Libii li Mbôgi Yéhôva li ta bé ngand i binene, li yé ngand i ntina lipém i het ba nti nkwel u Bibel u u mbéñge libii. I mbus ngand libii, babiina ba yé le ba naña bôt i je ni i nyo lôñni bo. a Hala a yé loñge i yi le Yésu nyemede, i bibôdlene bi nson wé, a bé i ngand libii yada i tison Kana.​—Yôhanes 2:1-11.

•  Lelaa ngand libii i ntagbe?

•  Hee homa mabii ma Mbôgi Yéhôva ma ntagbene?

•  Njee a nla ke i ngand libii?

•  Baa mbot ngand i tôbôtôbô i yé?

•  Baa babiina ba neebe makébla?

•  Baa i bôt ba nlo i ngand ba ntôômana bitômblô?

•  Baa ba yé le ba leñ babiina kôn tole gwom bipe?

•  Baa bijek ni maok bi yé mu ngand libii?

•  Baa yak nsik tole masak bi yé mu ngand libii?

•  Baa Mbôgi Yéhôva i ntégbaha ngand mbigda i kel libii?

 Lelaa ngand libii i ntagbe?

 Jam li nlôôha nseñ i ngand libii li yé nkwel Mbôgi Yéhôva yada i nti, u nom bebee le 30 ma manut. I loñge nkwel u, u mbéñge babiina; u ñunda lelaa babiina ba yé le ba noñ maéba ma Bibel inyu boñ le ba bana niñ maséé i libii jap, ni le libii jap li nom.​—Éfésô 5:33.

 I ngandak biloñ, ngomin a neebe le Mbôgi Yéhôva i at mabii. Ha ngéda i, bebee ni mamélél ma nkwel libii, babiina ba nyegna likak li libii. Ba yé ki le ba hana dilonde. I mbus, nti nkwel a nlegel le ba yé nwaa bo nlôm.

 I biloñ bipe, mbén i nkal le mut ngomin nyen a nlama at mabii. I maada ma, ma mbéna tagbe ndék ngéda ilole nkwel u libii u mbôdôl. Ibale nwaa bo nlôm ba nyegna bé likak li libii i bisu bi mut ngomin, ba nla boñ hala i mamélél ma nkwel. Ibale ba bak ba yegna likak li libii i bisu bi mut ngomin, ba nla tiimba boñ hala i ngéda nkwel u libii, ndi ba ga gwélél bibuk bi ñunda le ba mbôk ba yegna likak li libii i bisu bi ngomin. I mbus nkwel, mankéé a nsoohene babiina le Djob a sayap libii jap.

 Hee homa mabii ma Mbôgi Yéhôva ma ntagbene?

 Ngandak Mbôgi Yéhôva i ngwés i ntégbaha nwel u libii jap i Ndap Ane yada, ibale ba yé le ba boñ hala. b Ibale babiina ba nkôôba le ba nleege bôt, ba ga ke homa numpe.

 Njee a nla ke i ngand libii?

 Ibale libii li yé i Ndap Ane, tonjee a nla ke nyoo, hala wee ba ba yé Mbôgi Yéhôva, ni ba ba ta bé Mbôgi Yéhôva. Ibale babiina ba ngwés lôôs ngand, bon ba ga pohol i bôt ba nlama ba i ngand yap.

 Baa mbot ngand i tôbôtôbô i yé?

 I ngéda libii li yé i Ndap Ane, ngim mbot i tôbôtôbô i ta bé, ndi Mbôgi Yéhôva i mboñ biliya i noñ maéba ma Bibel inyu mahabga, i haba mambot ma ma kôli, ma ma ñunda bé to môñga map ma nyuu. Ba yé ba ba maséé i ngéda yak i bôt ba ba ta bé Mbôgi Yéhôva, ba mboñ nlélém jam i ngéda ba nlo i Ndap Ane. (1 Timôtéô 2:9) Hiki mut a nlama ki noñ i matiñ ma i ngéda ngand yomede, ibale babiina ba nkôôba le ba ga tégbaha ngand.

 Baa babiina ba neebe makébla?

 Bibel i nti bés makénd i bana lem likap. (Tjémbi 37:21) Mbôgi Yéhôva i yé maséé i ti ni i neebe makébla. (Lukas 6:38) Ndi babiina ba ba yé Mbôgi Yéhôva ba mbat bé le ba ti bo makébla, ba nsima bé to môl ma bôt ba ba nti bo mo. (Matéô 6:3, 4; 2 Korintô 9:7; 1 Pétrô 3:8) Hala a nkiha bé ni i yom Bibel i nkal, hala a yé ki le a tééñga bôt ba ba yé i ngand.

 Baa i bôt ba nlo i ngand ba ntôômana bitômblô?

 Bibel i nsôñga bé i paa tole i tôômana bitômblô, ndi babiina bahogi ba nla bat i bôt ba naña i libii jap le ba paa bañ bitômblô, ibale hala a nla ba ngok baagene inyu bape.​—Rôma 14:21.

 Baa ba yé le ba leñ babiina kôn tole gwom bipe?

 To. I biloñ bihogi, i bôt ba yé i ngand libii ba gwé lem i leñ babiina kôn, tole gwom bipe hala. Bôt ba mboñ hala inyule ba nhoñol le hala a ga lona babiina masoda, ba gwal ngandak bon, ni le hala a’ boñ le ba nom ntandaa ngéda, ni le ba ba maséé mu libii jap. Ndi Mbôgi Yéhôva i ntjél bilem bi bi umne i mam ma téé bé bôt ba nhoñol. Inyu hala nyen ba nkal bé mut le “masoda ma ba ni we”, inyule ba nyi le hala a nkiha bé ni matiñ ma Bibel.​—Yésaya 65:11.

 Baa bijek ni maok bi yé mu ngand libii?

 I ngéda nkwel u libii u ntagbe i Ndap Ane, ba nkap bé bijek, to maok, i Ndap Ane. Babiina bahogi ba mpohol i tégbaha ngand i mbus nkwel u libii, ha ngéda i nyen bijek ni maok bi nla ba. (Ñañal 9:7) Ibale ba nkit le ba nti i bôt ba nlo i ngand maok, ba nyoñ yihe le maok ma loo bañ hihéga, ba nti ndik mo i bôt ba gwé nwii mi kôli inyo maok, kingéda mbén i loñ.​—Lukas 21:34; Rôma 13:1, 13.

 Baa yak nsik tole masak bi yé mu ngand libii?

 Ibale babiina ba mpohol le ba mbana ngand, ba yé le ba pohol le nsik ni masak bi ga ba. (Ñañal 3:4) Ba nyoñ ngéda i pohol minsik minlam, mi mi nlémél bo, bebek mi ba ntuk i mbok yap. I ngéda nwkel libii u ntagbene i Ndap Ane, ba mbéna ki tuk tjémbi, di di umne i Bibel.

 Baa Mbôgi Yéhôva i ntégbaha ngand mbigda i kel libii?

 Kiki matiñ ma Bibel ma nkal bé le kristen i nlama bigda kel yé i libii, ndi to sôñga ma nsôñga bé i boñ hala, jon babiina ba ba yé Mbôgi Yéhôva bon ba mpohol too b’a bigda kel yap libii tole to. Ibale babiina ba mpohol le ba ga bidga kel yap libii, ba nla boñ hala bo iba ndigi, tole ni mawanda map loñni mahaa map.