha héñha yosôna, a ntémb i ntôñ. Likoda li “nwéhél nye, li ti ki nye hogbe,” kiki bikristen bi Korintô bi bi boñ, i ngéda mboñbéba wada nu a bé mu likoda jap a bi tam béba yé.​—2 Korintô 2:6-8.

I bet ba bi pam i ntôñ ndi ba témb ba jôp ba nhoñol laa?

 Mbôgi Yéhôva ihogi i bi pam ndugi i ntôñ, ndi i témb i jôp. Di béñge i yom ba nkal.

 Maria nu a yé i Amérika, nye: “I ngéda me bi kit le me ntémb i ntôñ, me bé hoñol le mimañ mi ga bat me mam me bi boñ mu i nwii mi nwominsôna. Ndi, ba bi kal ndik me le: ‘ We béñge ndik mam ma yé we i bisu.’ Ñem u bi mom me nwee.”

 Malcom nu a yé i Sierra Leone, nye: “Lôk kéé i bé bem ndigi le ba legel le me ntémb i ntôñ. Ba bi leege me loñge le! Libak jap li bi boñ me le me yodop ha bañ inyu béba me bi boñ. Mimañ mi bé me ha pañ, mi hôlga me i lédés hémle yem. Ba bi tos me gwiiha, ba yis me le Yéhôva a ngi gwéhék me, a nla bé lep me.”

 Sandi nu a yé i Amérika, a nkal le “Gwéha Yéhôva a ngwés ntôñ wé yon i mboñ le a pubus wo. Hala a nkônha me maséé ngandak. Bôt bahogi ba nkal le Mbôgi Yéhôva i yé bibéba bi bôt inyule ba mpémés bôt i ntôñ. Ndi ki le loñge jam i. Ibale mut a ngwés bé we, a nla bé boñ we i nya jam i. Me nti Tata wés nu a yé ngii mayéga inyu nwéhél a nwéhél me, ni gwéha a ngwés me.”