DIANA a gwé iloo 80 nwii. Nlô wé a bi kon Alzheimer (kon u mboñ le mut a nhôya ngandak), ilole a nwo, a bi yén ki ndék nwii i ndap ba nyoñ ndun ni mimañ mi bôt. U héya hala, i sita i i bi hônba nyemb i bon bé bôlôm iba, i kon ki pos libéé. Ndi bilôk bikéé bi likoda li Diana bi nkal le, ngéda bi ntehe nye i ndap Ane tole likalô, hala nhélés bo le a yé maséé hiki ngéda.

Mankéé John a bi ba ngwélél makiiña 43 nwii. A bé gwés nson u ngandak​—u bi yila kiki niñ yé! Ndi, a bi téé nson u makiiña inyu tééda mut wé lihaa wada nu a bé kon, nano a yé ntéé likalô ikété likoda. Ngéda bilôk bikéé bi bi yi John bi ntehe nye len i makoda ma makiiña tole i likoda li ndôn, bi ntehe wengoñle yom i nhéñha bé i niñ yé. Maséé mé ma ngi yii nlélém.

Kii i mboñ le Diana bo John ba tééda maséé map? Lelaa mut a nok ndutu i ñem ni i pes minsôn a nla ba maséé? Lelaa i mut a nimis nson a ndiihege ngandak a yé le a ke ni bisu i tééda maséé? Bibel i ntibil toñle bés jam li, ngéda i nkal le: “Mut a téé sép a’ kon maséé inyu Yéhôva.” (Tjémbi 64:11) Di nla tibil nok maliga mana ibale di nyoñ ngéda i wan i yom i nti maséé ma kété ñem ni yom i nip mo.

Ibabé pééna, ni nyi le ngim mam i mbéna lona maséé. Hoñol maséé ma yé ipôla bôt iba ba ngwéhna, ba sômblak ki biiba. Tole baa u nhégda maséé mut a gwé i yila ngwal, tole i kôs nson mondo i ntôñ Djob? I nya mam i i nlona maséé, inyule i mam ma niñ ma, ma nlôl ni Yéhôva. Nyen a bi téé libii, a ti bôt ba binam ngap i gwal, i bôl, a ti ki bikristen minson mi tôbôtôbô ikété likoda.​—Bibôdle 2:18, 22; Tjémbi 127:3; 1 Timôtéô 3:1.

Ndi, mam mahogi ma ma nlona maséé ma yé ndik inyu ndék ngéda. Ngoo le, i nla pam le sobiina wada a ke ndéñg tole a wo. (Ezékiel 24:18; Hôséa 3:1) Boñge bahogi ba ndogbene bagwal bap ni Djob, i nla ki pam le ba héya  bo ntôñ. Bon bôlôm ba Samuel ba bi gwélél bé Yéhôva kii i nsômbla, yak maboñok mabe ma David ma bi lona bikuu i ndap yé lihaa. (1 Samuel 8:1-3; 2 Samuel 12:11) I nya mam i i nlona ndutu ni njôghe. Ntiik, ma nlona yaga bé maséé.

Nlélém jam inyu minson mi tôbôtôbô di nla kôs, i nla pam le di nimis nwo inyule di nkon, inyu mbegee di gwé i ndap lihaa, tole inyu mahéñha ntôñ u nlona. Ngandak bôt i i bi boma i nya mam i, i nkal le i bi nimis maséé nson wap u bé lona bo.

Di nla pam i tehe le, mam mahogi ma nlona maséé, ndi maséé ma ma yé ndigi inyu ndék ngéda. Ndi baa maséé mape ma ma nom ma nla ba, yak ngéda mam ma nkahal let? Ñ, ma yé toi, Samuel, David ni bape ba bi ke ni bisu i nôgda i nya maséé i, yak ikété mandutu.

Yésu a bé yi kii i yé toi maséé. Ngéda a bé niñik i ngii, mam ma bé loñge ngandak, jon a bé “sôbhege bisu [bi Yéhôva] ngéda yosôna.” (Bingéngén 8:30) Ndi ngéda a bi lo hana isi, a bi boma mandutu ngandak. Ndi to hala, Yésu a bé maséé i boñ sômbôl Isañ. (Yôhanes 4:34) Ndi kii di nla kal inyu ngeñ yé i nsôk, ngéda a bé son njonok hana isi? Di ñañ le: “Inyu maséé ma bé nye i bisu, a bi hônba kék njiiha.” (Lôk Héber 12:2, MN.) Jon di kôli wan mam ima Yésu a bi kal inyu bañga maséé.

Lisañ jada, banigil ba Yésu ba ba bé 70 ba bi huu likalô, ba bak maséé ngandak inyu bihélha bimam ba bi boñ, ni inyule ba bi pémés bôt mimbuu mimbe. Ndi Yésu a kal bo le: “Ni kon bañ maséé le mimbuu mi nsuhus nwomede isi nan, ndi kona maséé le môl manan ma yé ntilbaga ngii.” (Lukas 10:1-9, 17, 20) Ñ, i yi le di nlémél Yéhôva i nlôôha ba nseñ, i tinak maséé makeñi ma ma nloo nson u tôbôtôbô wonsôna di nla bana i ntôñ. Djob a bé lama bigda ndéñbe i banigil​—inyu hala nyen ba bé lama bana maséé makeñi.

Lisañ lipe li Yésu a ba pôdhak limut, muda Lôk Yuda wada a kal le muda a bi gwal malét  nkeñi nunu le Yésu, a bé lama ba maséé. Ndi Yésu a bi kodol nye, a kal le: “I bak loñge i kal le: ‘Ba ba nok bañga i Nyambe, ba téédaga ki yo, ba yé nsaibak!’” (Lukas 11:27, 28) Ba maséé i ba ngwal i nla ba jam lilam kiyaga; ndi, i bana maada malam ni Yéhôva inyule di ngwés nôgôl nye, i ntina maséé iloo mam momasôna.

Ñ, i nôgda le di nlémél Yéhôva i nla ti bés maséé ma kété ñem. Tolakii mandutu ma ta bé loñge jam, ma nla bé héya bés maséé ma. Maselna ni hala, ngéda di nyémbél mo, hala a nkéñbaha maséé més. (Rôma 5:3-5) Ni le, Yéhôva a nti i bet ba mbôdôl nye ñem mbuu wé, maséé ma bak lem ilam yada mu litam li mbuu li. (Galatia 5:22) Hala a nhôla bés i tibil nok inyuki kaat Tjémbi 64:11 i nkal le: “Mut a téé sép a’ kon maséé inyu Yéhôva.”

Hala a nla hôla bés i nok inyuki Diana bo John, ba di nsima i bibôdle, ba bi tééda maséé map ikété mandutu. Diana a nkal le: “Me bi solbene yak Yéhôva kiki mañge a nsolbene yak ngwal wé.” Lelaa a bi nôgda le a bé lémél Nyambe? A nkal le: “Me nôgda le a bi sayap me ni ngap a bi ti me i ke ni bisu i téé likalô ni su maséé.” John, nu a ke ni bisu i téé likalô i mbus a bi téé nson wé makiiña a bé lôôha gwés, a ñañle bés kii i bi lôôha hôla nye: “Ibôdôl nwii 1998, ngéda ba bi om me i niiga i suklu ba bé sébél ni Pulasi le École de formation ministérielle (ngim suklu i i bé uñghak baéga likoda), me bi nigil ngandak iloo ngéda bisu.” Inyu pôdôl nye ni nwaa, a nkônde le: “Mahéñha di bé lama boñ ma bi tômbôl bés inyule di bé bebee i boñ kii yosôna Yéhôva a bé bat bés le di boñ. Di bi boñ ki mo ibabé i tam.”

Ngandak lôk kéé ipe i bi nôgda maliga ma yé kaat Tjémbi 64:11. Di yoñ hihéga hi babiina ba ba bi sal 30 nwii i Bétel i Amérika. Ba bi om bo kiki basañal ba tôbôtôbô. Ibabé i sôô jam, ba nkal le: “I ta bé nkén jam i nok njôghe ngéda u nimis ngim jam u ngwés, ndi u nla bé nok i njôghe i mba ni mba.” Ibabé i nimis ngéda, ba bi jôp nson likalô sum sum ni likoda. Ba nkônde ki le: “Di bi soohe inyu ngim gwom i tôbôtôbô. Ngéda di bé di tehe lelaa Nyambe a bé timbhe masoohe més, hala a bé ti bés makénd ni maséé. Ndék ngéda ndik mbus malo més mu likoda, bilôk bikéé bipe bi bi yoñ nson nsañal, di bi kôhna bisai i bana biloñge bi gwigil bi Bibel biba.”

Maliga ma yé le, i ta bé jam li ntomb i ba maséé hiki ngéda, inyule di ga boma mandutu. Ndi Yéhôva a nhôgbaha bés ni bibuk di nléba i kaat Tjémbi 64:11. Yak i ngéda di yé ntombok, di nla bana bôdôl le i bet ba ñunda le ba “téé sép” ni njel ndéñbe yap ngéda mam ma nhéñha i niñ yap, b’a “kon maséé inyu Yéhôva.” Ni le di nla nyamnda ni ngôñ i tehe biyônôl bi mbañ i Yéhôva ini le “ngii yondo yak ni hisi hi yondo” gw’a ba. Libak jés li kwéha li ga tééñga ha bé bés. Bagwélél ba Djob bobasôna b’a ‘séé ndigi, ba hagak ki mba ni mba’ inyu gwom a nhek, ni bi a nti bo.​—Yésaya 65:17, 18.

Hégda lelaa mam ma ga ba: Di ga tôde hiki kel nyonok ni ngui, di bak mbôô i nya i yôni. To ibale di bi nôgda imbe njôghe ñem, di ga bigda ha bé yo. Di yé nkwoog nkaa le ‘d’a hoñol ha bé mam ma bi tagbe, to bigda mo miñem nwés.’ Bitugne bi ga boñ le i bôt ba ngwéhna ba tiimba bomna. Didun di didun di bagwal di ga nôgda nlélém kiki bagwal ba hingonda hi 12 nwii, hi Yésu a bi tugul: “Ni bo ba egep ngandak kiyaga.” (Markô 5:42) Sôk i nsôk, hiki mut hana isi a’ ba “mut a téé sép” i nya i yôni, ni le mu libak li, “a’ kon maséé inyu Yéhôva” i boga ni boga.