Ndimbhe i Bibel

 Biliya bi bôt ba binam bé gwon bi ga lona nsañ hana ’isi, ndi Ane Djob, i i bi tééba nyoo i ngii, yon i ga lona wo. Yésu nyen a yé Kiñe mu Ane i. Béñge mimbônga minlam Djob a mbôn bés ikété Bibel inyu dilo di nlo:

1.   Djob a ga “mélés gwét i nkoñ ’isi wonsôna,” a yônôs mbônga wé i lona “nsañ hana ’isi ikété bôt ba nlémél nye.”​—Tjémbi 46:9; Lukas 2:14, Kaat Nyambe.

2.   Nyoo i ngii nyen Ane Djob i ga énél i ngii bôt ba binam bobasôna hana ’isi. (Daniel 7:14) Kiki yon i ga énél mbok yosôna, i ga mélés ngôk bôt ba gwé inyu loñ yap, inyule yon i nlona ngandak ngimanôgla munu nkoñ ’isi.

3.   Bibel i nsébél ki Yésu, Kiñe Ane Djob, le “Ñane nu nsañ;” jon a ga yoñ bitelbene kayéle ane yé ni “nsañ bi ga bana bé lisuk.”​—Yésaya 9:6, 7.

4.   I bôt ba ga nai ndik ni bisañ ni gwét, ba ga bana bé kunde i niñ isi Ane Djob, inyule “[Djob] a ñoo nu ni nu a ngwés bisañ.”​—Tjémbi 11:5; Bingéngén 2:22.

5.   Djob a yé niiga i bet ba ga niñ isi énél yé lelaa ba niñ ikété nsañ. Inyu pôdôl bisai i suklu i, i nlona, Bibel i nkal le: “B’a yilha paminsoñ yap disoo, yak makoñ map m’a yila minhôdôk mi bakwade. Loñ y’a pa ha bé pansoñ inyu jôs loñ ipe, b’a nigil ha bé to i jo gwét.”​—Yésaya 2:3, 4.

 I len ini, ikété nkoñ ’isi, didun di Mbôgi Yéhôva di neebe le Djob a niiga bo lelaa ba yila bakôp nsañ. (Matéô 5:9) To hala kiki di nlôl ikété iloo 230 biloñ, di lôlak i ngandak matén, di ntjél yoñ mangaa, bakwade ni gwom bipe, inyu jôs mut wés libôk.