To, Bibase gwobisôna bi ta bé nlélém. Bibel i gwé ngandak dihéga di bibase bi bi nlémél bé Djob. Di nla kap gwo ngélé iba.

Pes 1: I bégés bikwéha bi mop

 Bibel i mpôdôl bibégés bikwéha bi mop ni bini bibuk le “yañga,” “bitembee,” ni “gwañga bi gwom.” (Yérémia 10:​3-5; 16:19, 20) Yéhôva a a bi béhe i nlômbi Israel le: “U ban-ga bañ banyambe bape handuk me.” (Manyodi 20:​3, 23; 23:24) Ngéda Lôk Israel i bé bégés mop mape, “hiun hi Yéhôva hi kalna Israel.”​—Ñañga Bôt 25:3; Lôk Lévi 20:2; Bakéés 2:​13, 14.

 Yéhôva a gwé nlélém litehge inyu bibégés ba nti “ba ba nséblana le banyambe.” (1 Korintô 8:​5, 6; Galatia 4:8) A mbéhe ba bobasôna ba nsômbôl bégés nye le ba nlama bé bana maada ni bôt ba mbégés bikwéha bi mop. A kal le: “Jon pama mu ipôla yap, ni bagla ki ni bo.” (2 Korintô 6:​14-​17) Ibale bibase gwobisôna bi yé nlélém ni le gwobisôna bi nkena yak Djob, inyuki a nti i nya mabéhna mana?

Pes 2: I bégés Bañga Djob i nya i nlélém bé nye

 Ngim mangéda, Lôk Israel i bé bégés Djob ni manjel bôt ba bé gwélél inyu bégés bikwéha bi mop, ndi Yéhôva a bi tjél neebe le ba ngwañna bibégés bipubi ni bibégés bikwéha bi mop. (Manyodi 32:8; Ndiimba Mbén 12:​2-4) Yésu a bi béhe bakena bibase ba ngéda yé inyule ba bé bégés bé Djob i nya i nlélém nye; ba bé boñ wengoñle ba ngwés Djob ki le ba bé bôt ba bihéñba, ba bé “nyan mam ma nlôôha nseñ ikété mbén Môsi kiki bo telepsép, konangoo ni ndéñbe.”​—Matéô 23:23.

 Nlélém jam i len ini, ndik base i i niiga maliga yon i nla kena bés yak Djob. Maliga ma, ma yé ikété Bibel. (Yôhanes 4:​24; 17:17; 2 Timotéô 3:​16, 17) Bibase bi bi gwé biniigana bi bi nkobla biniigana bi Bibel bi nkena bôt haa ni Djob. Ngim biniiga bi yé, bôt ba nhoñol le bi nlôl ikété Bibel​—kiki bo Trinitas, le mbuu u nwo bé, yak ni biniigana bi bee hié, bi bi yôña ni bôt ba mbégés bikwéha bi mop. Bibégés bi, bi nhôñôs i nya biniigana i, bi yé “yañga,” inyule bi nyiha matiñ ma Djob lôñni bilem bi bôt ba binam.​—Markô 7:​7, 8.

 Djob a ñoo bibase bi bi héñba. (Titô 1:16) Inyu hôla bôt i kôôge bebee ni Djob, base i nlama pôdôl mam ma tihba niñ yap i hiki kel he mam mape bé. Kiki hihéga Bibel i nkal le: “Ibale mut a nhoñol le a mbégés Nyambe, ndi a tibil bé gwel hilémb hié, wee a nlôk ñem wé nyemede, yak bibégés gwé bi yé yañga. Ntén bibégés u u yé mpubi, u u gwé bé to mahindi i litehge li Nyambe ni Tata wés, wo unu le: I tééda bon ba nyuu ni biyik bi bôda ikété njiiha yap, ni le mut a tat nyemede le a hooba bañ to liton li mahindi ma nkoñ ’isi.” (Yakôbô 1:​26, 27; buk isi lipep) Ngobol mbok yondo i ngwélél bini bibuk le “ntén bibégés u u yé mpubi” inyule u yé mpubi, ngi bihéñba.