Bibel i niiga bés le di nlama ti makébla ma ma nlôl ñem, di ban-ga ki mahoñol malam. Bibel i nkal ki le ngéda likébla li yé lilam, li nkônha nwet a nti maséé, yak nu a nkôs likébla a yé maséé. (Bingéngén 11:25; Lukas 6:​38) Yésu a bi kal le: “Ti i nlona maséé iloo kôhna.”​—Minson mi baôma 20:35.

•  Makébla ma ma nlémél Djob

•  Makébla ma ma nlémél bé Djob

•  Kii Bibel i nkal inyu jam li?

 Yéhôva a ngwés nwet a nti makébla ni mahoñol malam. “Hiki mut a boñ kiki a nkit ikété ñém wé, ha ni hiun bé tole wengoñle ba nyégsa nye, inyule Nyambe a ngwés i mut a nti ni ñem maséé.”​—2 Korintô 9:7.

 Ikété “bibégés” Djob a nyéñ, a mbem le di ti makébla ni ñem wonsôna. (Yakôbô 1:​27) Mut a gwé lem i hôla bôt bape a nsal lôñ yada ni Nyambe, a yé wengoñle a yé i pôôs Nyambe inyu maboñok mé malam. (Bingéngén 19:17) Bibel i nkal le Yéhôva a ga sayap nwet a mboñ hala.​—Lukas 14:12-​14.

 Makébla ma ma ntina ni mahoñol mabe. Kiki hihéga:

•   Inyu nene.​—Matéô 6:2.

•   Inyu kôhna ngim jam.​—Lukas 14:12-14.

•   Inyu kôs niñ boga.​—Tjémbi 49:7, 8.

 Makébla ma ma nit mam Djob a ñoo. Kiki hihéga, i ta bé loñge i ti mut moni, inyu boñ le a kee tuk bia, a ôt hibañga tole a kee nyo, a hiô. (1 Korintô 6:​9, 10; 2 Korintô 7:1) I ta bé ki loñge i ti mut moni inyu hôla nye, ki le a nla sal inyu bana yé moni ndi a ntjél boñ hala.​​—2 Tésalônika 3:​10.

 I ti bôt bape ngandak makébla kayéle di hôya mahaa més. Bibel i nkal le isañ mbai a nlama jés lihaa jé. (1 Timôtéô 5:8) I ta bé loñge le isañ mbai a ti bape ngandak mam, ndi i mbus a bana ha bañ to yom inyu lihaa jé. Inyu hala nyen Yésu a bi sima bet ba bé tjél ti miñunuk mi bagwal bap moni inyule ba bé kal le moni mi, ba ga “kébél gwo Nyambe.”​—Markô 7:​9-​13.